Read Shekhawati लूका 22 Bible Online

लूका 22 - Shekhawati bible

लूका 22

¹बिना खमिर की रोटी को त्युंहार जिनै फसै बोलता हा बो आर्यो हो।

²अर परधान याजक अर सास्तरी इ फिराक म रेह्बा लाग्या क बिनै कंय्यांसिक मारां क्युं क बे मिनखाऊँ डरता हा।

³ईसु का बारा चेला मऊँ यहूदा जिनै इस्करोती बी खेता हा बिमै सेतान बड़गो।

⁴अर बो मनदर का परधान याजक, अधिकार्या अर सिपाईड़ा कनै जार बाऊँ ईसुनै कंय्यांसिक पकड़ाऊँ इपै बतळायो।

⁵इ बात प बाकै तो घी का दिआ जळगा क्युं क बे तो आई चावा हा अर बे इकै बदला म बिनै रिपीआ देबा की बात बोली।

⁶यहूदा इ बात म आपकी हामी मिलादि अर मोका की फिराक म रेह्बा लाग्यो क ओ कद भीड़ऊँ न्यारो होवै। अर म इनै धोकाऊँ पकड़ाऊँ।

⁷इब बिना खमिर की रोटी को दिन आगो। बि दिन फसै ताँई उन्या की बलि दि जाती ही।

⁸जणा बो पतरस अर यहून्नानै बोल्यो, “जार आपणा ताँई फसै की रोटी बणाओ।”

⁹बे कह्या, “आ कठै बणाणी ह।”

¹⁰जणा बो बोल्यो, “थे जंय्यांई नगरी म बड़स्यो बंय्यांई थानै एक आदमी पाणी को घड़ो लिआ मिलसी थे तो बिकै गेल-गेल होज्याज्यो अर जि घर म बो जावै थे बी, बि घर म बड़ ज्यायो।

¹¹अर बि घर का धणीऊँ बोलज्यो, ‘गरूजी आ बुजबा भेज्या हीं क बा बेठख कठै ह जठै म मेरा चेला क सागै फसै की रोटी खास्युं?’

¹²जणा बो आदमी थानै बडोसारो जच्यो-जचाईड़ो चोबारो दिखासी। थे दोन्यु बठैई सक्यु त्यार करज्यो।”

¹³जणा बे चलेग्या अर जंय्यां बानै बोल्यो गयो हो बंय्यांई सक्यु मिल्यो जणा बे फसै की रोटी बणाई।

¹⁴जद बा घड़ी आई जणा ईसु आपका बा चेला क सागै रोटी खाबा बेठ्यो जखा भेजेड़ा चेला खुवाता हा।

¹⁵अर बो बाऊँ बोल्यो, “पिड़ा भोगबाऊँ पेली म चाऊँ हूँ क म थारै सागै फसै की रोटी खाऊँ।

¹⁶क्युं क जद ताँई परमेसर का राज म इ रोटी को मतबल पूरो नइ होज्या आज क पाछै बि दिन ताँई म ओज्यु आ रोटी कोनी खास्युं।”

¹⁷जणा बो कचोळो लेर अरदास करीं अर बोल्यो, “ल्यो इनै आपसरी म बाट ल्यो।

¹⁸क्युं क आजऊँ लेर जद ताँई परमेसर को राज नइ आज्यावै बि दिन ताँई म ओज्यु आ अँगूरी कोनी पीऊँ।”

¹⁹इकै पाछै बो रोटी लेर अरदास करी अर बिका टुकड़ा कर बानै देर बोल्यो, “ल्यो आ मेरी काया ह जखी थारै ताँई दि गई ह मेरी याद म अंय्यांई करज्यो।”

²⁰अंय्यांई रोटी खाबा क पाछै बो कचोळो लेर बानै बोल्यो, “ल्यो ओ कचोळो मेरा लोयऊँ करेड़ा नया करार की निसाणी ह। जखो थारै ताँई बहायो जार्यो ह।

²¹पण मनै पकड़ाबाळो मेरै सागैई खाबा लागर्यो ह।

²²मिनख का बेटानै तो मरनोई ह जंय्यां की परमेसर ते कर्यो ह। पण हाय बि मिनख प जखो बिनै पकड़ासी।”

²³इ बात प बे एक दुसराऊँ बुजबा लाग्या, “आपणा मऊँ बो कूणसो ह जखो अंय्यां करसी।”

²⁴चेला म इ बात प खिचा-ताणी होई क बामै कूणसो बडो मान्यो जावै।

²⁵ईसु बोल्यो, “परमेसरनै नइ ध्यारबाळा राजा आपकी परजा प हक जमावीं। अर राज करबाळा मिनखा का भाईला खुवावीं।

²⁶पण थे अंय्यां का कोनी, इकै बदलै थारै मऊँ जखो बडो ह बो छोटा की जंय्यां अर परधान ह बो दास की जंय्यां बणज्यो।

²⁷बडो कूण? जखो खाबा ताँई चोकी प बेठ्यो ह, नहिस परूसगारो? के बो कोनी जखो खाबा बेठ्यो ह, पण म तो थारै मांयनै परूसगारा की जंय्यां हूँ।

²⁸पण थे बे हो जखा मेरा दुख म सदाई मेरै सागै रिह्या हो।

²⁹राज करबा ताँई म थानै बो हक देर्यो हूँ जखो मेरा परम-पिताऊँ मनै मिलेड़ो ह।

³⁰क्युं क मेरा राज म थे मेरी चोकी प खाई-पी करस्यो अर राजगद्‍या प बेठर इजरायल का बारा गोता को न्याय करस्यो।”

³¹ईसु पतरसऊँ बोल्यो, “समोन ओ समोन! मेरी बात सुण! जंय्यां एक किसान ग्युंनै फटकार बिनै तुड़ीऊँ न्यारो करै ह। बंय्यांई थानै सगळानै बिचासबा की हामी सेतान ले लिओ ह।

³²पण म तेरै ताँई परमेसरऊँ अरदास करी ह की तेरो बिस्वास बण्यो रेह्‍वै अर जद तू पाछो जीवन का गेला प आवै जणा तेरा भाई-भाणानै बिस्वास म पक्को करजे।”

³³पतरस बोल्यो, “परबु म तेरै सागै जेळ जाबा अर मरबानै बी त्यार हूँ।”

³⁴जणा ईसु बोल्यो, “मेरी बात सुण जद ताँई तू तीन बार मेरै ताँई कोनी नट देसी आज मुरगो बांग कोनी देसी।”

³⁵इकै पाछै बो आपका चेलाऊँ बुज्यो, “म जद थानै बिना बटूआ, झोळा अर चपल्या क भेज्यो जणा थानै क्युं चिज की कमी पड़ी ही के?” बे कह्या, “ख्याकीई कमी कोनी होई।”

³⁶पण इब म बोलुँ हूँ, “जिकनै बटूओ ह बो बिनै लेले अर अंय्यांई झोळो अर जिकै कनै तलवार कोनी बो आपका गाबा बेचर बिनै मोल लेले।

³⁷क्युं क सास्तर म मंडेड़ी बाता मेरै ताँई पूरी होसी क बो अपराद्‍या म गिण्यो जासी अ मंडेड़ी बाता पूरी होबा जारी ह।”

³⁸चेला कह्या, “परबु आ देखो अठै दो तलवार पड़ी ह।” इपै बो बोल्यो, “अ तो बोळी।”

³⁹ईसु नगरीनै छोडर आपकी बाण गेल जेतून का डूँगरपै चलेगो। अर चेला बिकै गेल-गेल,

⁴⁰बठै पुग्या पाछै बो बाऊँ बोल्यो, “अरदास करो की थे बिचास्या नइ जाओ।”

⁴¹जत्ती दूर भाठो बगायो जा सकै ह बो बेत्ती दूर बाऊँ न्यारो जार गोडा क पाण बेठर अरदास करबा लागगो,

⁴²“परम-पिता ज थे चाओ तो इ दुख का कचोळाऊँ मनै बचा सको हो, पण मेरी नइ थारी इंछ्या पूरी होणी चाए।”

⁴³जणा बठै बिकै सामै एक ईस्बर नगरी दुत परगट होयो अर बिनै हिमत बंधायो।

⁴⁴अर बो बोळो दुखी होर ओर बी बेत्ती लगन क सागै अरदास करबा लाग्यो। अर बिको पसिनो लोय का टपका की जंय्यां धरती प गिरै हो।

⁴⁵अर जद बो अरदासऊँ उठर आपका चेला कनै गयो जणा बे बिनै दुख क मार्या आखता होर सुत्या लाध्या।

⁴⁶जणा बो बानै बोल्यो, “सोर्या क्याले हो खड़्या होर अरदास म लागज्याओ जिऊँ थे बिचास्या नइ जाओ।”

⁴⁷बो हाल बोलर्योई हो, क बठै भीड़ भेळी होगी अर बि भीड़ क आगै-आगै यहूदा होर्यो जखो बा बारा चेला मऊँ एक हो। बो ईसु कनै आर बिको माखो[10] ले लिओ।

⁴⁸पण ईसु बिनै बोल्यो, “यहूदा मेरो माखो लेर के तू मिनख का बेटानै धोकाऊँ पकड़ावै ह?”

⁴⁹जणा बिका चेला आ भापर की आगै काँई होबाळो हो कह्या परबु म्हें तलवार काडल्याँ के?

⁵⁰अर बामैऊँ एक आपकी तलवार काड म्हायाजक का दास को दाइणो कान काट दिओ।

⁵¹इपै ईसु बोल्यो, “बस चुपचाल्या रेह्‍वो!” अर बो बिका कान क हात अड़ार बिनै ओज्यु जोप दिओ।

⁵²जणा पाछै बो बिपै चढाई करबा आया परधान याजक, मनदर का सिपाईड़ा का अधिकारी अर यहूदि नेताऊँ बोल्यो, “म डाकू हूँ के? जखो थे तलवार अर लाठी लेर मेर कनै आया हो।

⁵³जद म रोजकी थारै सागै मनदर म रेह्तो हो बि टेम तो थे मेर प हात कोनी घाल्यो। पण आज थारो टेम ह जिपै अँधकार की ताकत को हक ह।”

⁵⁴इकै पाछै बे बिनै पकड़र म्हायाजक क घरा लेग्या। अर पतरस छापळतो छापळतो बाकै गेल होर्यो हो।

⁵⁵याजक हाळी गुवाड़ी क बिचमै जार बे आग सूलगाई अर जखा आग क च्यारूमेर बेठ्या हा बाकै सागै पतरस बी बेठगो।

⁵⁶जणा एक दासी बिनै आग का च्यानणा म पिछाणर बोली, “ओ आदमी बी तो ईसु क सागैई हो।”

⁵⁷पण पतरस नटतो नटतो बोल्यो, “ए स्याणी म बिनै कोनी जाणू।”

⁵⁸चिनेक देर पाछै एक ओर मिनख पतरसनै देखर बोल्यो, “तू बी तो बामैऊँई ह।” पण इबकै बी पतरस बोल्यो, “अरै भला मानस म बो कोनी।”

⁵⁹अर घंटा भर पाछै एक जणो ओर जोर देर बोल्यो, “ओ तो साच्याई बामैऊँई ह। क्युं क ओ बी गलिली ह।”

⁶⁰पण पतरस बोल्यो, “भला मानस मेरै क्युंई पलै कोनी पड़री, थे की ताँई बोलर्या हो।” बो आ खेर्योई हो क मुरगो बांग दि।

⁶¹जणा ईसु बिनै आपकी नाड़ घूमार देख्यो। अर देख ताँई पतरसनै परबु की बोलेड़ी बात याद आगी क, “आज मुरगा क बांग देबाऊँ पेली तू मेरै ताँई तीन बार नटसी।”

⁶²जणा बो बारनै आर बुर्या रोबा लागगो।

⁶³जखा ईसुनै पकड़ राख्या हा बे बिको मजाक उडाबा अर पिटबा लागगा।

⁶⁴बे बिकी आँख्या प पटी बांद दि अर कह्या, “बूजा काड क तनै कूण मारै ह?”

⁶⁵अर बे बिको निरादर करबा ताँई ओर बी बोळी बाता बोली।

⁶⁶दिन उगताई यहूदि नेता, परधान याजक अर सास्तरनै सीखाबाळा भेळा होया अर ईसुनै बी पंचायत म पेस कर्यो गयो।

⁶⁷अर बिऊँ सुवाल कर्यो, “तू मसी ह के?” ईसु बोल्यो, “ज म बोलुँ जणा थे मेरो बिस्वास कोनी करस्यो।

⁶⁸अर ज म थानै बुजूँ जणा थे जुबाब कोनी देस्यो।

⁶⁹पण इबऊँई मिनख को बेटो परम-परधान परमेसर क दाया हात कानि बेठसी।”

⁷⁰बे सगळा कह्या, “जणा के तू परमेसर को बेटो ह?” ईसु बोल्यो, “जंय्यां की थे खुद खेर्या हो, क बो म हूँ।”

⁷¹जणा बे कह्या, “आपानै ओर सबूत की कोई जुर्त कोनी क्युं क आपा अ बात तो इकै मुंडाऊँई सुण लिआ हां।”