Read Shekhawati लूका 23 Bible Online

लूका 23 - Shekhawati bible

लूका 23

¹इकै पाछै सगळी पंचायत खड़ी होगी अर बिनै पीळातुस क कनै लेगी।

²बे बिपै बलेम लगाया, “म्हें इनै यहूदि मिनखानै भंगराता पकड़्या हां क समराटनै लगान नइ देणो चाए अर ओ खुदनै मसी राजा बतावै ह।”

³जणा पीळातुस बिऊँ बुज्यो, “तू यहूदिआ को राजा ह के?” ईसु बोल्यो, “जंय्यां तू खुदई खेर्यो ह।”

⁴जणा पीळातुस मिनखा अर परधान याजकऊँ बोल्यो, “मनै तो इ आदमी म क्युंई गळत कोनी दिखर्यो।”

⁵पण बे आपकी बात प अड़्या रिह्या, “नइ ओ गलिल दिसावरऊँ लेर सगळा यहूदिआ दिसावर अर अठै का मिनखानै आपकी सीखऊँ भड़कायो ह।”

⁶आ सुणर पीळातुस बोल्यो, “के ओ गलिल को रेह्बाळो ह?”

⁷अर आ जा'णर क बो हेरोद का इलाका को ह जणा बो बिनै हेरोद क कनै भेज दिओ जखो बा दिना म यरूसलेम मई हो।

⁸ईसुनै देखर हेरोद राजी होयो क्युं क बो बोळी पेलीऊँ बिकै बारां म सुण राख्यो हो बो बिऊँ मिलबो चातो हो अर बिऊँ क्युं चमत्कार देखबो चातो हो।

⁹जणा बो ईसुऊँ बोळी बाता बुजी पण बो एक कोई जुबाब कोनी दिओ।

¹⁰परधान याजक अर सास्तरनै सीखाबाळा बठै खड़्या-खड़्या एक की दो लगाता रिह्या।

¹¹जणा हेरोद अर बिका सिपाईड़ा बिको मजाक उडायो। अर बिको निरादर कर बिनै एक मेंगो चोळो पिरा'र ओटो पीळातुस क कनै भेज दिओ।

¹²बि दिनई हेरोद अर पीळातुस एक दुसरा का भाईला बणगा इऊँ पेली बाकी कदैई कोनी बणी।

¹³पीळातुस परधान याजका, यहूदि नेता अर मिनखानै भेळा कर

¹⁴बाऊँ बोल्यो, “थे इ आदमीनै, मिनखानै भंगराबा का जुरम म मेरै कनै ल्याया। अर म थारै सामैई, इ बात की जाच पड़ताळ करी पण म बिमै अंय्यां की कोई बातई कोनी पकड़ी।

¹⁵अर नइ हेरोदनै इमै क्युं मिल्यो जणाई तो बो इनै पाछो आपणै कनै भेज दिओ। ओ अंय्यां को क्युंई कोनी कर्यो जिकै चलतै ओ मोत की सजा भोगै।

¹⁶जणा म इकै तड़ा मरवार छोड द्‍युँ?”

¹⁷पीळातुस आई बरस फसै का त्युंहार प यहूदि मिनखा ताँई एक केदिनै छोडतो हो।[11]

¹⁸जणा सगळा जोरऊँ एक सागै कह्या, “तू म्हारै ताँई बरअबानै छोड दे पण इको काम जचा।”

¹⁹बरअबानै नगरी म सरकार क खिलाप बगावत अर हत्या का जुरम म जेळ म गेर राख्यो हो।

²⁰पण पीळातुस ईसुनै छोडबो चावै हो। जणाई बो लोगानै ओज्यु बोल्यो।

²¹पण बे एकई रट लगा राखी, “इनै सुळी प चढा द्‍यो।”

²²पीळातुस तीसरका बोल्यो, “क्युं बो अंय्यां को कूणसो पाप कर्यो ह? जखो म इनै मोत की सजा द्‍युँ! क्युं क मनै तो इमै अंय्यां की कोई बुराई कोनी दिखी जणा फेर म इकै तड़ा लगवार छोड द्‍युँ।”

²³पण बे ओर बी जोरऊँ चिलाबा लागगा, “नइ इनै तो सुळी प चढाओ” अर बाकी जीत होई।

²⁴पीळातुस आदेस काड दिआ क आकी माँग पूरी होवै।

²⁵अर बो एक आदेस ओर काड्यो क बरअबानै छोड दिओ जावै जिनै मिनख छोडबा की माँग करर्या हा जखो सरकार क खिलाप बगावत अर हत्या का जुरम म जेळ म पड़्यो हो अर ईसुनै बाका हाता म सूप दिओ जिऊँ बे बिकै सागै बा कर सकै जखो बे चावै हा।

²⁶सिपाईड़ा जद ईसुनै ले जार्या हा। जणा बे समोन नाम का एक कुरेनीनै देख्यो जखो ढाणीऊँ आर्यो हो अर बे बिनै पकड़र बिपै सुळी धर दिआ अर बिनै ईसु क गेल-गेल कर लिओ।

²⁷अर मिनखा की भीड़ की भीड़ बिकै गेल-गेल होरी, जिमै बोळी लूगाया अंय्यां की ही जखी ईसु ताँई रोरी अर बिलखरी ही।

²⁸इपै ईसु पाछै मुड़र बाऊँ बोल्यो, “यरूसलेम म रेह्बाळी लूगायो थे मेरै ताँई मना रोओ पण थे खुद ताँई अर थारा टाबरा ताँई रोओ।

²⁹क्युं क बा घड़ी बी आबाळी ह जद मिनख खेसी भागहाळी हीं बे लूगाया जखी बांझड़ी ह। अर बा कोख जखी टाबर कोनी जणी अर बा छाती जखी कदैई कोनी चुंघाई।

³⁰बि घड़ी मिनख डूँगरऊँ बोलसी म्हारै प पड़ मरो अर डूँगर्याऊँ बोलसी म्हानै लुखाले।

³¹क्युं क जद मिनख हर्या दरख्तनै कोनी बकसै जणा फेर सूका को तो खेबोई के?”

³²बे बिकै सागै दो अपराद्‍यानै बी मारबानै जार्या हा।

³³अर जद बे बि झघा पुग्या जिनै भोडी खेता हा, बे ईसु अर बा दो कुकरमीयानै सुळी चढा दिआ बा दोन्या मऊँ एकनै बिकै दायणा अर दुसरानै बाया हात कानि सुळी प चढा दिआ।

³⁴इपै ईसु बोल्यो, “परम-पिता आनै माफ कर द्‍यो क्युं क आनै कोनी बेरो क अ काँई कर्या हीं।” अर बे सिपाईड़ा पासो फेकर बिका गाबानै आपसरी म बाट लिआ।

³⁵बठै खड़्या मिनख देखर्या हा, अर बठै खड़्या यहूदि नेता आ बोलर बिको मजाक उडार्या हा क, “ओ ओरानै बचायो ज ओ सचमई परमेसर को टाळेड़ो मसी ह जणा खुदनै बचार दिखावै।”

³⁶सिपाईड़ा बी बिको मजाक उडायो अर बिनै सस्ती अँगूरी पीबा ताँई दि।

³⁷अर कह्या, “तू सचमई यहूदिआ को राजा ह जणा खुदनै बचाले।”

³⁸अर बिकै सीर क उपरनै एक बात मांड दि ही की ओ यहूदि मिनखा को राजा ह।

³⁹बिकै सागै लटकायड़ा दो अपराद्‍या मऊँ एक जणो बिकी बुराई करतोई बोल्यो, “तू मसी कोनी के? जणा पाछै खुदबी बच अर म्हानै बी बचा।”

⁴⁰जणा दुसरो हो जखो बिनै दकालर बोल्यो, “तनै जमाई परमेसर को डर कोनी? तू बी तो बाई सजा भोगर्यो ह जखी ओ भोगर्यो ह।

⁴¹क्युं क आपानै आपणी करनी गेल फळ मिलर्यो ह, पण ओ लाय तो क्युं कर्योई कोनी।”

⁴²पाछै बो बोल्यो, “ईसु जद तू तेरा राज म आसी जणा मनै याद राखजे।”

⁴³जणा ईसु बिऊँ बोल्यो, “म तनै बचन देऊँ हूँ क आज तू मेरै सागै परलोक[12] म होसी।”

⁴⁴बि दिन दोपारा बारा बजेऊँ लेर तीन बजै ताँई सगळा इलाका प अँधेरो घट घूमर होगो।

⁴⁵सूरज काळो होगो। अर मनदर को परदो पा'टर दो टुकड़ा होगा।

⁴⁶ईसु जोरकी उवाज म बोल्यो, “परम-पिता म मेरी आत्मा थारा हाता म देऊँ हूँ आ खेताई, बो पिराण तज दिआ।”

⁴⁷अठै जोक्यु होयो बिनै देखर सुबेदार परमेसर की बडाई कर बोल्यो, “ओ पक्कोई धरमी मिनख हो।”

⁴⁸अर बठै भेळा होयड़ा मिनख बठै जोक्यु होयो बिनै देखर बि दुख म छाती कुटताई आपकै घरा बावड़्याया।

⁴⁹पण बिका जाण-पिछाण का मिनख अर बे लूगाया जखी गलिलऊँ बिकै सागै आई बे दूर खड़ी होर सक्यु देखरी ही।

⁵⁰यहूदिआ दिसावर म अरमतिया नगरी को रेह्बाळो युसूफ नाम को एक मिनख हो। जखो यहूदि पंचायत को सदस्य हो। पण बो सभा का दुसरा मिनखा की बाता म सामिल कोनी हो जिमै ईसुनै मारबा प हामी होई ही ओ धरमी अर लोगा म मान्यो-थान्यो हो। अर ओ परमेसर का राजनै उडिकर्यो हो।

⁵¹

⁵²बो ईसु की लास माँगबा पीळातुस क कनै गयो।

⁵³अर ईसु की लास सुळी पऊँ उतार बिपै मखमल को चादरो पळेटर बिनै ढाड म खोदेड़ी कबर म धर दिनी। जिमै इऊँ पेली कोईकिई लास कोनी धरी गई ही।

⁵⁴बि दिन सकरवार हो अर अरामहाळो दिन लागबाळो हो।

⁵⁵बे लूगाया जखी गलिलऊँ चालर आई ही बे युसूफ क गेल जार बि कबरनै देखी अर आ बी देखी की बिकी लास कंय्यां धरी गई ह।

⁵⁶जणा पाछै बे ओटी आर लास प लगाबा ताँई सुगंद देबाळो लेव बणाई। अर हुकमानै मानबा गेल बे अरामहाळा दिन अराम करी।