Read Shekhawati यहून्ना 17 Bible Online

यहून्ना 17 - Shekhawati bible

यहून्ना 17

¹अ सगळी बाता बोलर ईसु आसमान कानि देखर बोल्या, “ओ परम-पिताजी, बा घड़ी आगी ह, तेरा बेटानै मेमा द्‍यो जिऊँ थारो बेटो थारी मेमा कर सकै।

²थे बिनै सगळा मिनखा प अधिकार दिओ ह जिऊँ बो बा मिनखानै अजर-अमर जीवन देवै जानै थे टाळ्या हो।

³अजर-अमर जीवन ओ ह क बे थानै, जखा इकलोता सचा परमेसर हो, अर ईसु मसीनै जाणै जिनै थे भेज्या हो।

⁴जोक्यु थे मनै करबा ताँई इ धरती प सूप्या हा, बे सगळा काम कर म थारी मेमा करी ह।

⁵अर इब, ओ परम-पिताजी, सरस्टि की सरूआतऊँ पेली आपा जखी मेमा म हा, बि मेमा म मनै लेज्याओ।

⁶इ जगत का मिनखा मऊँ जखा मिनख थे मनै दिआ, बानै म थारा नाम की सक्‍ति को ज्ञान करवायो। बे सगळा थाराई मिनख हा। थे बानै मनै दिआ अर बे तेरा खयानै मान्या।

⁷अर इब बे जाणी हीं क हरेक चिज जखी थे मनै दिआ हो, बा थारै कानिऊँ आवै ह।

⁸म बानै बाई सीख दिनी, जखी थे मनै सीखाया हो, अर बे बिपै चाली हीं। बे सूल्या जाणी हीं क म थारै कानिऊँ आयो हूँ अर बानै इ बात को बिस्वास होगो ह क मनै भेजबाळा थेई हो।

⁹“म बा ताँई अरदास करूं हूँ। म जगत ताँई अरदास कोनी करर्यो पण म तो बा ताँई अरदास करूं जानै थे मनै दिआ हो क्युं क बे थारा हीं।

¹⁰बे सगळा जखा मेरा ह बे थारा हीं अर जखा थारा हीं बे मेरा ह, बाकै जरिए मनै मेमा मिली।

¹¹इब म इ जगतनै छोडर थारै कनै आर्यो हूँ पण बे इ जगत म हीं। पबितर परम-पिता थारा बि नाम की सक्‍तिऊँ जखो थे मनै दिआ हो, बानै बचार राखो जिऊँ बे थारी-म्हारी जंय्यां एक हो सकै।

¹²जद म बाकै सागै हो म थारा बि नाम की सक्‍तिऊँ जखो थे मनै दिआ हा बानै बचायो। बामैऊँ कोईबी नास कोनी होयो सिवाय बि मिनख क जखो बि गेला प चाल्यो जखो नास कानि लेज्यावै ह, जिऊँ क सास्तर को आंक पूरो होवै।

¹³“इब म थारै कनै आर्यो हूँ पण अ बाता म इ जगत म रेह्ता-सेह्ता बोलुँ हूँ, जिऊँ क बाको हियो मेरी खुसीऊँ भरज्या।

¹⁴म थारी सीख बानै दिनी। पण ओ जगत बाऊँ नफरत करै ह क्युं क बे इ जगत का कोनी, जंय्यां म इ जगत को कोनी।

¹⁵म आ अरदास कोनी करूं क थे बानै इ धरतीऊँ उठाल्यो, पण म अरदास करूं हूँ थे बानै बुराईऊँ बचार राखो।

¹⁶बे इ जगत का कोनी जंय्यां म इ जगत को कोनी।

¹⁷सच क जरिए थे बानै थारी सेवा करबा ताँई पबितर करो। थारा बचन सचा हीं।

¹⁸जंय्यां थे मनै इ जगत म भेज्या हो बंय्यांई म बानै जगत म न्यारी-न्यारी झघा म भेज्यो हूँ।

¹⁹म बा ताँई खुदनै पबितर कर थारी सेवा करूँ हूँ, जिऊँ सच क जरिए बे बी पबितर होर थारी सेवा कर सकीं।

²⁰“म बा खातरई अरदास कोनी करूं पण बा ताँई बी कर्यो हूँ, जखा बाकी सीख की बजेऊँ मेर प बिस्वास करसी।

²¹ओ परम-पिताजी, म चाऊँ हूँ क बा सगळा म एको होवै, ठिक बंय्यांई जंय्यां म थारै म ओर थे मेर म हो। बे बी आपणा म एक होवीं जिऊँ क इ जगत का मिनख बिस्वास करै क थे मनै भेज्या हो।

²²बा मेमा जखी थे मनै दिआ हो, बा म बानै दिओ हूँ जिऊँ बे बी एक हो सकीं जंय्यां आपा एक हा।

²³म बामै हूँ अर थे मेर म, जिऊँ बे पूरीतर्या एक होर आपणै म रळज्यावै। अर इ जगत का मिनख जाणै, क मनै भेजबाळा थे हो। थे बानै बी बंय्यांई परेम करो जंय्यां थे मेरूँ परेम करो हो।

²⁴ओ परम-पिताजी, जखा मिनख थे मनै सूप्या हो म चाऊँ हूँ क बे बी बठै मेरै सागै होवीं जठै म हूँ, जिऊँ क बे बि मेमानै देख सकीं जखी थे मनै दिआ हो, क्युं क इ सरस्टिनै रचबाऊँ पेली थे मेरूँ परेम कर्यो।

²⁵“ओ परम-पिताजी, थे जखा धरमी हो, ओ जगत थानै कोनी जाणै पण म थानै जाणू हूँ, अर मेरा मिनख जाणी हीं क मनै भेजबाळा थे हो।

²⁶म, बानै थारा नाम की सक्‍ति को ज्ञान करायो अर करवातो रेहस्युं, जिऊँ जखो परेम थे मेर प दरसाया हो बो बामै बी हो अर म बामै बण्यो रेह्ऊँ।”