Read Shekhawati यहून्ना 16 Bible Online

यहून्ना 16 - Shekhawati bible

यहून्ना 16

¹“अ बाता म थारूँ इ ताँई बोली ह जिऊँ थे पाप म नइ पड़ो।

²थे अरदास करबाळी झघाऊँ काड्या जास्यो अर बो टेम आसी जद थानै मारबाळा सोचसी क थानै मार'र बे परमेसर की सेवा करीं हीं।

³मिनख अंय्यां इ ताँई करसी, क्युं क नइ तो बे मनै जाणै अर नइ परम-पितानै।

⁴म थारूँ अ बाता इ ताँई बोली ह क जद बा घड़ी आवै जणा थानै याद आवै क म पेल्याई थानै अ बाता बता दिनी ही। अ बाता म थानै पेली इ ताँई कोनी बताई क्युं क म थारै सागै हो।

⁵“इब बा घड़ी आगी ह, जद म मेरा भेजबाळा क कनै जार्यो हूँ, अर थे कोईबी मना बुजो क म कठै जार्यो हूँ।

⁶जदकी म थानै अ सगळी बाता बोल दिओ हूँ इ ताँई थारो मन दुखी नइ होवै।

⁷पण म थारूँ सची बोलर्यो हूँ ओ थारै ताँई चोखो ह, क म जाऊँ हूँ, क्युं क ज म नइ जाऊँ जणा बो मददगार कोनी आ सकै, जि मददगारनै म जार भेजस्युं।

⁸अर जद बो आसी जणा आ साबित करसी क पाप, धारमिक्‍ता अर परमेसर का न्याय क बारां म इ जगत का मिनख गळत ह।

⁹बो मिनखानै बतासी क मेर प बिस्वास नइ करबो पाप ह।

¹⁰बो धारमिक्‍ता क बारां बतासी क्युं क म परम-पिता कनै जार्यो हूँ अर थे मनै ओज्यु कोनी देखस्यो।

¹¹अर बो न्याय क बारां म बतासी क परमेसर इ दुनिया का राजा सेतान को न्याय पेलाऊँ कर दिओ ह।

¹²“बताबा ताँई मेरै कनै बोळी बाता हीं पण थे बानै इबी कोनी सेह सको।

¹³पण जद सच की आत्मा आसी जणा बा, थारी सगळी सची बाता को गेलो दिखासी। बा थानै अगाऊ होबाळी बाता क बारां म बतासी। बा खुद क्युंई कोनी खेसी पण जोक्यु बा सुणै बाई खेसी।

¹⁴बा मेरो मान करसी क्युं क बा जोक्यु मेरूँ सुणसी बाई थानै बतासी।

¹⁵बे सगळी चिजा मेरी ह जखी परम-पिता की ह जणाई तो म बोल्यो क पबितर आत्मा जोक्यु मेरूँ सुणसी बाई थानै बतासी।

¹⁶“क्युंक देर पाछै थे मनै कोनी देखस्यो। अर इकै क्युंक देर पाछै थे मनै ओज्यु देखस्यो।”

¹⁷जणा बिका चेला आपसरी म बतळाबा लाग्या, “ओ आ काँई बात बोलै ह क, ‘क्युंक देर पाछै मनै कोनी देखस्यो, अर बिकै क्युंक देर पाछै ओज्यु देखस्यो,’ अर ‘म परम-पिता क कनै जाऊँ हूँ?’

¹⁸ओ क्युंक देर पाछै काँई ह, जिकी ओ बात करै ह? म्हें कोनी जाणा ओ काँई बोलै ह।”

¹⁹ईसु जाणगो क बे बिऊँ सुवाल बुजबो चावीं हीं जणा बाऊँ बोल्यो, “के थे आपसरी म मेरी इ बात क बारां म बुजर्या हो क, ‘थे मनै क्युंक देर पाछै कोनी देखो अर क्युंक देर पाछै देखस्यो?’

²⁰म थारूँ सची बोलुँ हूँ, थे रोस्यो अर छाती पिटस्यो अर ओ जगत राजी होसी। थे दुखी होस्यो पण थारो दुख, सुक म बदल ज्यासी।

²¹जद एक लूगाई टाबर जलमै जणा बिनै पिड़ा होवै ह, क्युं क बा बिकी पिड़ा की घड़ी होवै ह। पण टाबर जलम्बा क पाछै एक टाबर क इ धरती प आबा की खुसी म बा आपकी सगळी पिड़ानै भूलर राजी होवै ह।

²²ठिक बंय्यांई थे सगळा बी दुखी हो पण म थारूँ ओज्यु मिलस्युं जणा थारा हिया राजी होसी अर थारी खुसी थारूँ कोई कोनी खोससी।

²³बि दिन थे मेरूँ क्युंई कोनी बुजस्यो। म थानै सची बोलुँ हूँ, मेरा नामऊँ जोक्यु बी थे परम-पिताऊँ माँगस्यो बो थानै देसी।

²⁴हाल ताँई थे मेरा नामऊँ क्युंई कोनी माँग्या। माँगो थानै मिलसी जिऊँ थे राजी-खुसी रेह्‍वो।

²⁵“म अ सगळी बाता थानै निती-कथा म बोली ह पण इब जखो टेम आर्यो बिमै म निती-कथा म कोनी बोलस्युं पण परम-पिता क बारां म थानै साप-साप बतास्युं।

²⁶बि दिन थे मेरा नामऊँ माँगस्यो। मनै परम-पिताऊँ थारै ताँई माँगबा की जुर्त कोनी पड़सी।

²⁷परम-पिता तो खुदई थारूँ परेम करै ह क्युं क थे मेरूँ परेम अर बिस्वास करो हो क म परमेसर कानिऊँ आयो हूँ।

²⁸म परम-पिता कानिऊँई इ जगत म आयो। इब म इ जगतनै छोडर परम-पिता कनै जार्यो हूँ।”

²⁹बिका चेला बोल्या, “हाँ इब थे बातनै साप-साप, बिना घूमाया बतार्या हो।

³⁰इब म्हें समजगा क थे सक्यु जाणो हो। इब कोईनै बी थारूँ क्युंई बुजबा की जुर्त कोनी। म्हानै ओ बिस्वास ह क थे परमेसर कानिऊँ आयो हो।”

³¹इ बात प ईसु बाऊँ बोल्यो, “के थे सचमई बिस्वास करो हो?

³²सुणो टेम आर्यो ह आर्यो के ह आगो जद थे सगळा तीनतेरा होज्यास्यो। थे सगळा मनै एकलो छोडर आप-आप क घरा चल्या जास्यो पण म एकलो कोनी हूँ मेरो परम-पिता मेरै सागै ह।

³³“म अ बाता थारूँ इ ताँई बोल्यो क थानै स्यांती मिलै। जगत म तो थानै दुखई मिल्यो ह पण हिमत राखो म जगतनै जीत लिओ हूँ।”