Read Shekhawati लूका 24 Bible Online

लूका 24 - Shekhawati bible

लूका 24

¹सपता का पेला दिन दितबारनै, भागपाट्याई बे लूगाया जखी बो सुगंद देबाळो लेव जिनै बे त्यार करी ही बिनै लेर कबर प गई।

²बानै कबर का मुंडा आगै को भाठो सरकेड़ो लाध्यो।

³जणा बे मांयनै जार देखी पण बानै बठै परबु ईसु की लास कोनी लाधी।

⁴बे खड़ी-खड़ी सोचबा लागी क, “ईसु की लास कठै गई,” अत्ती बारां मई बाकन दो आदमी आर खड़्या होगा जाका गाबा भळका मारै हा।

⁵जणा बे बानै देखर डर क मारी धरती म निची घूण घाली। बे दोन्यु जणा बाऊँ कह्या, “जखो जिंदो ह बिनै मरेड़ा म क्युं ढुंढो हो?

⁶बो अठै कोनी। बो जी उठ्यो। बा बात याद करो जखी बो मरबाऊँ पेली गलिल म थारूँ बोली ही।

⁷बो बोल्यो हो, ‘आ तो होणी ह क मिनख को बेटो पाप्या क हाता म पड़सी बिनै सुळी प चढायो जासी पण तीसरै दिन जी उठसी।’”

⁸जणा बा लूगाया क बिकी बाता याद आई।

⁹अर बठैऊँ पाछी आर बे बा ग्यारा चेला अर दुसरानै बे सगळी बाता बताई।

¹⁰अ बाता बताबाळी लूगाया म मरीयम मगदलिनी, योअन्ना अर याकूब की माँ मरीयम अर ओर बी ही जखी बा चेलानै जखा भेजेड़ा चेला खुवाता हा अ बाता बतारी ही।

¹¹पण बाकी बाता बानै फांप लागी अर बे बाकी बाता प भरोसो कोनी कर्या।

¹²पण पतरस आ सुणर भाग्यो जखो कबर प जार थम्यो अर बो झुकर देख्यो जणा बठै गाबा क अलावा क्युंई कोनी हो। जणा बो जोक्यु बठै देख्यो बिपै ताजूब करतो घरा चलेगो।

¹³बि दिनई बिका चेला मऊँ दो जणा यरूसलेमऊँ करीब सात कोस परै इमाउस गाँव जार्या हा।

¹⁴अर बे जोक्यु होयो हो बिपै चालता-चालता आपसरी म बतळार्या हा।

¹⁵अर जद बे बतळार्या हा जणा ईसु बाकै कनै आर बाकै सागै होलिओ।

¹⁶पण बे बिनै देखर बी कोनी पिछाण सक्या।

¹⁷ईसु बाऊँ बुज्यो, “थे चालता-चालता आपसरी म काँई बतळार्या हो?” जणा बे दुखी होर बठैई खड़्या होगा।

¹⁸बामैऊँ किल्युपास नाम को एक आदमी हो बो बोल्यो, “तू एकलोई अंय्यां को आबाळो जाबाळो मिनख ह जिनै गेलड़ा दिना म यरूसलेम म जोक्यु घट्यो बिकै बारां म कोनी बेरो?”

¹⁹जणा ईसु बोल्यो, “अंय्यां को काँई होगो?” जणा बे बिनै बताबा लाग्या क, “अ बाता ईसु नासरी क बारां म ह जखो सगळा मिनखा अर परमेसर की नजर्या म खेबा अर करबा म सक्‍तिसाली अर परमेसर की खेबाळो हो।

²⁰बिनै म्हारा यहूदि नेता अर परधान याजक पकड़ा'र बिनै मोत की सजा दिवा दिआ अर बिनै सुळी प चढा दिओ गयो।

²¹अर म्हें इ बात की आस लगाया बेठ्या हा, की ओई इजरायलनै छुटाबाळो मिनख ह, आ बातानै होया निमड़्या आज तीसरो दिन ह।

²²अर म्हारी टोळी की लूगाया म्हानै ताजूब म गेर दिनी। होयो अंय्यां की आज भागपाट्याई बे कबर प गई।

²³अर बानै बठै बिकी लास कोनी मिली। बे पाछी आर म्हानै आ बोली क म्हानै ईस्बर नगरी दुता को दरसाव होयो ह जखो म्हानै आ बताई की बो तो जीवै ह।

²⁴जणा म्हारै मऊँ क्युंक कबर प गया पण जंय्यां लूगाया बताई ही बठै ठिक बंय्यांई हो, अर बिको क्युंई अतो-पतो कोनी हो।”

²⁵जणा ईसु बानै बोल्यो, “थे कंय्यां का बादु अर परमेसर की खेबाळा की बाता प बिस्वास करबा म ढिला हो।

²⁶काँई मसी ताँई ओ जरूरी कोनी हो क बो आ दुख-तकलिफानै भोगै अर आपकी मेमा धारण करै?”

²⁷अर बो बानै मूसाऊँ लेर सगळा परमेसर की खेबाळा की बे बाता खोलर बताई जखी पबितर सास्तर म बिकै बारां म मंडरी ह।

²⁸जद बे बि गाँव क सांकड़ा पुग्या जठै बे जावै हा। जणा ईसु क्युं अंय्यां को बरताव कर्यो जंय्यां बिनै आगै जाणो होवै।

²⁹पण बे बिनै जिदा-जादि कर आ खेर डाट लिआ की, “इब दिन आथगो ह।” जणा बो मांयनै गयो अर बाकन डटगो।

³⁰अर जद रोटी खाबा बो बाकै सागै चोकी प बेठ्यो जणा रोटी उठार परमेसर को धनेवाद कर्यो अर रोटी तोड़र बानै दिनी।

³¹बि घड़ीई बा सगळा की आँख्या खुलगी अर बे बिनै पिछाण्गा। पण बो बाकै सामैऊँ गायब होगो।

³²जणा बे आपसरी म बतळाबा लागगा, “बो गेला म जद आपणाऊँ बातचित कर्यो हो। अर आपानै सास्तर की बाता समजार्यो हो। बि टेम आपणा मन म जोस पैदा कोनी होर्यो हो के?”

³³जदकी जदई बे खड़्या होर यरूसलेम रवाना होगा। अर बठै बानै बे ग्यारा चेला अर बाकी का एक सागै भेळा होयड़ा मिल्या।

³⁴बे बोलर्या हा, “परबु सचमई जीगो क्युं क समोन बिनै जीवतानै देख्यो ह।”

³⁵जणा बे दोन्यु जणा जोक्यु बाकै सागै गेला म होयो बानै बतायो अर आ बी बता दिनी की बे कंय्यां बिनै रोटी तोड़ता टेम पिछाण्या।

³⁶हाल बे आ बाता क बारां म बतळार्याई हा क ईसु खुद बाकै मांय आर खड़्यो होगो अर बाऊँ बोल्यो, “थानै स्यांती मिलै।”

³⁷पण बे बुरी ढाळ डरग्या जंय्यां कोई भूत देख लिओ होवै।

³⁸जणा बो बानै बोल्यो, “थे क्याले चित उठा राख्या हो? अर थारा मना म ओ भेम कठैऊँ आग्यो?

³⁹मेरै हात लगार मेरा हात पगानै देखो। क्युं क भूत म हाड-मास कोनी होवै जंय्यां थे मेर म देखर्या हो।”

⁴⁰अंय्यां बोलर बो बानै आपका हात-पग दिखाया।

⁴¹पण बे खुसी अर ताजूब क मार्या हाल ताँई बिपै बिस्वास कोनी कर सक्या, जणा बो बानै बुज्यो, “थारै कनै खाबा ताँई क्युं ह के?”

⁴²बे बिनै भुंदेड़ी मछी को टुक दिओ।

⁴³बो बिनै लेर बाकै सामै खायो।

⁴⁴अर बाऊँ बोल्यो, “अ बे बाता हीं जखी म जनाड़ै बोली ही जद म थारै सागै हो। अ सगळी बात जखी मूसा का नेम-कायदा म, परमेसर की खेबाळा अर भजना की पोथी म मंडरी ह सगळी पूरी होणीई ही।”

⁴⁵अर बो पबितर सास्तरनै समजाबा ताँई बाकी बुदी का पाट खोल दिआ।

⁴⁶अर बो बानै बोल्यो, “अ बेई बाता हीं जखी पबितर सास्तर म मंडेड़ी ह की, ‘मसी दुख भोगसी अर मर्या पाछै तीसरै दिन ओज्यु जी उठसी।’

⁴⁷अर बिका नामऊँ पाप की माफी ताँई मन फेरबा का चोखा समचार को यरूसलेमऊँ लेर धरती का सगळा कूणबा म परचार कर्यो जासी।

⁴⁸थे आ बाता का गुवा हो।

⁴⁹अर जिको करार मेरो परम-पिता मेरूँ कर्यो ह बा पबितर आत्मा म थारै ताँई भेजस्युं। पण थे बि दिन ताँई इ नगरी मई टिक्या रेहज्यो जद ताँई थानै पबितर आत्माऊँ सक्‍ति कोनी मिलज्या।”

⁵⁰जणा बो बानै बेतनिया गाँव ताँई बारनै लेगो। अर बो बानै हात बढार आसिरबाद दिओ।

⁵¹अर बानै आसिरबाद देतानैई नाकै कर ईस्बर नगरी म उठा लिओ गयो।

⁵²जणा बे बिकी भगती करी अर राजी-खुसी यरूसलेम बावड़्याया।

⁵³अर बे मनदर म परमेसर को गुणगान करता आपको टेम काटबा लागगा।