Read Shekhawati यहून्ना 11 Bible Online

यहून्ना 11 - Shekhawati bible

यहून्ना 11

¹बेतनिया नगरी म लाजर नाम को एक रोगलो मिनख आपकी भाणा मारथा अर मरीयम क सागै रिह्या करतो हो।

²मरीयम बिमार लाजर की भाण ही, जखी परबु ईसु को ईतर उंदकार अभिसेक करी अर बिका पगानै आपका बाळाऊँ पुछी ही।

³अ भाणा ईसुनै समचार पुगायो क, “परबु, थारो पक्को भाईलो बिमार ह।”

⁴जद ईसु इकै बारां म सुण्यो जणा बोल्यो, “आ बिमारी लाजर की मोत ताँई कोनी ह, पण आ परमेसर की मेमा ताँई ह, जिऊँ क बिका बेटा की मेमा हो।”

⁵ईसु, मारथा बिकी भाण मरीयम अर लाजरऊँ प्यार-परेम राखतो हो।

⁶ईसुनै लाजर की बिमारी का समचार लाग्या पाछै बी, जठै बो हो बठै दो दिन ओर रिह्यो।

⁷इकै पाछै बो आपका चेलाऊँ बोल्यो, “आयो ल्यो आपा पाछा यहूदिआ चालां।”

⁸चेला बोल्या, “गरूजी, क्युंक दिना पेली यहूदि थार प भाठा बगाबो चावै हा, अर थे बठै ओज्यु जाबा की करो हो।”

⁹ईसु बोल्यो, “दिन म बारा घंटा च्यानणा का होवै ह। जणा जखा दिन का च्यानणा म चाली हीं बे आखड़'र कोनी पड़ै, क्युं क बानै दिन का च्यानणा म सक्यु सुजै ह।

¹⁰पण ज बे अँधेरा म चालीं जणा आखड़'र पड़ै, क्युं क अँधेरा म सुजै कोनी।”

¹¹अंय्यां खेर बो बाऊँ बोल्यो, “आपणो भाईलो लाजर निंद लेर्यो ह, पण म जार बिनै जगास्युं।”

¹²चेला जुबाब म बोल्या, “परबु ज बो सोवै ह, जणा बो तावळोई निरोगो होज्यासी।”

¹³ईसु क खेबा को मतबल हो क लाजर मरगो, पण चेला समज्या लाजर सुत्यो ह।

¹⁴जणा ईसु बाऊँ साप-साप बोल्यो, “लाजर मरगो।

¹⁵थारै कारण म राजी हूँ क म बठै कोनी हो, क्युं क इब थारो बिस्वास ओर बी बढ ज्यासी। आओ ल्यो आपा बिकन चालां।”

¹⁶थोमा जिनै जोड़लो खेता हा। बो आपकै सागैहाळा चेलाऊँ बोल्यो, “ल्यो आपा बी गरूजी क सागै मरबा चालां।”

¹⁷ईसु क बठै पुगबा क च्यार दिन पेल्याई लाजर की लासनै गुफा म धर दिआ हा।

¹⁸बेतनिया नगरी यरूसलेमऊँ करीब कोसेक दूर ही।

¹⁹अर बोळा यहूदि मिनख मारथा अर मरीयमनै बाका भाई की मोत प तसली देबा आया हा।

²⁰जद मारथा आ सुणी की ईसु आर्यो ह जणा बा बिऊँ मिलबानै बारनै गई, पण मरीयम घराई रेह्गी।

²¹मारथा ईसुऊँ बोली, “परबु ज थे अठै होता जणा मेरो भाई कोनी मरतो!

²²पण म जाणू हूँ क, इब बी थे जोक्यु बी परमेसरऊँ माँगस्यो बो थानै देसी।”

²³ईसु बिऊँ बोल्यो, “तेरो भाई, जी ज्यासी।”

²⁴इपै बा बोली, “हां म जाणू हूँ, आखरी दिन बो ओज्यु जी ज्यासी।”

²⁵ईसु बिऊँ बोल्यो, “म जीवन हूँ अर मर्या पाछै ओज्यु जी उठबो मेरै मई ह। जखा बी मेर प बिस्वास करसी, बे मर्या पाछै बी ओज्यु जी ज्यासी।

²⁶अर जखा मेर म जिवीं अर बिस्वास करी हीं बे कदैई कोनी मरसी। के तू इ बात प बिस्वास करै ह?”

²⁷बा बोली, “हाँ परबु, म बिस्वास करूं हूँ क, तू परमेसर को बेटो मसी ह जखो इ जगत म आबाळो हो।”

²⁸आ बोलर मारथा आपकै घरा पाछी जार आपकी भाण मरीयमनै छानैसीक बुलार बोली, “गरूजी अठैई ह, अर बो तेरै बारां म बुजर्यो हो।”

²⁹आ सुणर मरीयम खड़ी होर तावळिसी बिऊँ मिलबा गई।

³⁰हाल ताँई ईसु नगरी म कोनी पुग्यो हो। बे बठैई हा जठै मारथा बिऊँ मिली ही।

³¹मरीयमनै तावळिसीक बारनै जाता देखर बे मिनख जखा तसली देबा मरीयम क सागै घरा हा, बे आ सोचर क आ कबर प रोबा जारी ह बिकै गेल होलिआ।

³²मरीयम जठै ईसु हो बठै पुगर बिनै देखताई बिकै पगा म पड़र कही, “परबु, ज थे अठै होता जणा मेरो भाई कोनी मरतो!”

³³मरीयम अर बिकै सागैहाळा को रोज देखर ईसु को काळज्यो पसीजगो अर बिकी अन्तर-आत्मा दुखी होई।

³⁴ईसु बाऊँ बुज्यो, “बिकी लास कठै ह?” बे बोल्या, “परबु, आओ ल्यो चालर देखल्यो।”

³⁵ईसु की आँख्या म आसु आगा।

³⁶आ देखर बे मिनख बोल्या, “देखो ओ बिऊँ कतो प्यार करै ह!”

³⁷पण बामैऊँ क्युंक बोल्या, “ओ कयानै आँख्या दि जणा के ओ लाजरनै मरबाऊँ कोनी बचा सकै हो?”

³⁸ओज्यु ईसु बोळो दुखी होयो अर कबर प गयो। बा एक गुफा ही अर बिका मुंडा प भाठो धरेड़ो हो।

³⁹ईसु बोल्यो, “भाठो हटाओ!” मरेड़ा लाजर की भाण मारथा बोली, “परबु इमैऊँ बोळी बुरी बाँस आसी, क्युं क इनै मर्या च्यार दिन होगा!”

⁴⁰ईसु बिऊँ बोल्यो, “के म तेरूँ कोनी बोल्यो हो, ज तू बिस्वास करै जणा परमेसर की मेमा देखसी?”

⁴¹बे भाठानै हटायो, अर ईसु उपरनै देखर बोल्यो, “परम-पिता थारी जे हो, जखो थे मेरी सुणो हो।

⁴²म जाणू क थे सदाई मेरी सुणो हो। पण आ बात म अठै खड़्या मिनखा की बजेऊँ बोल्यो जिऊँ अ बिस्वास करै क थे मनै भेज्या हो।”

⁴³आ बोलर बो जोरऊँ हेलो दिओ, “लाजर, बारनै आ!”

⁴⁴जणा बो कफन म लिपटेड़ोई बारनै निकळ्यायो, अर बिको मुंडो गाबाऊँ ढकर्यो हो। ईसु बोल्यो, “इनै खोलो जिऊँ ओ चाल सकै।”

⁴⁵जखा यहूदि मरीयमनै तसली देबा आया हा, बा मिनखा म बोळाजणा ईसु का इ कामनै देखर बिपै प बिस्वास कर्या।

⁴⁶पण बामैऊँ क्युंक फरिसीया क कनै जार, बानै ईसु का इ काम को समचार दिओ।

⁴⁷जणा फरिसी अर परधान याजक, सभा बुलाई अर बोल्या, “आपानै काँई करनो चाए? ओ मिनख तो बोळा चमत्कार करर्यो ह!

⁴⁸ज आपा अंय्यांई हात प हात धर्या बेठ्या रेहस्यां, जणा हरेक बिपै बिस्वास करबा लागसी। जणा रोमी सरकार हरकत म आज्यासी, अर आपणा मनदर अर यहूदि मिनखानै तबा कर देसी।”

⁴⁹बामैऊँ केफा नाम को, जखो बि बरस म्हायाजक हो बोल्यो, “अरै बावळो, थे क्युंई कोनी जाणो!

⁵⁰अर नइ इ बातनै समजो क, सगळा क बदला म एक को मरबो चोखो ह, जिऊँ यहूदि मिनख नास होबाऊँ बच जावै।”

⁵¹बो खुदऊँ आ बात कोनी बोली, पण इ ताँई बोली ही, क बो बि बरस म्हायाजक हो, अर बो अगाऊई खेदी क, ईसु यहूदि मिनखा ताँई मरसी।

⁵²अर खाली यहूदि मिनखा ताँई नइ पण तीनतेरा होईड़ा परमेसर का मिनखानै एक काया की जंय्यां एक सागै भेळा करबा ताँई बी मरसी।

⁵³अर बि दिनऊँई यहूदि नेता बिनै मारबा की तरकीब ढुंढबा लाग्या।

⁵⁴जि बजेऊँ यहूदिआ म ईसु चोड़ै-धाड़ै कोनी घूमतो हो। पण बो यहूदिआ इलाकानै छोडर एक अफरैम नाम की नगरी क कनै का उजाड़ क सारै बसेड़ी ढाणी म आपका चेला क सागै रिह्यो।

⁵⁵फसै को त्युंहार सांकड़ै हो। सगळा देसऊँ यहूदि मिनख यरूसलेम म त्युंहारऊँ पेली सुद करबा की सूण निभाबा जार्या हा।

⁵⁶बे मनदर का चोक म भेळा होर ईसुनै उडिकर्या हा। अर बे एक दुसराऊँ बोल्या, “काँई सोचो हो? बो त्युंहार म आसी क कोनी?”

⁵⁷परधान याजक अर फरिसी आदेस काड दिआ हीं क, ज कोई आ जाणै क ईसु कठै ह, जणा बिको समचार दे, जिऊँ बे बिनै पकड़ सकै।