Read Shekhawati यहून्ना 14 Bible Online

यहून्ना 14 - Shekhawati bible

यहून्ना 14

¹ईसु आपका चेलाऊँ बोल्यो, “मन म चिंत्या कर उदास मना होवो , पण परमेसर अर मेर प बी बिस्वास करो।

²म ईस्बर नगरी म थारै रेह्बा की झघा बणाबा जार्यो हूँ। परम-पिता का घर म घणिई झघा ह ज अंय्यां नइ होतो तो म थानै कोनी बोलतो।

³बठै थारै ताँई झघा बणाया पाछै म थानै लेबा आस्युं। बिकै पाछै आपा सागैई रेहस्यां।

⁴म जठै जार्यो हूँ, बठै पुगबा को गेलो थे जाणो हो।”

⁵थोमा बाऊँ बोल्यो, “परबु, थे कठै जार्या हो म्हें कोनी जाणा। जणा बठै जाबाळा गेलानै म्हें कंय्यां जाण सकां हां?”

⁶ईसु बिऊँ बोल्यो, “सच, जीवन अर गेलो मई हूँ। मेरै बिना कोई परम-पिता कनै कोनी जा सकै।”

⁷बो बाऊँ बोल्यो, “इब ज थे मनै जाणग्या हो जणा परम-पितानै बी जाणस्यो। अर इबऊँ थे बिनै जाणो अर देखो हो।”

⁸फलिपूस बाऊँ बोल्यो, “परबु, म्हानै परम-पिता का दरसण करा, अत्तो तो म्हारै ताँई घणो।”

⁹ईसु बोल्यो, “मनै कितना दिन तो होगा थारै सागै रेह्ता पाछै बी फलिपूस तू हाल ताँई कोनी जाण सक्यो क, म कूण हूँ? जखो बी मनै देख्यो ह बो बापनै बी देख्यो ह अर तू बोलै ह क, म्हानै बाप का दरसण करा दे।

¹⁰फलिपूस, तू के इ बात प बिस्वास कोनी करै क म परम-पिता म अर परम-पिता मेर म बास करै ह?” ईसु आपका चेलानै बोल्यो, “जखी बाता म थारूँ बोलुँ हूँ, अ बाता मेर कानिऊँ नइ, पण परम-पिता कानिऊँ ह, जखो मेर म होर आपको काम करै ह।

¹¹जदकी म बोलुँ हूँ क, म परम-पिता म अर परम-पिता मेर म ह जणा बिस्वास करो, अर ज नइ करो जणा कमऊँ कम मेरा करमानै देखर तो करल्यो।

¹²म थारूँ सच बोलुँ हूँ, जखो बी मेर म बिस्वास करै ह, बो बे सगळा काम करसी जखा म करूं हूँ। बो आऊँ बी बडा काम करसी, क्युं क म परम-पिता कनै जाऊँ हूँ।

¹³अर थे जोक्यु बी मेरा नामऊँ माँगस्यो म करस्युं, क्युं क परम-पिता की मेमा बेटा क जरिए दिखाई ज्यासी।

¹⁴ज थे मेरूँ मेरा नामऊँ क्युंबी माँगस्यो, जणा म बिनै करस्युं।”

¹⁵ईसु आपका चेलाऊँ बोल्यो, “ज थे मेरूँ परेम करो हो, जणा थे मेरै हुकमा प चालज्यो।

¹⁶म थारै ताँई परम-पिताऊँ एक मददगार की माँग करस्युं, जखो सदाई थारै सागै रेह्सी।

¹⁷बा पबितर आत्मा ह, जखी परमेसर की सचाई थार प परगट करसी। बा इ दुनियानै कोनी मिल सकै, क्युंक आ दुनिया बिनै नइ तो देख सकै अर नइ जाण सकै, पण थे बिनै जाणस्यो, क्युंक बा थारै सागै थारै मांयनै रेह्सी।

¹⁸म थानै अनाथ की जंय्यां एकलो कोनी छोडूँ। म थारै कनै पाछो आस्युं।

¹⁹क्युंक टेम पाछै आ सरस्टि मनै कोनी देखसी, पण थे मनै देखस्यो। क्युं क म जीऊँ हूँ, अर थे बी जिस्यो।

²⁰बो दिन आसी जणा थे जाण जास्यो, क म परम-पिता म अर थे मेर म, बंय्यांई म थारै म हूँ।

²¹जखा बी मेरा हुकमानै मानर बिपै चाली हीं, बे बामै हीं जखा मेरूँ परेम करी हीं, जखा मेरूँ परेम करी हीं बाऊँ परम-पिता परेम करसी अर म बी बाऊँ परेम करस्युं। अर खुदनै बापै परगट करस्युं।”

²²दुसरो यहूदा, जखो यहूदा इस्करोती कोनी हो बो बोल्यो, “परबु ओ कंय्यां हो सकै ह क, थे म्हानै दिखस्यो पण इ दुनिया का मिनखानै कोनी दिखो?”

²³ईसु बिऊँ बोल्यो, “जखा मेरूँ परेम करी हीं, बे मेरा खयानै मानसी। परम-पिता बाऊँ परेम करसी अर म्हें आर बाकै सागै रेहस्यां।

²⁴अर जखा मेरूँ परेम कोनी करै, बे मेरा खयानै कोनी मानै। अर जखी सीख थे मेरा मुंडाऊँ सुण्या हो बा मेरी कोनी ह, बा तो मनै भेजबाळा परम-पिता की ह।

²⁵“थारै सागै रेह्तासोता म अ बाता बोल दि ह।

²⁶मदद करबाळी पबितर आत्मा, जिनै परम-पिता मेरा नामऊँ भेजसी थानै सगळी बाता सीखासी। अर जखी बाता म थारूँ बोल्यो हो बे सगळी थानै याद दिवासी।

²⁷थानै चिंत्या अर डरबा की जुर्त कोनी, क्युं क म थानै स्यांती देस्युँ। आ इ दुनिया की स्यांती की जंय्यां की कोनी, आ बा स्यांती ह, जखी मई दे सकूँ हूँ।

²⁸“थे मनै अंय्यां बोलता सुण्या हो, ‘म जार्यो हूँ, पण म थारै कनै ओज्यु आस्युं।’ ज थे मेरूँ परेम करो हो जणा थे इ बातऊँ राजी होस्यो क म परम-पिता कनै जार्यो हूँ क्युं क बो मेरूँ बडो ह।

²⁹अ सगळी बाता होबाऊँ पेली म थानै आकै बारां म बता दिओ हूँ, अर जद अ बाता घटसी जणा थे बिस्वास करस्यो।

³⁰इब ओर बेत्ती म थारूँ बात कोनी कर सकूँ क्युं क इ दुनिया को राजा सेतान आर्यो ह, पण मेर प बिको बस कोनी चालै।

³¹जद बो आसी जणा इ जगत का मिनख जाणसी क म परम-पिताऊँ परेम राखूँ हूँ, अर बे सगळी बाता करूं हूँ, जखी करबा ताँई बो मनै हुकम दिओ ह। “आओ ल्यो आपा अठैऊँ चालां।