Read Shekhawati लूका 5 Bible Online

लूका 5 - Shekhawati bible

लूका 5

¹एकर ईसु गनेसरत[4] झिल क किनारै खड़्यो हो, अर परमेसर को बचन सुणबा ताँई भीड़ बिनै च्यारूमेरूँ ढक राख्यो हो,

²जणा बो दो न्याव देखी जामै मछवारा निकळर आपका जाळ साप करर्या हा।

³बा न्यावा मऊँ समोन हाळी न्याव प चढर बो न्यावनै किनाराऊँ क्युंक थोड़ी घणी हटाबा ताँई खयो। अर पाछै बि खड़ी न्याव प बेठर बो जनतानै सीखाबा लाग्यो।

⁴सीखाबा क पाछै बो समोनऊँ बोल्यो, “इ न्यावनै गेरा पाणी म लेचाल अर मछी पकड़बा ताँई थारा जाळ गेरो।”

⁵समोन बोल्यो, “मालिक म्हें सारी रात जाळ गेर-गेर दुखी होलिआ अर क्युंई हात कोनी लाग्यो पण थे खेर्या हो जणा एक बर ओर जाळ गेर देस्युँ।”

⁶अर जद बे जाळ गेर्यो जणा बिमै घणीसारी मछ्या फसगी अर जाळ पाटबा लागगो।

⁷जणा बे दुसरी न्याव प सवार आपका सात्यानै इसारो कर मदद ताँई बुलाया अर बे दोन्यु न्यावानै अत्ती ठाडी भरली क न्याव डूबबा लागगी।

⁸आ देखर समोन पतरस ईसु क पगा म पड़गो अर बोल्यो, “परबु म पापी हूँ मेरूँ दूर रेह्ओ।”

⁹इकी आ बजे ही क बो अर बिकै सागैहाळा अत्ती मछ्या पकड़ी जणा बानै ताजूब होयो हो।

¹⁰अंय्यांई जब्दि का बेटा याकूब अर यहून्नानै बी ताजूब होयो जखा समोन का साती हा। इपै ईसु समोनऊँ कह्या, “डरै मना, इबऊँ तू परमेसर का राज म मिनखानै ल्याबाळो बणसी।”

¹¹अर बे न्यावनै पाणी क बारनै किनारा प लिआया, अर सक्यु छोड-छाडर ईसु क गेल होलिआ।

¹²जद ईसु एक नगरी म हो, जणा बठै एक आदमी हो जिकै कोढ होर्यो हो, अर बो ईसुनै देखताई बिकै पगा म पड़गो अर हात जो'ड़र खेबा लाग्यो, “म्हराज, ज थे चाओ तो मेरो कोढ धो सको हो।”

¹³जणा ईसु बिपै हात धर बिऊँ खयो, “म चाऊँ हूँ क तेरो कोढ धुपज्या।” अत्तो खेताई बिको कोढ धुपगो।

¹⁴जणा ईसु बिनै हुकम दिओ, “तू आ बात कोईनैई मना खिजे पण तू याजकनै दिखार मूसा का हुकम गेल जखो चढावो चढाबा ताँई बता राख्यो ह बो चढा जिऊँ लोगानै तेरै कोढ धुपबा को सबूत मिल सकै।”

¹⁵पण ईसु की चरचा दिन दुणी अर रात चोगुणी फेलती जारी ही अर लोगा की भीड़ की भीड़ बिनै सुणबा अर रोगाऊँ निरोगा होबा ताँई भेळी होरी ही।

¹⁶पण ईसु उजाड़ म एकलो जार अरदास करतो हो।

¹⁷एक बर जद ईसु सीख देर्यो हो जणा बठै गलिल, यहूदिआ, अर यरूसलेम का सगळा नगर्याऊँ आएड़ा फरिसी अर धरम की सीख देबाळा बठै बेठ्या हा। अर रोगलानै निरोगा करबा ताँई परबु परमेसर की सक्‍ति बिकै सागै ही।

¹⁸बि टेम च्यार-पाचेक जणा एक भाळ भेयड़ा मिनखनै खाटली म घालर ल्याया अर बे बिनै ईसु कनै मांयनै लेज्याबा की ताक म हा।

¹⁹अर बठै भीड़ अत्ती जोरकी ही क बे मांयनै कोनी बड़ सक्या जणा बे छात प जार खपर्यो हटार खाटली समेतई बिनै ईसु क सामै निचै उतार दिओ।

²⁰बाका बिस्वासनै देखर बो बिऊँ खयो, “भाईड़ा तेरा पाप धुपगा।”

²¹जणा सास्तरी अर फरिसी आपसरी म बुजबा लाग्या क, “ओ पाप धोबाळो कूण होवै ह पाप तो परमेसरई धो सकै ह जणा ओ क्युं परमेसर की बुराई करै ह।”

²²ईसु बाकी मना की बात जाणगो अर खयो, “थे अंय्यां थारै मना म क्युंर-क्युं क्याले सोचो हो।

²³सोरो काँई ह? ओ खेबो क, ‘तेरा पाप धुपगा’ नहिस, ‘खड़्यो हो अर डोल फिर।’

²⁴पण इ ताँई क थे जाणल्यो क मिनख का बेटानै धरती प पाप धोबा को बी हक मिलेड़ो ह। अर म तेरूँ बोलुँ हूँ खड़्यो हो अर तेरी गुद्ड़ी लेर तेरै घरा चल्योजा।”

²⁵आ खेताई बो खट उठ्यो अर आपकी खाटली जिमै बो पड़्यो हो बा उठार आपकै घरा परमेसर को गुणगान गातो चलेगो।

²⁶आ देखर सगळा धोळा होगा अर परमेसर की जे-जैकार करबा लागगा। अर डरता-डरता बोल्या, “आज तो म्हें अनोरीई बात देखी ह।”

²⁷इकै पाछै ईसु बठैऊँ बारनै गयो अर चुंगी चोकी प लेवी नाम का चुंगी लेबाळानै बेठ्यो देखर बिनै खयो, “मेरै गेल होले।”

²⁸अर बो खड़्यो होर सक्यु छोड-छाडर बिकै गेल होलिओ।

²⁹इपै लेवी ईसु क सनमान म एक दावत दि अर बि दावत म चुंगी लेबाळा अर दुसरा मिनखा की चोखी भीड़ होरी ही। जखा बिकै सागै रोटी खाबा बेठ्या हा।

³⁰इ बात प फरिसी अर सास्तरी बिका चेलानै ओळमो दिआ क, “थे चुंगी लेबाळा अर पापी मिनखा क सागै खाई-पी क्युं करो हो?”

³¹इका जुबाब म ईसु बाऊँ बोल्यो, “निरोगा मिनखानै बेद की जुर्त कोनी होवै। रोगलानैई बेद की जुर्त पड़ै ह।

³²म धरमी मिनखा का मनानै नइ पण पाप्या का मनानै पापऊँ हटार परमेसर म लगाबानै आयो हूँ।”

³³क्युंक मिनख बिऊँ खया, “यहून्ना अर फरिसीया का चेला तो बरत राखीं अर अरदास करीं, पण तेरा चेला तो सूल खावीं पीवीं हीं।”

³⁴ईसु बाऊँ खयो, “बिंद क होतासोता थे बरात्यानै भूखा राख सको हो के?

³⁵पण बे दिन बी आसी जद बनड़ो बाऊँ न्यारो कर्यो ज्यासी अर बि टेम बे बरत करसी।”

³⁶बो बानै एकोर बात बोली क, “कोईनै बी पुराणा गाबा प नया गाबा मऊँ कातर का'टर कारी लगाता देख्या हा के? अर अंय्यां कर बी दे जणा नयो गाबो तो पाटै जखो पाटै बा नई कारी पुराणीया गाबा प चोखी बी कोनी लागै।

³⁷अर नइ ताजा अँगूरी पुराणी बखाल म भरीं अर अंय्यां करदे जणा ताजा अँगूरी उठर बखालनै पा'ड़र ढूळज्या अर बखाल को बी नुकसान करदे।

³⁸जणाई तो लोग ताजा अँगूरीनै नई बखाल म भरीं हीं।

³⁹अर पुराणी अँगूरी पीर कोई मिनख नई कोनी माँगै क्युं क बिनै बिमै घणो सुवाद आवै इ ताँई बो बोलै हनै, पुराणीई चोखी ह।”