Read Shekhawati लूका 2 Bible Online

लूका 2 - Shekhawati bible

लूका 2

¹बा दिना राजा अगस्तुस ओ आदेस बटवायो क सगळा रोमी राज का मिनखा को नाम दरज कर्यो जावै[1]।

²आ रोमी राज की पेली जणगणना ही। आ बि टेम का होई, जि टेम सिरीया को जमीदार कबरीनियुस हो।

³जणा सगळा मिनख नाम दरज कराबा आप-आप क गाँव गया।

⁴जणा युसूफ बी गलिल का नासरत नगरऊँ यहूदिआ म दाऊद की जन्मभौम बेतलम गयो क्युं क बो दाऊद का कूणबा अर बिकी पिडी को हो।

⁵नाम दरज कराबा बो मरीयम क सागै गयो जिकै सागै बिकी सगाई हो राखी ही अर बा आसऊँ ही

⁶अंय्यां होयो क बठैई मरीयम क जापा की घड़ी आगी।

⁷अर बिकै पेलीपोत को छोरो होयो जिनै बा गाबा म लपेटर ल्हास म सुवायो क्युं क बानै रेह्बा की झघा कोनी मिली।

⁸अर रातनै बि इलाका की रोई म गुवाळ्या आप-आपका रेवड़ा की रूखाळी करर्या हा।

⁹अर परबु को एक ईस्बर नगरी दुत बाकै सारै आर खड़्यो होगो अर बाकै च्यारूमेर परबु की मेमा को तेज चमक्यो जिऊँ बे डर क मारै धुजबा लागगा।

¹⁰जणा बो ईस्बर नगरी दुत बाऊँ बोल्यो, “डरो मना म थानै चोखो समचार सुणाऊँ हूँ, जखो सगळा मिनखा ताँई होसी।

¹¹क्युं क थानै बचाबाळा मसी परबु को जलम आज दाऊद की नगरी म होगो ह।

¹²अर इकी पिछाण आ ह क थानै बो जलम्यो टाबर ल्हास म गाबा म लिपटेड़ो मिलसी।”

¹³अत्ता मई बठै ईस्बर नगरी दुत क सागै ईस्बर नगरी दुता की भीड़ की भीड़ परगट होई अर अंय्यां बोलर परमेसर को गुणगान करबा लागी

¹⁴क, “ईस्बर नगरी म परमेसर की जे-जैकार हो अर धरती प बा मिनखानै स्यांती मिलै जिऊँ बो राजी ह।”

¹⁵जद बे ईस्बर नगरी दुत बठैऊँ ओटा ईस्बर नगरी चलेग्या जणा बे गुवाळ्या आपसरी म बतळाया क, “आओ क्युंनै आपा इ बातनै बेतलम चालर देखां जखी आपानै परबु बताई ह।”

¹⁶जणा बे तावळासा जार मरीयम, युसूफनै अर ल्हास म बि टाबरियानै देख्या।

¹⁷अर देखर बे गुवाळ्या इ टाबरिया क बारां म बोलेड़ी बाता बानै बताई।

¹⁸अर जत्ता बी गुवाळ्यानै सुण्या बे ताजूब कर्या।

¹⁹पण मरीयम बा सगळी बातानै आपका हिया म राखर बिचार्या करती ही।

²⁰अर बे गुवाळ्या जंय्यां की बाऊँ बोल्यो गयो हो बंय्यांई सगळी बातानै देखर परमेसर को गुणगान करता पाछा चलेग्या।

²¹आठवा दिन जद बि टाबर की सुन्नत करबा को टेम आयो जणा बिको नाम ईसु काड्यो, ओ नाम ईस्बर नगरी दुत बिकै पेट म पड़बाऊँ पेलीई बता दिओ हो।

²²जणा मूसा का नेम-कायदा गेल जच्चा को सुद होबा[2] को दिन आयो बि टेम युसूफ अर मरीयम बि टाबरनै परमेसर क सामै हाजिर करबानै यरूसलेम लेग्या।

²³जंय्यां परबु का नेम-कायदा म मंडर्यो ह, “हर पेलीपोत का छोरानै परमेसर की सेवा ताँई टाळबो पड़सी।”

²⁴अर बे बि परबु का नेम-कायदा गेल मोडी को एक जोड़ो नहिस कबूतरा को जोड़ो बलि चढाबा गया।

²⁵यरूसलेम म पबितर आत्माऊँ भरेड़ो समोन नाम को एक खरो अर भगत मिनख हो जखो इजरायल की अजादिनै उडिकर्यो हो।

²⁶अर पबितर आत्मा बिनै आ बता राखी ही क परबु का भेजेड़ा मसीनै देख्या बिना तनै मोत कोनी आवै।

²⁷अर पबितर आत्मा बिनै बडा अरदास घर म ल्याई। अर बि टेमई ईसु मसी का माँ-बाप नेम-कायदा की रिती पूरी करबा ताँई ईसुनै ल्याया।

²⁸जणा समोन बि टाबरनै आपकी गोद्‍या म लेर, परमेसर को गुणगान कर बोल्यो,

²⁹“परबु थे थारा कह्यानै पूरो कर्या हो इब थारो दास सुक-स्यांतीऊँ मर सकै ह।

³⁰क्युं क मेरी आँख्या थारा भेजेड़ा छुटकारो देबाळानै देखली।

³¹जिनै थे सगळा मिनखा की आँख्या क सामै रच्यो ह।

³²ओ बा गैर-यहूदि मिनखा ताँई थारो गेलो दिखाबाळो उजाळो अर थारा इजरायल का मिनखा ताँई मेमा ह।”

³³बिकै बारां म आ बातानै सुणर बिका माँ-बाप ताजूब कर्या।

³⁴आ बात होबा क पाछै समोन बानै आसिरबाद देर बिकी माँ मरीयमऊँ बोल्यो, “इ टाबरनै इजरायल म कयानै डूबाबा अर तारबा को कारण बणबा अर परमेसर की पिछाण बणबा ताँई जिको बिरोद कर्यो ज्यासी पैदा कर्यो गयो ह।

³⁵जिऊँ कया की पोल चोड़ै आसी। अर तेरी आत्मा तड़पसी।”

³⁶अर बठै हन्ना नाम की परमेसर की खेबाळी एक बूडी लूगाई ही। अर बा आसेर का कूणबा का फानूल की छोरी ही। अर बा आपकै ब्या क सात बरसा ताँई सुहागण ही।

³⁷इब बा चोरासी बरस की होरी ही। अर बा कदैई मनदरनै कोनी तज्यो बा रात-दिन बरत अर अरदास क सागै परबु की भगती करती।

³⁸बि टेम बा आर परमेसर को धनेवाद दिओ अर बा सगळानै जखा यरूसलेम का छुटकारानै उडिकर्या हा बि टाबर क बारां म बतायो।

³⁹परबु का नेम-कायदा गेल सक्यु सलटार बे पाछा गलिल म आपकी नगरी नासरत म आग्या।

⁴⁰अर बो टाबरियो होळ्या-होळ्या सागेड़ो मोट्यार होगो अर बुदी म बढतो गयो अर बिपै परमेसर की दया ही।

⁴¹बिका माँ-बाप फसै का त्युंहार प आई बरस यरूसलेम जाया करता हा।

⁴²जद बो बारा बरसा को होयोक जणा बे फसै का त्युंहार की रीत गेल यरूसलेम गया।

⁴³जद त्युंहार खतम होयो जणा बे घरा जाबा लाग्या पण ईसु बठैई रेह्गो अर बिका माँ-बापनै इको बेरो कोनी हो।

⁴⁴अर बिकाळा माँ-बाप इ भेम म हा क बो अठैई आपणा कोईसा सागैहाळा क सागै होसी। अंय्यां करता-करता एक दिन बितगो। जणा बे आपका सगा-सम्बंदिआ अर जाणकारा म बिनै ढुंढबा लागगा।

⁴⁵अर बो बानै लाध्योई कोनी जणा बे बिनै ढुंढता-ढुंढता ओज्यु यरूसलेम आया।

⁴⁶तीन दिना क पाछै बो बानै ज्ञानीधान्या म बेठ्यो बाकी सुणतो अर बाऊँ सुवाल जुबाब करतो मनदर म लाध्यो।

⁴⁷अर जत्ता बी बिनै सुणै हाक बे सगळा बिका समजदारी भर्या जुबाबा प ताजूब कर्यो।

⁴⁸बिका माँ-बाप बिनै देखर भोचंगा होगा अर बिकी माँ बिऊँ बोली, “मेरा लाल तू म्हारै म आ काँई करी? तेरो बापू अर म तनै ढुंढता-ढुंढता हिरान होगा।”

⁴⁹जणा ईसु बाऊँ बोल्यो, “थे मनै क्याले ढुंढा हा? थानै बेरो कोनी के? मनै मेरा परम-पिता क घरा होणोई ह।”

⁵⁰पण ईसु की बात बाकै पलै कोनी पड़ी।

⁵¹अर इकै पाछै बो बाकै सागै पाछो नासरत आगो अर बाकै कह्या म चालतो हो। बिकी माँ आ सगळी बातानै आपका हिया म धर राखी ही।

⁵²ईसु काया, बुदी, परमेसर अर मिनखा की छतर-छाया म बढतो गयो।