Read Shekhawati यहून्ना 20 Bible Online

यहून्ना 20 - Shekhawati bible

यहून्ना 20

¹सपता का पेला दिन दितबारनै, भागपाट्याई मरीयम मगदलिनी कबर प आई अर देखी क कबर का मुंडा को भाठो हटेड़ो ह।

²जणा बा भागर समोन पतरस अर बि दुसरा चेला क, जखो लाडलो खुवातो हो कनै गई। अर बाऊँ बोली, “बे परबुनै कबरऊँ काड लेग्या हीं अर म्हानै कोनी बेरो क बानै कठै धर्या हीं।”

³इकै पाछै पतरस अर बो दुसरो चेलो कबर प जाबा ताँई रवाना होया।

⁴बे दोन्यु एक सागै भागर्या हा पण दुसरो चेलो पतरसनै गेलनै छोडगो अर कबर प बिऊँ अगाऊ जा पुग्यो।

⁵बो झुकर देख्यो क बठै कफन हाळा गाबल्या पड़्या हीं पण बो मांयनै कोनी गयो।

⁶जणा बि टेमई समोन बी बठै आ पुग्यो अर कबर क मांयनै जार देख्यो क बठै कफन हाळा गाबल्या पड़्या हीं।

⁷अर जखो गाबो कबर म म्हेलती टेम बाकै सीर प हो बो कफन क सागै कोनी हो, पण एक झघा सामटेड़ो पड़्यो हो।

⁸इकै पाछै बो दुसरो चेलो जखो कबर प पेल्या पुग्यो हो, मांयनै जार देख्यो अर बिस्वास कर्यो।

⁹बे हाल बी सास्तर का आंकनै कोनी समज्या क, “बो मरेड़ा मऊँ पक्कोई जी उठसी।”

¹⁰इकै पाछै बे चेला पाछा घरा चलेगा।

¹¹मरीयम रोती कूकती कबर क बारनै खड़ी ही अर रोती कूकती बा कबर क मांयनै झुकाळी मारी।

¹²जणा बिनै जठै ईसु की लास पड़ी ही बठै दो ईस्बर नगरी दुत भळका मारता गाबा पेर्या दिख्या। एक तो सीराणै हो अर दुसरो पगात्या बेठ्यो हो।

¹³बे बिऊँ बुज्या, “स्याणी, तू क्याले रोवै ह?” बा बोली, “बे मेरा परबुनै उठा लेग्या अर मनै बेरो बी कोनी क, बे बानै कठै धर्या।”

¹⁴आ बोलर बा मुड़ी अर बा देखी क बठै ईसु खड़्या हीं पण बा कोनी जाणी क बो ईसु ह।

¹⁵ईसु बिऊँ बोल्यो, “स्याणी, तू क्याले रोवै ह अर तू किनै ढुंढै ह?” बा आ सोचर क ओ माळी ह, बाऊँ बोली, “स्याणो ज थे बानै कठिनै धर्या हो जणा मनै बताओ क थे बानै कठै धर्या हो? म बानै मेरै सागै लेज्यास्युं।”

¹⁶ईसु बिऊँ बोल्यो, “मरीयम।” बा गेलनै घूमी अर इबरानी भासा म बोली, “रब्बूनी,” जिको मतबल “गरूजी ह।”

¹⁷ईसु बिऊँ बोल्यो, “मेरै हात मना अड़ा क्युं क म हाल ताँई परम-पिता क कनै उपर कोनी गयो हूँ। तू तो अंय्यां कर मेरा भाई-भाणा कनै जा अर बानै बता, ‘म मेरा अर थारा परम-पिता, परमेसर क कनै उपर जार्यो हूँ।’ ”

¹⁸मरीयम मगदलिनी आ बोलतीई चेला कनै आई क, “म परबुनै देखी हूँ।” अर जोक्यु ईसु बिऊँ बोल्यो हो बे बाता बानै खे सुणाई।

¹⁹सपता का पेला दिन दितबारनै, आथण्या बिका चेला यहूदि नेता क डर का मारै किवाड़ जड़र मांयनै बड़र्या हा। बि टेमई ईसु बठै मांयनै आर बाकै बिचमै खड़्यो होगो अर बाऊँ बोल्यो, “थानै स्यांती मिलै।”

²⁰आ बोलर बे बानै आपका हाता का अर पासळ्या का घाव दिखाया। चेला जद परबुनै देख्या जणा बे बोळा राजी होया।

²¹जणा ईसु बाऊँ ओज्यु बोल्यो, “थानै स्यांती मिलै। जंय्यां परम-पिता मनै भेज्यो ह, ठिक बंय्यांई म थानै भेजूँ हूँ।”

²²आ खेर बे बापै फूंक मारी अर बाऊँ बोल्यो, “पबितर आत्मानै ल्यो।

²³जखा मिनखा का पाप थे माफ करस्यो बानै माफी मिलसी अर जाका पाप थे माफ कोनी करो बे माफ कोनी कर्या ज्यासी।”

²⁴थोमा बा बारां मऊँ एक हो जिनै जोड़लो बी खेवै ह, बो ईसु क आबा की टेम बठै बा चेला क सागै कोनी हो।

²⁵जणा बे दुसरा चेला बिऊँ बोल्या, “म्हें परबुनै देख्या हां।” पण बो बानै बोल्यो, “जद ताँई म बाकै हाता म किलां का निसान नइ देखल्युं अर बामै मेरी आँगळी नइ घालल्युं अर बिकी कोल म मेरो हात नइ घालर देखल्युं जद ताँई मनै बिस्वास कोनी होवै।”

²⁶जणा आठ दिना का पाछै ईसु का चेला ओज्यु घर क मांयनै हा। इबकै थोमा बी बाकै सागै हो अर किवाड़ बंद हा। जणा ईसु आगो अर बाकै बिचमै आर बोल्यो, “थानै स्यांती मिलै।”

²⁷जणा बो थोमाऊँ बोल्यो, “आ, अर तेरी आँगळ्या घालर मेरा हात देख अर तेरा हातनै मेरी कोल म घाल। भेम करबो छोड अर बिस्वास राख।”

²⁸जणा जुबाब म थोमा बोल्यो, “ओ मेरा परबु, ओ मेरा परमेसर।”

²⁹ईसु बिऊँ बोल्या, “तू मनै देखर मेर प बिस्वास कर्यो ह। पण भागहाळा हीं बे मिनख जखा मनै बिना देख्या बिस्वास करीं हीं।”

³⁰ईसु ओर बी बोळा चमत्कार आपका चेलानै दिखाया जाको जिकर इ पोथी म कोनी मांड्यो गयो।

³¹अर जखी बाता अठै मांडेड़ी ह बे इ ताँई ह क, थे बिस्वास करो क ईसुई परमेसर को बेटो मसी ह अर बिस्वास करके, थे बिका नाम म जीवन पाओ।