Read Shekhawati यहून्ना 21 Bible Online

यहून्ना 21 - Shekhawati bible

यहून्ना 21

¹इकै पाछै ईसु आपका चेलानै तिबरिआस झिल का किनारा प ओज्यु दरसण दिओ। अर आ बात अंय्यां होई,

²समोन पतरस, थोमा जखो जोड़लो खुवातो हो, गलिल का काना को नतनएल, जब्दि को बेटो अर ईसु का दो ओर चेला बठै भेळा हा।

³समोन पतरस बाऊँ बोल्यो, “म मछी पकड़बा जाऊँ हूँ।” बे बिऊँ बोल्या, “म्हें बी तेरै सागै चालस्यां।” अर बे अंय्यां खेर बिकै सागै होलिआ अर न्याव म बेठगा। पण बि रात बाकै क्युंई कोनी हात्यायो।

⁴अंय्यां करता-करता दिन होगो, बि टेमई ईसु बठै किनारा प आर खड़्यो होगो पण बे चेला कोनी जाण्या क बो ईसु ह।

⁵जणा ईसु बाऊँ बोल्यो, “भाईड़ो, थारै कनै मछ्या ह के?” बे बोल्या, “कोनी।”

⁶जणा बो बाऊँ बोल्यो, “न्याव क दाया नाकै जाळ फेको अर थानै मिलसी।” जणा बिका बोल्या गेल बे जाळ फेक्या पण बोळी मछ्या की बजेऊँ बे जाळनै पाछा कोनी खींच सक्या।

⁷जणा पाछै लाडलो चेलो पतरसऊँ बोल्यो, “अ तो परबुई ह।” आ सुणताई क, “अ तो परबुई ह,” बो कोई परवा करै बिनाई लंगोट प बारलो गाबो लपेटर पाणी म कुदगो जिऊँ तावळोसो किनारा प पुग सकै।

⁸जणा दुसरा चेला बिकै गेल मछ्याऊँ भरेड़ो जाळ खिंचर न्यावऊँ किनारा प ले आया क्युं क बे किनारैऊँ कोई सोएक गज दूर हा।

⁹किनारा प आताई बानै सिलगता कोयला की आग दिखी जापै मछी सिकरी ही अर रोटी बी पड़ी ही।

¹⁰ईसु बाऊँ बोल्यो, “जखी मछ्या थे इबी पकड़ी ह बामैऊँ क्युंक लिआओ।”

¹¹जणा समोन पतरस न्याव प गयो अर एक सो तरेपन बडी मछ्याऊँ भरेड़ा जाळनै किनारा प खिंच्यो। अत्ती सारी मछ्या होबा क पाछै बी जाळ फाट्यो कोनी।

¹²ईसु बाऊँ बोल्यो, “अठै आओ अर रोटी जिमो।” बिका चेला मऊँ कोईसा किई हिमत कोनी बगी क बिऊँ बुजै “थे कूण हो?” क्युं क बे जाणगा हा क बे परबुई ह।

¹³जणा ईसु खड़्या होया अर रोट्या लेर बानै परूसी अर अंय्यांई मछ्या बी।

¹⁴अर ओ तीसरकै हो क मरेड़ा मऊँ जीबा क पाछै ईसु आपकै चेला क सामै परगट होया।

¹⁵रोटी खाबा क पाछै ईसु समोन पतरसऊँ बोल्यो, “यहून्ना का बेटा समोन, जत्तो परेम अ मेरूँ करीं हीं, तू मेरूँ बाऊँ बेत्ती परेम करै ह के?” पतरस ईसुऊँ बोल्यो, “हाँ परबु, थे जाणो हो क म थारूँ परेम करूं हूँ।” जणा ईसु पतरसऊँ बोल्यो, “मेरा उन्यानै चरा।”

¹⁶बो बिऊँ ओज्यु बोल्यो, “यहून्ना का बेटा समोन, तू मेरूँ परेम करै ह के?” जणा पतरस बोल्यो, “हाँ परबु, थे जाणो हो क म थारूँ परेम करूं हूँ।” जणा ईसु पतरसऊँ बोल्यो, “मेरी लल्ड्या की रूखाळी कर।”

¹⁷ईसु तीसरका पतरसऊँ बोल्यो, “यहून्ना का बेटा समोन, तू मेरूँ परेम करै ह के?” पतरस बोळो दुखी होयो क्युं क ईसु तीसरका बिऊँ आ बात बुजी ही, “तू मेरूँ परेम करै ह के?” जणा पतरस ईसुऊँ बोल्यो, “परबु थे तो सक्यु जाणो हो थे जाणो हो क म थारूँ परेम करूं हूँ।” ईसु बिऊँ बोल्यो, “मेरी लल्ड्यानै चरा।

¹⁸म तनै सची बोलुँ हूँ, जद तू मोट्यार हो, जणा तू तेरी कमर प सापी कसर जठै मरजी चल जातो हो। पण जद तू बूडो होसी जणा तू हात पसारसी अर दुसरा तनै बां'दर जठै तू कोनी जाणो चावै बठै लेज्यासी।”

¹⁹बो आ बात आ दरसाबा ताँई बोल्यो क पतरस कंय्यां की मोत मर'र परमेसर की मेमा करसी। आ बोलर बो बिऊँ बोल्यो, “मेरै गेल आ।”

²⁰पतरस गेलनै बावड़र देख्यो क बो चेलो जखो लाडलो खुवातो हो, बिकै गेल आर्यो ह। ओ बोई हो जखो रोटी जिम्ती टेम बिकै कान क कनैसिक मुंडो कर बाऊँ बुज्यो, “परबु बो कूण ह जखो थानै धोकाऊँ पकड़ासी?”

²¹बिनै देखर पतरस ईसुऊँ बोल्यो, “परबु, इको काँई होसी?”

²²ईसु बिऊँ बोल्यो, “ज म आ चाऊँ क मेरै पाछै आबा ताँई, ओ अठैई रेह्‍वै जणा तनै इऊँ काँई? तू तो मेरै गेल आ।”

²³जणा आ बात चेला म इ हद ताँई फेलगी क बो चेलो कोनी मरै। ईसु ओ कोनी बोल्या हा, क बो कोनी मरसी। पण बाको मतबल ओ हो क, “ज म आ चाऊँ क जद ताँई म आऊँ, ओ अठैई रेह्‍वै जणा तनै इऊँ काँई?”

²⁴ओ बो चेलो ह जखो आ सगळी बाता की गुवाई देवै ह, अर जखो आ सगळी बातानै मांडी ह। म्हें जाणा हा क बिकी गुवाई सची ह।

²⁵ईसु ओर बी बोळा काम कर्या। ज बे सगळा एक-एक कर मांड्या जावै जणा म समजूँ हूँ क बा किताब अत्ती बडी होती की सगळी सरस्टि प कोनी नावड़ती।