Read Shekhawati लूका 9 Bible Online

लूका 9 - Shekhawati bible

लूका 9

¹ईसु आपका बारा चेलानै एक सागै बुलार, बानै ओपरी बलायानै काडबा अर रोगलानै निरोगा करबा की सक्‍ति अर अधिकार दिओ।

²इकै पाछै बो बानै परमेसर का राज को हेलो पाड़बा अर रोगलानै निरोगो करबा को अधिकार देर बारनै भेज्या।

³अर बो बानै खयो, “गेला ताँई थारी जुर्त को क्युंई समान मना ल्यो नइ तो लाठी नइ झोळो, नइ रोटी-टुक, नइ रिपीआ अर नइ पेरबा ताँई न्यारा कुर्ता।

⁴थानै जि घर म आदरमानऊँ बुलायो जावै, जणा थे बि घर मई रेहज्यो जद ताँई की थे बा नगरी नइ छोड द्‍यो।

⁵अर जि जठै थारी सुणाई कोनी होवैक जणा बठै का मिनखानै चेताबा ताँई थारा पगा की धूळ झाड़ दिज्यो।”

⁶जणा बे बठैऊँ बिदा लेर गाँव-गाँव जार परमेसर को चोखो समचार सुणाया अर मिनखानै निरोगा कर्या।

⁷अर जोक्यु होर्यो हो बि बात की भणक जद गलिल का राजपाल हेरोदनै लागी जणा बो घबरागो क्युं क क्युंक खेर्या हा क “यहून्ना मरेड़ाऊँ ओज्यु जिंदो होगो।”

⁸अर क्युंक खेर्या हा क, “एलिआ धरती प उतर्यो ह।” क्युंक खेर्या हा क, “परमेसर की खेबाळा पुराणीया मऊँ कोई जिंदो होयो ह।”

⁹पण हेरोद बोल्यो, “यहून्ना को सीर तो म खुद कटवा दिओ हो। इब ओ कूण आगो जिका बारां म, म अ बाता सुणर्यो हूँ?” जणा हेरोद बिऊँ मिलबा की कोसिस करी।

¹⁰जणा पाछै ईसु कनै आर बे भेजेड़ा चेला जोक्यु बे कर्या बिकी जाणकारी बिनै दि। जणा बो बानै आपकै सागै लिओ अर बे चुपचाला बेतसदा नाम की नगरी म गया।

¹¹पण इ बात को बेरो लोगानै पड़गो अर भीड़ की भीड़ बिकै गेल-गेल होली। बो राजी-राजी बाऊँ मिल्यो अर बानै परमेसर का राज क बारां म बतायो अर जखा रोगला हा बानै निरोगो कर्यो।

¹²जद दिन आथबा लाग्योक जणा बे बारा का बारा बिकन आर बोल्या, “इ भीड़नै इब बिदा कर जिऊँ अ आसपड़ोस का गाँव अर ढाण्यां म जार आपका खाबा-पीबा अर आसरा को जोगाड़ करीं क्युं क आपा इ उजाड़ म पड़्या हां।”

¹³बो बोल्यो, “थेई आनै खाबा ताँई क्युं द्‍यो।” जणा जुबाब म चेला बोल्या, “आपणै कनै तो बस पाच रोटी अर दो मछी ह पण आ तो हो सकै क, म्हें जावां अर आ सगळा ताँई रोटी मोल ल्यावां।”

¹⁴बठै लगभग पाच झार तो मोट्यार-मोट्यारई हा। जणा ईसु चेलानै ओडाया, “आनै पचास-पचास की पंगत म बिठा द्‍यो।”

¹⁵बे बंय्यांई कर्या जंय्यां बाऊँ खयो गयो। बे सगळानै पंगत म बिठा दिआ।

¹⁶जणा ईसु बा पाच रोट्या अर दो मछ्यानै लेर उपर देखर परमेसर को धनेवाद कर्यो अर बाका टुकड़ा कर-कर चेलानै देतो गयो क बे लोगानै जिमावै।

¹⁷अर जद सगळा खार धापगा जणा बचेड़ा रोट्या का टुकड़ाऊँ चेला बारा चोल्या भर्या।

¹⁸एक बार ईसु एकलो अरदास करर्यो हो बि टेम बिका चेला बिकन आया, जणा ईसु बाऊँ बुज्यो, “म कूण हूँ, इ बारां म लोग काँई खेवै ह?”

¹⁹बे खया, “घणकराक तो तनै बतिस्मो देबाळो यहून्ना खेवै। पण क्युंक बोलीं तू एलिआ ह। अर क्युंक तो तनै पुराणा जमाना को परमेसर की खेबाळो समजीं हीं जखो जिंदो होर आगो।”

²⁰बो बाऊँ बोल्यो, “इब आ बताओ थे मेरै बारां म काँई समजो हो क, म कूण हूँ?” जणा पतरस खयो, “तू परमेसर कानिऊँ भेजेड़ो मसी ह।”

²¹ईसु बा सगळानै सूल चेतार हुकम दिओ, “इकै बारां म कोईनैई मना खिज्यो।”

²²ईसु आपका चेलानै खियो, “आ तो होणी ह क मिनख को बेटो बोळा दुख उठासी। अर यहूदि नेता, परधान याजक अर सास्तरानै सीखाबाळा बिनै तजसी अर जिकै पाछै बो मार्यो जासी। पण बो तीसरा दिन मरेड़ा मऊँ जिज्यासी।”

²³बो बा सगळाऊँ खयो, “ज कोई मेरै गेल आबो चावै ह बो खुदनै तज'र, आपकी सुळी उठार मेरै गेल होले।

²⁴इऊँ ओ होसी क जखो बी आपका पिराण बचाबो चावै बो बाकी हानी उठासी। अर जखो बी मेरै ताँई आपका पिराण तजसी बो बिनै बचासी।

²⁵ज आदमी सगळी दुनियानै जीत ले अर आत्मानै खोदे नहिस बिकी हानी उठावै जणा बिनै काँई फाईदो?

²⁶जखो बी, मिनखा क सामै मनै अर मेरा बचनानै मानबाऊँ सरम करसी, जणा मिनख को बेटो बी बाऊँ नातो राखबो आपकी बेजती मानसी जद बो पबितर ईस्बर नगरी दुता, आपका परम-पिता अर खुदकी मेमा म आसी।

²⁷म थानै सची खेऊँ हूँ, अठै खड़्या मिनखा मऊँ कई-कई तो अंय्यां का ह की बे जद ताँई परमेसर का राजनै कोनी देखले जद ताँई बानै मोत कोनी आवै।”

²⁸आ बाता क सपता भर पाछै ईसु पतरस याकूब अर यहून्नानै सागै लेर डूँगर प अरदास करबा गयो।

²⁹अर जद बो अरदास करर्यो हो जणा बिकी सकल बदलगी अर बिका गाबा भळका मारता धोळा धप होगा।

³⁰अर बठै दो जणा परमेसर का परताब क सागै परगट होया जिमैऊँ एक मूसा अर दुसरो एलिआ हो। बे ईसु की मोत क बारां म ईसुऊँ बतळार्या हा जिनै बो परमेसर की मरजी यरूसलेम म पूरी करबाळो हो।

³¹

³²पतरस अर बिकाळा साती निन्दा म हा जद बे सूल चेतो कर्यो जणा बे बिकी मेमा का तेज अर बा दो जणानै जखा बिकै सागै खड़्या हा देख्या।

³³अर जंय्यांई बे बिऊँ बिदा ले हाक, जणा बि टेम पतरस बिऊँ बोल्यो, “म्हराज कतो चोखो ह क म्हें अठै हां! म्हानै तीन पंडाळ बणाबा दे, एक थारै ताँई, एक मूसा ताँई, एक एलिआ ताँई।” बो सचमई कोनी जाणतो हो क बो काँई बोलर्यो हो।

³⁴बो हाल ताँई खेर्योई हो क अत्ता मई एक बादळी आई अर बा सगळानै ढकली जिऊँ चेला डरग्या।

³⁵बि टेम हात्युहात बादळा मऊँ हेलो आयो, “ओ मेरो बेटो ह जिनै म टाळ्यो हूँ थे इकी सुणो।”

³⁶ओ हेलो होबा क पाछै बानै ईसु क सिवाय बठै कोई कोनी दिख्यो। अर बे अ बात आप ताँई राखी। अर जोक्यु बे देख्या बिको जिकर बा दिना म बे खिनई कोनी कर्या।

³⁷आगलै दिन जद ईसु अर बिका तीन चेला डूँगरीऊँ तळै उतर्या जणा बानै मिनखा को रेळो अगाऊ लाध्यो।

³⁸बि रेळा मऊँ एक जणो कू'कर बोल्यो, “गरूजी म थारूँ हात जोड़ खेऊँ हूँ मेरा छोरा की तिथ ल्यो। मेरै तो बो एकई ह।

³⁹बिमै क्युं रळेड़ो ह अर बो आपको असर दिखावै जणा मेरो छोरो बूताऊँ बारनै होज्यावै, अर मुंडा होर झाग बगावै, बिनै बुर्या तरोड़ै-मरोडै़ अर छोरानै छोडबा को नामई कोनी ले अर बिनै दिन घालरी ह।

⁴⁰म थाकाळा चेलाऊँ अरदास करी क बिमैऊँ बिनै काड दे पण बाऊँ तो पार कोनी पड़ी।”

⁴¹जणा ईसु बोल्यो, “अरै भेम करबाळो अर कुटिचर मिनखो, म कद ताँई थारै सागै रेहस्युं अर थानै भोगस्युं? जा अर तेरा छोरानै अठै ल्या।”

⁴²जद बो छोरो आर्यो हो जणा बिच मई बा सूगली ओपरी बलाय बिनै रोड़ली अर मरोड़ी देर जमीन प दे मारी। जणा ईसु जोरऊँ बि बलायनै दकालर बि छोरा मऊँ बिनै काड दि। अर छोरानै राजी-खुसी बिका बापनै समळा दिओ।

⁴³बे सगळा परमेसर का इ बडा कामऊँ ताजूब म पड़गा। अर जद मिनख ईसु का करेड़ा सगळा कामा प ताजूब करर्या हा, बि टेमई ईसु आपका चेलाऊँ बोल्यो,

⁴⁴“थे इ बात प कान लगाओ क मिनख को बेटो मिनखा क हाता म सूप्यो जासी।”

⁴⁵पण अ बाता बाकै पलै कोनी पड़ी। अर अ बाता बाऊँ लुखायड़ी ही जणा बे कोनी जाण सक्या। अर बे आ बातानै बुजबाऊँ डरता हा।

⁴⁶एक बर अंय्यां होई क, ईसु का चेला आपसरी म इ बात प जिदबा लागगा क, आपणा म सऊँ बडो कूण?

⁴⁷पण ईसु बाका मना का बिचार जाणतो हो जणा बो एक टाबरियानै लेर आपकै कनै खड़्यो कर्यो,

⁴⁸अर बाऊँ बोल्यो, “जखो कोई मेरै ताँई इ टाबरिया को मान करै बो मेरो बी मान करै। अर जखा मेरो मान करीं बे मनै भेजबाळा परमेसर को बी मान करीं हीं। इ बजेऊँ जखो थार मऊँ सऊँ छोटो ह बोई सऊँ बडो ह।”

⁴⁹जणा यहून्ना बोल्यो, “ओ म्हराज, म्हें एक आदमीनै देख्या जखो तेरा नामऊँ ओपरी बलाय काडर्यो हो, अर म्हें बिनै अंय्यां करबा ताँई नट्या क्युं क बो आपणै मालो कोनी हो।”

⁵⁰ईसु बोल्यो, “बिनै मना रोको क्युं क जखो थारै सामै कोनी बो थारै कानि ह।”

⁵¹जद ईसु का ईस्बर नगरी म उठाया जाबा का दिन सांकड़ै हा जणा बो यरूसलेम जाबा ताँई आपका हियानै पक्को कर लिओ।

⁵²अर बो आपकै अगाऊ दुत भेज्या जखा रेह्बा खाबा को सलिको देखबा सामरीया का एक गाँव म गया।

⁵³पण सामरीया का मिनख बठै बानै बड़बा कोनी दिआ क्युं क बो यरूसलेम जार्यो हो। [6]

⁵⁴आ देखर बिकाळा चेला याकूब अर यहून्ना बिऊँ बोल्यो, “थे बोलो तो म्हें हुकम करां क अकासऊँ आग बरसै अर आनै बाळ गेरै।”

⁵⁵पण बो पाछो मुड़र बानै दकाल्यो [7]

⁵⁶जणा पाछै ईसु अर बिकाळा चेला दुसरा गाँव चलेग्या।

⁵⁷जद बे गेला म जार्या हा, जणा एक मिनख ईसुऊँ बोल्यो, “थे जठै बी जास्यो म बी थारै गेल जास्युं।”

⁵⁸ईसु बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।”

⁵⁹बो दुसरा मिनखनै बोल्यो, “मेरै गेल होले।” जणा बो मिनख बोल्यो, “ओ म्हराज मनै पेली जाबा दे की म मेरा बापनै गाड्याऊँ।”

⁶⁰जणा ईसु बोल्यो, “मरेड़ा मिनखानै बाका मरेड़ानै गाडबा दे। पण तू जा अर परमेसर का राज को हेलो पाड़।”

⁶¹एक जणो ओर बोल्यो, “ओ परबु म तेरै गेल चल्यो चालस्युं पण पेली मनै मेरा घरकाऊँ बिदा लेबा दे।”

⁶²जणा ईसु बोल्यो, “जखो मिनख आपको हात हळ प धर'र गेलनै देखै बो परमेसर का राज जोगो कोनी।”