Read Shekhawati लूका 17 Bible Online

लूका 17 - Shekhawati bible

लूका 17

¹ईसु आपका चेलाऊँ बोल्यो, “आ तो हो कोनी सकै क मिनखानै भंगराबाळी बाता कोनी बितै, पण अंय्यां का मिनख प हाय ह जिकी बजेऊँ बे बाता होवीं हीं।

²आ नान्या मऊँ एकनै बी पाप म गेरबाळा ताँई ओ चोखो ह क बिकी नाड़ म घरट घालर बिनै समदर म गेर दिओ जावै।

³चेता म रेह्‍वो ज थारो पाड़ोसी भाईड़ो पाप करै जणा बिनै दकालो अर पापऊँ तौबा करै जणा बिनै माफ करो।

⁴ज बो रोजकी सात बार तेरो बुरो करै, अर सात्युई बार पाछो आर तेरूँ बोलै, ‘मेरूँ गळती होगी मनै माफ करो।’ जणा तू बिनै माफ कर।”

⁵बे चेला जानै भेजेड़ा चेला क नामऊँ बोल्या जाता हा बे कह्या, “परबु म्हारा बिस्वासनै बढा।”

⁶परबु कह्या, “म थारूँ बोलुँ हूँ ज थारै म राई क दाणा जत्तो बी बिस्वास होतो तो थे, इ सेसुत का दरख्तऊँ बोलता जड़ समेत उपड़'र समदर म लागज्या, जणा बो थारी बात मान ज्यातो।

⁷“मानल्यो थार मऊँ कोईसा क एक दास ह जखो खेत म हळ बावै अर लल्ड्या को रेवड़ चरावै ह। जद दास खेतऊँ आवै जणा काँई बिको मालिक बिनै अंय्यां खेवै ह क आ बेठ अर रोटी खाले?

⁸पण इकी बजाय बो खेसी, ‘रोटी-टुक बणाले अर जद ताँई म रोटी खाई-पी करूं जणा ताँई तू मेरी सेवा म खड़्यो रेह। इकै पाछै तू बी रोटी खा लिए।’

⁹बिको ओडायो करबा क पाछै के बो बि दास को गुण-एसान मानसी?

¹⁰अंय्यांई थारै सागै ह, बे सगळा काम जखा थानै करबा बेई ओडाया गया हीं। बानै करबा क पाछै थे आई खिज्यो, म्हें तो ख्याई जोगा दास कोनी अर म्हें तो म्हारो फरज निभायो ह।”

¹¹ईसु सामरीया अर गलिल नगर्या का काकड़ होर यरूसलेम जार्यो हो।

¹²जणा बठै बिनै एक गाँव म भेळाई दस कोढी मिल्या, बे बिऊँ परैई खड़्या हा।

¹³अर जोर-जोरऊँ बोलबा लाग्या, “ओ म्हराज ईसु म्हारै प दया कर।”

¹⁴जणा बो बानै देखर बोल्यो, “जाओ अर खुदनै याजकानै जार दिखाओ।” अर गेला मई बाको कोढ धुपगो।

¹⁵जणा बामैऊँ एक जणो आ देखर की म निरोगो होगो हूँ। बो परमेसर को जोरऊँ गुणगान गातो पाछो आयो।

¹⁶बो मुंडावाणी ईसु का पगा म पड़गो अर बिको जेकारो लगाबा लागगो। अर बो एक सामरी हो।

¹⁷ईसु बिऊँ बुज्यो, “बे नो कठै हीं, के दस का दस को कोढ कोनी धुप्यो?

¹⁸इ परदेसी मिनखनै छोडर कोईसोई अंय्यां को कोनी जखो आर परमेसर की जे-जैकार करतो?”

¹⁹जणा ईसु पाछो बिऊँ बोल्यो, “खड़्यो हो अर जा तनै तेरो बिस्वास निरोगो कर्यो ह।”

²⁰एक बार क्युंक फरिसी ईसुनै बुज्या क, “परमेसर को राज कद आसी?” जणा बो बानै बोल्यो, “परमेसर को राज दिखबाळा रूप म कोनी आवै।

²¹कोई आ कोनी खे सकै, की देखो परमेसर को राज ओर्यो नहिस बोर्यो, क्युं क परमेसर को राज तो थारै मांयनैई ह।”

²²जणा बो चेलानै बतायो, “अंय्यां की घड़ी बी आसी जद थे मिनख का बेटानै देखबो चास्यो पण बिनै देख कोनी सकोगा।

²³अर अंय्यां का बी होसी जखा थानै खेसी, ‘देखो बो बठै ह! नइ बो अठै ह!’ पण थे बाकी मना मानज्यो।

²⁴क्युं क जंय्यां बिजळी अकास का एक कूणा म चमक सगळा अकासनै चमका दे ह, बंय्यांई मिनख को बेटो आपका दिन म होसी जि दिन बो आसी।

²⁵पण पेली बो बोळो दुख देखसी अर इ जुग का मिनख बिनै तज देसी।

²⁶जंय्यां नूह क दिना म होयो हो बंय्यांई मिनख का बेटा का दिना म होसी।

²⁷जि दिन ताँई नूह झाज प कोनी चढगो हो बि दिन ताँई मिनख खाता पिता हा, बामै ब्या होर्या हा। पण परले आई अर सक्यानै नास कर दिनी।

²⁸अंय्यांई लुत क दिना म होयो हो। जद बी मिनख खार्या-पीर्या हा, मोल खरीदता अर बेचता हा खेती करता अर घर बणार्या हा।

²⁹पण जि दिन लुत सदोमऊँ बारनै पग धर्यो बि दिनई अकासऊँ परमेसर आग अर भबकता तिजाब भर्या खिरा बरसाया अर बे सक्यानै बाळ गेर्या।

³⁰बि दिन बी अंय्यां होसी जि दिन मिनख को बेटो परगट होसी।

³¹बि दिन जखो मिनख छात प होवै अर बिको समान घर म होवै जणा बो बिनै लेबा तळै नइ उतरै। अर बंय्यांई जखो खेत म होवै बो पाछो नइ आवै।

³²याद राखो लुत की लूगाई क सागै काँई होयो,

³³जखो आपको पिराण बचासी बो बिनै खोसी अर जखो बिनै मेरी बजेऊँ खोसी बो बिनै अजर-अमर का जीवन ताँई बचासी।

³⁴म थानै बताऊँ हूँ बि रात एक खाटली प दो मिनख सुत्या रेह्सी। बामैऊँ जिको मेर प बिस्वास होसी बिनै सागै ले लिआ जासी दुसरानै छोड दिओ जासी।

³⁵एक सागै चाकी म दाणा पिसती दो लूगाया मऊँ एक लेली जासी अर दुसरी बठैई छोड दि जासी।

³⁶खेत म काम करता दो जणा मऊँ एक ले लिओ जासी अर दुसरो छोड दिओ जासी।”[9]

³⁷अ बाता सुणर चेला बुज्या, “परबु अ बाता कठै होसी?” बो बाऊँ बोल्यो, “जठै क्युं मरेड़ो पड़्यो ह बठै गिरज कांवळा भेळा होसी।”