Read Shekhawati यहून्ना 9 Bible Online

यहून्ना 9 - Shekhawati bible

यहून्ना 9

¹जद ईसु जार्यो हो, जणा बो एक मिनखनै देख्यो जखो जलमऊँ आँदो हो।

²बिका चेला बिऊँ बुज्या, “गरूजी, किका पाप की बजेऊँ ओ जलमऊँ आँदो ह, इका खुदका पाप, नहिस इका माँ-बाप का?”

³ईसु बोल्यो, “ओ नइ तो आपका माँ-बाप क अर नइ खुदका पाप की बजेऊँ आँदो ह। पण ओ इ ताँई आँदो ह, क इपै परमेसर को काम परगट हो सकै अर मिनख बिनै देखै।

⁴आ जरूरी ह क जखो मनै भेज्यो, बिका काम आपा दिन-दिनऊँ करल्या क्युं क रात होबाळी ह जद कोई काम कोनी करसी।

⁵जद ताँई म इ जगत म हूँ, म इ जगत का मिनखा को च्यानणो हूँ।”

⁶आ बोलर बो जमीन प थूक्यो अर बि थूकऊँ माटीनै सणी अर बा माटी बि आँदा मिनख की आँख्या प लगाई।

⁷अर बिऊँ बोल्यो, “जार सिलोह कूंड म धोले।” (सिलोह को मतबल “भेजेड़ो”) जणा बो मिनख जार आपकी आँख्या धोई अर देखबा लाग्यो अर पाछो आगो।

⁸जणा बिका आसपड़ोस का अर बे जखा बिनै पेली भीक माँगता देख्या हा बोल्या, “ओ बोई कोनी के जखो बेठ्यो-बेठ्यो भीक माँग्या करतो हो?”

⁹क्युंक बोलर्या हा, “ओ बोई ह।” पण दुसरा बोलर्या हा, “नइ ओ बिकी जंय्यां को लागै ह, पण बो कोनी।” जणा बो मिनख खुद बोल्यो, “म बोई हूँ।”

¹⁰बे बिऊँ बुज्या, “तनै इब कंय्यां दिखबा लाग्यो?”

¹¹बो मिनख बोल्यो, “एक मिनख जिनै ईसु बोलीं हीं। बो माटी लेर बिनै सणी, अर मेरी आँख्या प मसळ दि अर मेरूँ बोल्यो, ‘जार सिलोह कूंड म धोले।’ जणा म जार धोयो अर मनै सुजबा लाग्यो।”

¹²बे बिऊँ बुज्या, “बो कठै ह?” बो बोल्यो, “मनै कोनी बेरो।”

¹³जणा मिनख बिनै, जखो पेला आँदो हो फरिसीया क कनै लेगा।

¹⁴जि दिन ईसु माटी सणर बिनै निरोगो कर्यो हो, बो अरामहाळो दिन हो।

¹⁵जणा फरिसी बी बि मिनखनै बुज्या, “तनै दिखबा कंय्यां लाग्यो?” बो बाऊँ बोल्यो, “बो क्युंक आली माटी मेरी आँख्या प मसळी, म धोई अर इब म देख सकूँ हूँ।”

¹⁶क्युंक फरिसी बोल्या, “जखो मिनख ओ कर्यो ह। बो परमेसर कानिऊँ कोनी हो सकै क्युं क बो अरामहाळा दिन को मान कोनी करै।” पण क्युंक दुसरा बोलबा लाग्या क, “एक पापी मिनख ओ चमत्कार कंय्यां दिखा सकै ह?” इ बात प बामै फूट पड़गी।

¹⁷जणा फरिसी बि मिनखनै एक बार ओज्यु बुज्या, “तू बिकै बारां म काँई बोलै ह, जखो तनै आँख्या दि?” बो बोल्यो, “बो परमेसर की खेबाळो ह।”

¹⁸इ बात की बजेऊँ बे यहूदि अधिकारी बि मिनख की बात प क, बो आँदो हो अर इब देखबा लाग्यो जद ताँई बिस्वास कोनी कर्या जद ताँई बिका माँ-बापनै बुलार,

¹⁹आ कोनी बुज्या क, “के ओ थारो छोरो ह? के ओ आँदो जलम्यो हो? ज हो, जणा थे बताओ इब कंय्यां देख सकै ह।”

²⁰बिका माँ-बाप बोल्या, “ओ म्हारोई छोरो ह। अर ओ जलमऊँ आँदो हो।

²¹पण म्हें कोनी जाणा इब ओ कंय्यां देखबा लाग्यो अर नइ म्हें आ जाणा क इनै कूण आँख्या दि। इब ओ टाबर तो आथ कोनी। ओ खुदई जुबाब दे सकै ह।”

²²बिका घरका आ बात इ ताँई बोल्या, क्युं क बे यहूदि अधिकारीयाऊँ डरता हा। क्युं क बे सगळा एक मत होर्या हा, क जखो बी ईसुनै मसी कर मानसी बिनै अरदास करबाळी झघा म बड़बा कोनी दिओ जासी।

²³जणाई तो बिका घरका खया हा क, “ओ टाबर तो आथ कोनी। ओ खुदई बता देसी!”

²⁴दुसरका बे, बि मिनखनै बुलाया जखो जलमऊँ आँदो हो अर बिऊँ बोल्या, “तनै आँख्या मिली इ ताँई परमेसर की जे-जैकार कर! बि मिनख को नइ क्युं क म्हें जाणा हा बो मिनख पापी ह।”

²⁵बो बोल्यो, “म कोनी जाणू क बो पापी ह क कोनी पण म एक बात जाणू हूँ क, म पेली आँदो हो अर इब देख सकूँ हूँ।”

²⁶जणा बे बिऊँ बुज्या, “बो तेरै सागै काँई कर्यो? कंय्यांसिक बो तनै आँख्या दि?”

²⁷बो बोल्यो, “म तो थानै सगळी बाता पेलीई खेदी, पण थे कोनी सुण्या। जणा पाछै इब ओज्यु थे कय्यालै सुण्बो चाओ हो? के थे बी बिका चेला बणबो चाओ हो?”

²⁸बे बिकी बेजती करी अर बोल्या, “तूई होगो बिको चेलो, म्हें तो मूसा का चेला हां।

²⁹म्हें जाणा हां क परमेसर मूसाऊँ बतळायो हो, पण इकै बारां म कोनी जाणा क ओ कठैऊँ आयो ह।”

³⁰बो मिनख बोल्यो, “आ तो ताजूब की बात ह! थे बि मिनख क बारां म जाणोई कोनी क, बो कठैऊँ आयो ह। पण देखल्यो, बो मेरी आँख्या खोल दि।

³¹म्हें जाणा हा क परमेसर पाप्या की कोनी सुणै, पण भगता की जखा बोई करै जखो बो बाऊँ चावै ह, अंय्यांलका की परमेसर सुणै ह।

³²इ सरस्टि की सरूआतऊँ कदैई सुणबा म कोनी आयो क, कोई जलम का आँदानै आँख्या दि।

³³ज ओ मिनख परमेसर कानिऊँ नइ होतो जणा क्युंई कोनी कर सकै हो।”

³⁴बे बिऊँ बोल्या, “तू तो पापऊँ जलम्यो ह, तू म्हानै काँई सीखावै ह ?” अर बे बिनै अरदास करबाळी झघाऊँ बारनै काड दिआ।

³⁵जद ईसु, जोक्यु होयो बिकै बारां म सुण्यो, जणा बो बिऊँ मिलर बोल्यो, “के तू मिनख का बेटा प बिस्वास करै ह?”

³⁶बो मिनख बोल्यो, “म्हराज, थे मनै बताओ बो कूण ह, जिऊँ म बिपै बिस्वास करूं।”

³⁷ईसु बिऊँ बोल्यो, “तू बिनै देख लिओ, अर जखो तेरै सागै बतळार्यो ह।”

³⁸बो बोल्यो, “परबु, म बिस्वास करूं हूँ!” अर बिकै पगा म धोक खाई।

³⁹ईसु बोल्यो, “म इ जगत म न्याय करबा आयो हूँ, जिऊँ आँदा देख सकै अर आँख्या हाळा आँदा होज्या।”

⁴⁰क्युंक फरिसी जखा बिकन खड़्या हा, बे अ बाता सुणर बोल्या, “के तू म्हानै आँदा बतार्यो ह?”

⁴¹ईसु बाऊँ बोल्यो, “ज थे आँदा होता जणा पापी कोनी होता। पण बोलो हो क, ‘म्हानै सुजै ह’ जणाई तो थारो पाप बण्यो रेह्‍वै ह।”