Read Shekhawati यहून्ना 12 Bible Online

यहून्ना 12 - Shekhawati bible

यहून्ना 12

¹फसै का त्युंहार क छ दिन पेल्या ईसु बेतनिया नगरी म लाजर क घरा गयो, जिनै बो मोतऊँ जीलायो हो।

²बे बि ताँई रोटी बणाई, मारथा रोटी परोसरी ही। लाजर बी बाकै सागै बेठगो जखा ईसु क सागै रोटी खार्या हा।

³जणा मरीयम एक बरनी म खरो जटामासी को बणेड़ो मेंगो ईतर ल्याई अर बिनै ईसु क पगा प उंदका दिनी। अर आपका बाळाऊँ बानै पुछी। ईतर की बा बडिया सुगंद सगळा घर म फेलगी।

⁴यहूदा इस्करोती नाम को ईसु को एक चेलो जखो आगै चालर बिनै पकड़वायो हो बो बोल्यो,

⁵“ओ ईतर तीन सो चाँदी का सीक्का म बेच्यो जाणो चाए हो अर बे पिसा गरीबा म बाटबा चाए हा।”

⁶बो आ बात इ ताँई कोनी कही, क बिनै गरीबा की परवा ही, पण बो एक चोर हो। बो रिपीआळी थेली समाळतो हो अर बोळी बार बो बि मऊँ रिपीआ काड लेतो हो।

⁷पण ईसु बोल्यो, “इनै मना रोको। मनै गाडबा का दिन को सूण आ पेलीई कर दिनी ह।

⁸गरीब तो सदाई थारै सागै रेह्सी, पण म थारै सागै सदाई कोनी रेहस्युं।”

⁹जद मिनख सुण्या क ईसु बेतनिया नगरी म ह, जणा बे बठै इ बजेऊँई कोनी, क ईसु बठै ह पण बे लाजरनै बी देखबा गया जिनै ईसु मोतऊँ जीवायो हो।

¹⁰जणा परधान याजक लाजरनै बी मारबा की तरकीब रची।

¹¹क्युं क लाजर की बजेऊँ बोळा यहूदि मिनख बानै छोडर ईसु क गेल चालबा अर बिस्वास करबा लाग्या।

¹²दुसरा दिन बोळी भीड़ जखी फसै का त्युंहार ताँई आईड़ी ही सुणी क, ईसु यरूसलेम आर्यो ह।

¹³जणा बे खजूर का दरख्त की डाळ्यां लेर बिऊँ मिलबा गया, अर जोरऊँ बोलर्या हा, “परमेसर की जे हो!” “परबु का नामऊँ आबाळानै परमेसर आसिरबाद दे!” “इजरायल का राजानै परमेसर आसिरबाद दे!”

¹⁴ईसुनै एक गधो दिख्यो अर बो बिपै बेठगो, जंय्यां क पबितर सास्तर म मंडर्यो ह,

¹⁵“यरूसलेम का मिनखो! मना डरो; जवान गधेड़ा प सवार होर, थारो राजा आर्यो ह।”

¹⁶बि टेम बिका चेला बा बातानै कोनी समज सक्या, पण जद ईसु मेमा म उठायो गयो जणा बाकै याद आई क, पबितर सास्तर म बिकै बारां म मांड्यो गयो जणाई बे मिनख बिकै सागै अंय्यां कर्या हा।

¹⁷भीड़ मऊँ बे मिनख जखा ईसु क सागै बि टेम हा जद बो लाजरनै बोल्यो हो कबरऊँ बारनै आज्या अर बिनै मोतऊँ जीवा दिओ हो इ बात को समचार दुसरा मिनखानै दिआ।

¹⁸भीड़ की बिऊँ मिलबा की बजे आ ही क, बे सुण्या हा, क बो ओ चमत्कार कर्यो ह।

¹⁹फरिसी एक दुसराऊँ बोल्या, “थे देखो, आपा क्युंई कोनी कर सक्या! जगत का मिनख बिकै गेल होर्या हीं।”

²⁰क्युंक यूनानी बी बा मिनखा म हा जखा त्युंहार की टेम भगती करबा यरूसलेम गयड़ा हा।

²¹बे गलिल का बेतसदा का रेह्बाळा फलिपूस क कनै गया अर बोल्या, “साय, म्हें ईसुऊँ मिलबो चावां हां।”

²²फलिपूस अंदरिआस क कनै जार बिऊँ बोल्यो, अर बे दोन्यु ईसु कनै गया अर बिनै बोल्यो।

²³ईसु बाऊँ बोल्यो, “बा घड़ी आगी ह जद मिनख का बेटा की मेमा होवै।

²⁴म थारूँ सची बोलर्यो हूँ, ग्युं को दाणो जद ताँई माटी म नइ पड़ै अर नइ मरै, बो एकलोई रेह्‍वै ह। पण मर्या पाछै बो बोळो फळै ह।

²⁵जखा आपका जीवऊँ परेम करी हीं बे बिनै खोसी। अर जखा इ दुनिया म आपका जीवऊँ नफरत करी हीं, बे बिनै अजर-अमर जीवन ताँई राखसी।

²⁶जखो बी मेरी सेवा करबो चावै ह, बिनै मेरै गेल चालनो पड़सी जिऊँ क मेरा दास मेरै सागैई रेह्‍वै। जखो मेरी सेवा करसी, बानै मेरो परम-पिता मान देसी।

²⁷“मेरो जीव इब दुखी ह। मनै काँई बोलबो चाए? के म अंय्यां बोलुँ, ‘परम-पिता, थे मनै इ घड़ीऊँ बचाओ?’ नइ, पण इ घड़ी की पिड़ानै भोगबाई आयो हूँ।

²⁸परम-पिता, थारै नाम की मेमा होवै!” जणा ईस्बर नगरीऊँ एक उवाज आई, “म मेरी मेमा दिखादि अर ओज्यु दिखास्युं।”

²⁹बठै खड़ी भीड़ आ उवाज सुणी अर बामैऊँ क्युंक जणा अंय्यां बोल्या कोई बादळ गरज्यो दिखै , पण दुसरा बोल्या, “ईस्बर नगरी दुत इऊँ बतळायो दिखै!”

³⁰पण ईसु बाऊँ बोल्यो, “आ उवाज मेरै फाईदा की कोनी ह, पण थारा फाईदा की ह।

³¹ओ जगत का मिनखा ताँई न्याय को टेम ह, अर इब जगत का राजा सेतान को तक्‍तो पलट्यो जासी।

³²जद म उचो उठायो जास्युं जणा म सगळानै धरती पऊँ मेरै कानि खींच लेस्युं।”

³³अंय्यां बोलर बो बता दिओ, क बो कंय्यां की मोत मरबाळो ह।

³⁴भीड़ बोली, “म्हारो पबितर सास्तर बतावै ह क, मसी सदाई जिंदो रेह्सी। जणा थे कंय्यां बोल सको हो क मिनख को बेटो उचो उठायो जासी ?[5] ओ कूणसो मिनख को बेटो ह?”

³⁵ईसु बोल्यो, “क्युं क टेम ताँई थारै बिचमै च्यानणो होसी। जद ताँई थारै कनै च्यानणो ह, थारा गेला प चालता रेह्ओ जिऊँ अँधकार थारै कनै नइ आ सकै। जखो अँधकार म चालै ह बो कोनी जाणै क बो कठै जार्यो ह।

³⁶च्यानणा प बिस्वास करो, जद ताँई बो थारै कनै ह जिऊँ क थे च्यानणा का मिनख बणो।” आ बोलर ईसु चलेगो अर खुद बाऊँ लुखर रिह्यो।

³⁷बो बाकै सामै बोळा चमत्कार कर्यो इकै बावजुद बी बे बिपै बिस्वास कोनी कर्या।

³⁸जिऊँ यसाया परमेसर की खेबाळा का बोलेड़ा बचन पूरा हो सकै: “ओ परबु, म्हारा समचार प कूण बिस्वास कर्यो? अर परबु की ताकत किपै परगट होई?”

³⁹इ बजेऊँ बे बिस्वास कोनी कर सक्या। जंय्यां यसाया आ बी बोल्यो ह क,

⁴⁰“परमेसर बाकी आँख्यानै आँदी, अर बाका मनानै काठो कर दिओ, जिऊँ क बाकी आँख्या देख कोनी सकै, अर बाको मन समज कोनी सकै, कदै अंय्यां नइ होवै क बे खुदको मन मेर म लगावीं, अर म बानै निरोगो करूं।”

⁴¹यसाया अंय्यां इ ताँई बोल्यो हो, क्युं क बो ईसु की मेमा देख लिओ हो, अर बिकै बारां म बोल्यो।

⁴²बोळा यहूदि नेता बी ईसु प बिस्वास कर्या। पण फरिसीया की बजेऊँ बे चोड़ै म इपै बात कोनी करता हा। क्युं क बानै डर हो क बे बानै अरदास हाळी झघाऊँ बारनै काड देसी।

⁴³बे परमेसर की बजाय मिनखाऊँ बेत्ती मान चाता हा।

⁴⁴ईसु जोरकी उवाज म बोल्यो, “जखा बी मेर प बिस्वास करै ह, बे मेर पई नइ पण मनै भेजबाळा प बी बिस्वास करै ह।

⁴⁵जखा मनै देखी हीं बे मनैई नइ पण मनै भेजबाळानै बी देखै ह।

⁴⁶म जगत म च्यानणा की जंय्यां आयो, जिऊँ मेर प बिस्वास करबाळा अँधेरा म नइ पड़्या रेह्‍वै।

⁴⁷“जखा बी मिनख मेरा बचनानै सुणर बानै कोनी मानै, म बाको न्याय कोनी करूं। म इ जगत का मिनखा को न्याय करबानै कोनी आयो पण आनै बचाबानै आयो हूँ।

⁴⁸बे जखा मनै अर मेरा बचनानै कोनी मानी, बाको न्याय करबाळो एक ह, बोई बाको न्याय करसी। मेरा बोल जखा म बोल्यो हो, बेई बानै आखरी दिन दोसी बतासी!

⁴⁹ओ सच ह, क्युं क म मेरी मरजीऊँ क्युंई कोनी बोल्यो, पण मनै भेजबाळा परम-पिता का हुकमऊँ जखो मनै बोलबो चाए हो, बोई बोल्यो।

⁵⁰अर म जाणू हूँ क, बिको हुकम अजर-अमर जीवन कानि लेज्यावै। म बोई बोलुँ हूँ, जखो परम-पिता मनै बोलबा ताँई बोलै ह।”