Read Shekhawati लूका 14 Bible Online

लूका 14 - Shekhawati bible

लूका 14

¹एक बर यहूदि मिनखा क अरामहाळा दिन ईसु मान्या-थान्या फरिसीया मऊँ एक परधान क घरा रोटी जिमबा गयो, अर बठै लोग बिपै आँख धर्या बेठ्याई हा।

²बठै एक आदमी बिकी आँख्या क सामै हो। जिका हात-पग पाणी भरबा की बजेऊँ सूजर्या हा।

³आ देखर ईसु सास्तरानै सीखाबाळा अर फरिसीयाऊँ बुज्यो, “अरामहाळा दिन कोईनै निरोगो करबो नेम-कायदा गेल सई ह क कोनी?”

⁴पण बे क्युंई कोनी बोल्या, जणा ईसु बिनै पकड़्यो अर निरोगो कर बिनै भेज दिओ।

⁵जणा पाछै बो बानै बोल्यो, “ज थारो छोरो नहिस बळद कुआ म पड़ज्या जणा थे अरामहाळा दिन होबा की बजेऊँ बिनै तावळासा कुआ मऊँ कोनी काडो के?”

⁶पण इ बात को बाकन कोई जुबाब कोनी हो।

⁷जद ईसु आ देख्यो की बुलाईड़ा पावणा जिमबा बेठबा ताँई चोखी-चोखी झघा टोर्या हा। जणा ईसु बानै सीखाबा ताँई एक मिसाल दिनी,

⁸“जद थानै कोई ब्या म जिमबा ताँई बुलावै जणा थे खुद जार चोखी झघा प मना बेठज्यो, क्युं क अंय्यां नइ होवै क बो तेरूँ बी बडानै नूत राख्यो होवै।

⁹अर थारै दोन्यानै नूतबाळो आर तेरूँ खेवै इनै अठै बेठबा दे। जणा तनै सरमऊँ आँख्या झुकार सऊँ निचली झघा म बेठणो पड़सी।

¹⁰इ ताँई जद थानै नूतो मिलै जणा थे जार सऊँ निचली झघा बेठज्यो, क्युं क थानै नूतो देबाळो थानै आर देखसी जणा बो खेसी, ‘ओ भाईला अठै क्याले बेठ्यो ह उपर आर बेठ।’ जणा थारै सागै बेठबाळा म तेरो मान ओर बढ ज्यासी।

¹¹क्युं क जखो खुदनै उचो दिखासी बिको सीर सकै सामै निचो कर्यो ज्यासी अर जखो खुदनै निचो दिखासी बिको सीर उचो कर्यो ज्यासी।”

¹²इकै पाछै ईसु आपका नूतबाळाऊँ बोल्यो, “जद बी तेरै कोई काण-ठिचो होवै जणा तू सगा-सम्बंदिआ, सागे भाई-भाणा अर पिसा हाळा मिनखा, अर भाईलानै मना बुलाजे क्युं क बे बी आपका ठिचा म तनै नूतर इको बदलो उतार देसी।

¹³पण तू कोई काण करै जणा गरीब, लंगड़ा-लुला अर आँदानै बुला।

¹⁴आ बात तेरै ताँई आसिरबाद होसी क्युं क बाकन तेरो बदलो उतारबा ताँई क्युंई कोनी। अर इको बदलो परमेसर तनै बि दिन देसी जि दिन धरमी मर्या पाछै ओज्यु जी उठसी।”

¹⁵ईसु की सुणर बिकै सागै चोकी प बेठर जिमबाळो एक जणो बिऊँ बोल्यो, “बे कत्ता भागहाळा हीं जखा परमेसर का राज म बेठर जिमसी।”

¹⁶जणा ईसु बिऊँ बोल्यो, “कोई मिनख बडो ठिचो करर्यो हो, अर बो बिमै आबा ताँई बोळा जणानै नूतो दिओ।

¹⁷जद बा जिमबा की घड़ी आई जणा बो जिमबा ताँई सगळानै आपको आदमी भेजर बुलावो दिवा भेज्यो, क आओ सक्यु त्यार ह।

¹⁸“पण बे सगळा का सगळा टाळमटोळ करबा लागगा। पेलो बोल्यो, ‘म एक खेत मोल लिओ हूँ अर बि खेतनै जार मनै समाळनो ह, म तो माफी चाऊँ हूँ।’

¹⁹पाछै बो दुसरा कनै गयो जणा बो बोल्यो, ‘म तो आजई पाच जोड़ी बळद मोल लिआ हीं अर म बानै बिचासबा जार्यो हूँ। दया कर मनै माफ करो।’

²⁰“एक जणो ओर बोल्यो, ‘म तो लूगाई ब्यार ल्यायो हूँ जणा म कोनी आ सकूँ।’

²¹“जणा बो दास हो जखो सगळी बात आर आपका मालिकऊँ बोली आ सुण झाळा भर'र बो मालिक हो जखो आदेस दिआ क, ‘तावळोसो जा अर नगरी क मांयनै जत्ताबी गळिआरा अर बजारा म लुला-लंगड़ा अर मंगता हीं बानै बुलाल्या।’

²²दास पाछो आर बिऊँ बोल्यो, ‘मालिक जखो ओडायो हो बो म कर दिओ पण इब बी बोळी झघा बचगी।’

²³जणा बो मालिक हो जखो ओज्यु बिनै बोल्यो, ‘तू जा अर गळिआरा अर सड़का प जत्ता बी मिनख लाधै बानै हात जो'ड़र अठै लिआ, जिऊँ मेरो घर भर्यो-भर्यो दिखै।’

²⁴अर म थारूँ बोलुँ हूँ, जिनै म सऊँ पेली नूतो भेज्यो हो बामैऊँ एक जणोई, इ जिमणार को गास्योई कोनी खा।”

²⁵जद ईसु क गेल-गेल भीड़ की भीड़ जारी ही बि टेम ईसु गेलनै मुड़्यो अर भीड़ऊँ बोल्यो,

²⁶“ज कोई मेरो चेलो बणबा की इंछ्या राखै ह। अर मेरूँ बेत्ती आपका माँ-बापानै, बाळ-बच्यानै, सागे भाई-भाणानै अर खुदका पिराणाऊँ परेम करै ह जणा बो मेरो चेलो कोनी बण सकै।

²⁷अर जखो बी मेर ताँई दुख उठाबा अर मरबानै त्यार कोनी बो मेरो चेलो कोनी हो सकै।

²⁸ज थारै मऊँ कोई बडीसारी मचाण बणाबो चावै जणा के बो पेली आपको हिसाब-किताब जो'ड़र आ कोनी देखसी क मेर कनै इनै बणाबा ताँई पिसा-पाई पूरा हीं क कोनी?

²⁹कदै अंय्यां नइ होज्या बो निम-निम भरके रेहज्या, ज अंय्यां हो जावै तो देखबाळा आ खेर बिकी हसी उडासी।

³⁰ओ बणाबा तो लागगो पण बिनै पूरो कोनी बणा सक्यो।

³¹नहिस कोई अंय्यां को राजा ह, जखो दुसरा राजाऊँ बिस झार की सेना लेर लड़बा जावै। अर बिकै चढाई करबाऊँ पेलीई बिको सामलो राजा ओ कोनी बिचारै के? क, म दस झार की सेनाऊँ बिकी बिस झार की सेना को सामनो कर लेस्युं क कोनी?

³²नहिस बो बि राजा की सेना क दूर रेह्ताई आपको दुत भेजर सुळजेटो कर लेसी।

³³अंय्यांई सक्यु तज्या पेली थे मेरा चेला कोनी बण सको।

³⁴“लुण चोखो ह पण ज लुण मऊँ सुवाद चल्योजा जणा बिनै कंय्यां चरचरो कर्यो जा सकै ह?

³⁵बो नइ तो माटी अर नइ खाद क काम आ सकै। लोग बिनै अंय्यांई बारनै बगादी हीं। जिकै कान ह बो बानै खोलल्यो।”