Read Shekhawati यहून्ना 4 Bible Online

यहून्ना 4 - Shekhawati bible

यहून्ना 4

¹फरिसी आ सुणी क, ईसु यहून्नाऊँ बेत्ती चेला बणावै अर बानै पाणी को बतिस्मो देवै ह।

²पण ईसु खुद आपकै हाता कोईनैई पाणी को बतिस्मो कोनी देतो हो। ओ काम बिका चेला कर्या करता हा।

³ईसुनै जद बेरो पड़्यो क फरिसी बिकै बारां म काँई सुण्या हीं, जणा बो यहूदिआ इलाकानै छोडर पाछो गलिल इलाका म चलेगो।

⁴पण बिनै सामरीया इलाका म होर जाणो पड़्यो।

⁵जणा बो सामरीया इलाका की एक नगरी म पुग्यो, जिको नाम सूखार हो, आ नगरी बि झघा क कनै ही जिनै बडको याकूब आपका बेटा युसूफनै दि ही।

⁶अर बडका याकूब को कुओ बी बठैई हो, जणा सफर की थकान क चलतै ईसु कुआ क कनै बेठगो। आ करीब दोपारा की सी बात ही।

⁷अत्ता मई एक सामरी लूगाई बठै पाणी भरबानै आई, जणा ईसु बिनै बोल्यो, “मनै पाणी प्या।”

⁸बि टेम बिकाळा चेला खाबा ताँई क्यु मोल ल्याबानै नगरी म गयड़ा हा।

⁹बा दिना यहूदि मिनख खुदपै सामरी मिनखा की छायाई कोनी पड़बा देता हा। इ बजेऊँ बा सामरी लूगाई बिनै जुबाब दिनी, “तू एक यहूदि ह, अर म सामरी जणा पाछै तू पीबा ताँई मेरूँ पाणी कंय्यां माँग सकै ह?”

¹⁰ईसु जुबाब म बोल्यो, “ज तू परमेसर का बरदाननै जाणती अर आबी क, ‘जखो तेरूँ पीबा ताँई पाणी माँगर्यो ह बो कूण ह, जणा तू बिऊँ माँगती अर बो तनै जीवन देबाळो पाणी देतो।’”

¹¹बा लूगाई बोली, “स्याणो, पाणी भरबा ताँई थारै कनै क्युंई कोनी, अर ओ कुओ बी बोळो उन्डो ह। जणा पाछै बो जीवन देबाळो पाणी तेरै कनै कठैऊँ आयो?

¹²के तू म्हारा बडका याकूबऊँ बडो ह, जखो म्हानै ओ कुओ दिओ अर जिमैऊँ बो खुद, बिका बेटा अर बिका ढांडा पाणी पीआ हा?”

¹³ईसु जुबाब दिओ, “जखो बी इ पाणी मऊँ पिसी बिनै ओज्यु तिस लागसी,

¹⁴पण ज मेरा दियड़ा पाणी मऊँ कोई पिसी जणा बो ओज्यु कदैई कोनी तिसायो होसी। बि पाणीऊँ जखो म बानै देस्युँ, बिऊँ बे अजर-अमर जीवन ताँई जीवन देबाळा पाणी को झरनो बणज्यासी।”

¹⁵बा लूगाई बोली, “म्हराज जणा तो बो पाणी मनै बी द्‍यो, जिऊँ मनै कदैई तिस नइ लागै अर नइ पाणी खिचबानै अठै आणो पड़ै।”

¹⁶जणा ईसु बिऊँ बोल्यो, “जा तेरा मोट्यारनै बुलाल्या।”

¹⁷बा बोली, “मेरै मोट्यार कोनी।” जणा ईसु बोल्यो, “तू ठिक बोलै ह तेरै मोट्यार कोनी।

¹⁸तू पाच क सागै ब्या करी अर जिकै सागै तू हाल रेह्‍री ह बो बी तेरो मोट्यार कोनी। तू मेरूँ सच बोली ह।”

¹⁹बा लूगाई ईसुनै बोली, “म्हराज मनै तो लागै ह क थे कोई परमेसर की खेबाळा हो।

²⁰म्हारा बडका इ डूँगर प परमेसर की भगती कर्या करता हा, पण थे यहूदि अंय्यां बोलो हो क, यरूसलेमई बा झघा ह जठै परमेसर की भगती करी जाणी जरूरी ह।”

²¹ईसु बिऊँ बोल्यो, “स्याणी, मेरो बिस्वास कर, बो टेम आर्यो ह जद मिनख नइ तो परम-पिता की भगती इ डूँगर प अर नइ यरूसलेम म करसी।

²²थे सामरी सचमई कोनी जाणो, क थे किकी भगती करो हो। पण म्हें यहूदि जाणा हा क, म्हें किकी भगती करां हां। क्युं क छुटकारो यहूदि मिनखा मऊँ आवै ह।

²³पण बो टेम आर्यो ह, आर्यो के ह आग्यो, जद भगत आत्माऊँ परम-पिता की सची भगती करसी , जखी भगती बो चावै ह।

²⁴परमेसर आत्मा ह, जणा ओ जरूरी ह क, बिकी भगती आत्मा अर सचाईऊँ करी जावै।”

²⁵लूगाई बिऊँ बोली, “म जाणू हूँ क, मसी जखो परमेसर को टाळेड़ो ह आसी। जद बो आसी जणा आपानै सगळी बाता बतासी।”

²⁶ईसु जुबाब दिओ, “म जखो तेरै सागै बतळार्यो हूँ, म बोई हूँ।”

²⁷बि टेमई ईसु का चेला बठै आग्या अर बे आ देखर क ईसु एक लूगाई क सागै बतळार्यो ह, इ बात प ताजूब कर्या। पण कोईसोई बि लूगाईऊँ कोनी बुज्यो क, “तनै काँई चाए?” अर नइ ईसुऊँ बुज्या क, “तू बिऊँ कय्यालै बतळार्यो ह?”

²⁸बा लूगाई आपको घड़ो बठैई छोडर पाछी नगरी म जार मिनखानै खेबा लागी,

²⁹“आर एक मिनखनै देखो, बो बे सगळी बाता बता दिनी जखी म करी। के ओई तो मसी कोनी?”

³⁰बे नगरीऊँ निकळर बिकन जाबा लाग्या।

³¹अर बठिनै बिका चेला बिऊँ हात जोड़र खया, “गरूजी, क्यु खाल्यो।”

³²पण ईसु जुबाब दिओ, “मेरै कनै खाबा ताँई अंय्यां को खाणो ह, जिकै बारां म थे कोनी जाणो।”

³³जणा चेला आपसरी म बतळाबा लाग्या, “के आनै कोई रोटी ल्यार दिनी ह?”

³⁴ईसु बाऊँ बोल्यो, “मेरी रोटी आ ह क, म मेरा भेजबाळा की इंछ्या मानू अर बिको काम पूरो करूं।

³⁵के थे कोनी बोलो, ‘इब लावणी का च्यार म्हेनाई रेह्गा ?’ म थारूँ बोलुँ हूँ, खेता कानि देखो बे लावण्या आगा हीं।

³⁶लावणी करबाळानै मजुरी मिलरी ह अर बो अजर-अमर जीवन ताँई फसल भेळी करै ह। जिऊँ बीज बोबाळो अर काटबाळो दोन्युई मिलर खुसी मना सकै।

³⁷क्युं क अठै आ बात सची बेठै ह, ‘बोयो कोई, अर काट्यो कोई।’

³⁸म थानै बि खेत की लावणी करबानै भेज्यो जिमै थे मेनत कोनी करी। दुसरा बिमै मेनत करी पण इब बि खेत का फळ म थारी बी पाँती ह।”

³⁹बि लूगाई की इ बात की गुवाई देबा की बजेऊँ क, “जोक्यु म करी हूँ बे सगळी बाता बो मनै बता दिओ।” बि नगरी का बोळा सामरी मिनख ईसु प बिस्वास कर्या।

⁴⁰अर जद सामरी आर बिऊँ हात जोड़र बोल्या क बो बाकै सागै रेह्‍वै, जणा बो दो दिन ताँई बाकै सागै रिह्यो।

⁴¹अर ओर बी बोळा मिनख हा जखा ईसु का बचनानै सुणर बिपै बिस्वास कर्या।

⁴²जणा बे मिनख बि लूगाईऊँ बोल्या, “तेरै खेबा की बजेऊँई म्हें बिपै बिस्वास कोनी कर्या, पण म्हें खुद इनै सुणर जाणगा हां क, जगत का मिनखानै बचाबाळो सचमई ओई ह।”

⁴³बा दो दिना क पाछै बो बठैऊँ गलिल चलेगो।

⁴⁴क्युं क ईसु खुदई बोल्यो हो, “परमेसर की खेबाळानै खुदकी भौम म मान-समान कोनी मिलै।”

⁴⁵जद बो गलिल पुग्यो, जणा गलिल का मिनख बिकी आवभगत करी। बे मिनख बा सगळा कामानै पेलीऊँ देख्या हा, जानै फसै का त्युंहार क दिना म बो यरूसलेम म कर्यो हो, क्युं क बे बी बि टेम बठैई हा।

⁴⁶जणा पाछै बो गलिल इलाका की काना नगरी म गयो, जठै बो पाणीनै अँगूरी बणाई ही। बठै एक सरकारी अधिकारी हो, जिको बेटो कफरनूम नगरी म बिमार पड़्यो हो।

⁴⁷अर जद बो मिनख आ सुणी क, ईसु यहूदिआऊँ गलिल म आयड़ो ह। जणा बो बिकन जार बिऊँ हात जोड़र बोल्यो, “चालर मेरा छोरानै निरोगो करद्‍यो क्युं क बो मरबाळो ह।”

⁴⁸इ बात प ईसु बिऊँ बोल्यो, “थारै मऊँ कोईबी जद ताँई चमत्कार अर ताजूब का काम नइ देखले, बिस्वास कोनी करो।”

⁴⁹बो अधिकारी ईसुऊँ बोल्यो, “म्हराज मेरा बेटा क मरबाऊँ पेली थे मेरै सागै चालो।”

⁵⁰ईसु बिऊँ बोल्यो, “तू जा, तेरो छोरो कोनी मरै।” बो ईसु की बाता प बिस्वास कर्यो अर चलेगो।

⁵¹अर जद सरकारी अधिकारी गेला मई हो, जणा बिका दास बिनै आ खबर दिनी क, “तेरो बेटो निरोगो होगो।”

⁵²जणा बो बाऊँ बुज्यो, “अ कतीक बजे की बाता ही।” बे बिऊँ बोल्या, “काल करीब एक बजैसीक बिकी बुखार उतरगी अर बो निरोगो होगो हो।”

⁵³जणा बिकै याद आई क ओ तो बोई टेम ह, जि टेम ईसु बोल्यो हो क, “तू जा, तेरो छोरो कोनी मरै।” जणा बो अर बिको सगळो परवार बिस्वास कर्यो।

⁵⁴यहूदिआऊँ गलिल आबा क पाछै ईसु को ओ दुसरो चमत्कार हो।