Read Shekhawati काम 10 Bible Online

काम 10 - Shekhawati bible

काम 10

¹कैसरिया म कुरनेलियुस नाम को एक मिनख हो, जखो सो सिपाईड़ा की रोमी फोज की इटाली पलटण को सुबेदार हो।

²बो परमेसर को भगत हो जखो आपका पूरा परवार समेत ईस्बर को डर मानतो हो, बो सदाई गरीबानै दान दिआ करतो हो अर परमेसरऊँ अरदास कर्या करतो हो।

³जणा एक दिन बिनै दिन का तीन बजै दरसाव होयो क परमेसर को एक ईस्बर नगरी दुत बिकन आर बिऊँ बोल्यो, “ओ कुरनेलियुस!”

⁴जणा कुरनेलियुस डरतोई बिकै कानि देखर बोल्यो, “ओ परबु काँई ह?” जणा बो बोल्यो, “तेरी अरदास अर दिन दुख्यानै दियड़ो तेरो दान परमेसर क कनै पुगगो ह अर बिनै बो बोळो चोखो लाग्यो ह।

⁵अर इब तू अंय्यां कर याफा म क्युंक मिनख भेजर समोन जिनै लोग पतरस बोली हीं बुलवा ले।

⁶बो चमड़ा को धंधो करबाळा समोन क घरा रूकर्यो ह जिको घर समदर क किनारा प ह।”

⁷परमेसर का ईस्बर नगरी दुत क जाबा क पाछै बो आपका दो नोकरानै अर एक सिपाईनै जखो एक भगत हो अर बिको खास सेवक हो बिनै बुलवायो।

⁸अर बानै सक्यु बतार याफा भेज्यो।

⁹आगला दिन बे चालता-चालता दोपारी म नगरी क सांकड़ै लाग्या अर ठिक बि टेमई पतरस अरदास करबा छात प चढ्यो।

¹⁰इकै पाछै बिनै भूख लाग्याई अर बो क्युं खाबा की मन म करी। अर जद रोटी बणावा हा जणा बिनै दरसाव होयो।

¹¹अर बिनै दिख्यो क आसमान खुलगो अर च्यारू कूणाऊँ लटकायड़ी एक बडीसारकी चादर निचै धरती प उतररी ही।

¹²बिपै धरती का च्यार टांगा हाळा अर रिंगबाळा ज्यानबर अर आसमान का पंछी हा।

¹³बिनै सुण्यो, “पतरस खड़्यो हो आनै मार'र खाले।”

¹⁴जणा पतरस बोल्यो, “नइ परबु कदैई नइ क्युं क म हाल ताँई कोईबी सूगली अर बरजेड़ी चिज कोनी खाई।”

¹⁵इकै पाछै ओज्यु बिका काना म उवाज आई, “जोक्यु परमेसर सुद कर्यो ह बिनै बरजेड़ो मना खे।”

¹⁶तीन बर अंय्यांई होबा क पाछै हात्युहातई बि चादरासानै आसमान म उठा लिओ गयो।

¹⁷पतरस बि दरसाव क बारां म सोचई रिह्यो हो क ओ काँई होबो चाए अत्ता मई कुरनेलियुस का भेजेड़ा मिनख समोन का घर को ठिडो बुजता बिका बारना पई आर खड़्या होगा।

¹⁸अर हेलो देर कह्या, “समोन जिनै पतरस बोलीं हीं बो अठैई ह के?”

¹⁹पतरस हाल बि दरसाव क बारां म बिचार करर्योई हो क पबितर आत्मा बिनै बोली , “देख बारनै तीन मिनख तनै ढुंढीं हीं।

²⁰जणा इब तू खड़्यो होर तळै जा अर बिना झिजकै बाकै सागै होले क्युं क बानै मई भेज्यो हूँ।”

²¹आ सुणर पतरस तळै आगो अर बाऊँ बोल्यो, “जिनै थे ढुंढो हो बो मई हूँ बोलो थारै आबा क पिछै काँई बात ह?”

²²जणा बे बिऊँ बोल्या, “म्हारी पलटण को सुबेदार कुरनेलियुस जखो धरमी अर परमेसरऊँ डरबाळो मिनख ह, सगळा यहूदि मिनखा म जिकी बूज ह बो एक परमेसर का पबितर ईस्बर नगरी दुतनै दरसाव म देख्यो अर बो दुत बिनै बोल्यो ह की बो तनै बुलार तेरूँ परमेसर को बचन सुणै।”

²³जणा बो बानै मांयनै बुलार बाकी आवभगत करी। दुसरा दिन बो उठर बाकै सागै गयो अर क्युंक याफा का भाईड़ा बी बिकै सागै होलिआ।

²⁴आगला दिन बे कैसरिया म पुग्या अर कुरनेलियुस आपका रिस्तेदारानै अर भाईलानै भेळा कर बानै उडिकर्यो हो।

²⁵जद पतरस मांयनै बड़र्यो हो जणा कुरनेलियुस पतरसऊँ मिल्यो अर बिकै पगा म माथो टेकर बिकै धोक खाई;

²⁶जणा पतरस बिनै खड़्यो कर बोल्यो, “म बी तेरी जंय्यां एक मिनखई तो हूँ।”

²⁷जणा पाछै पतरस बिऊँ बतळातो मांयनै आयो अर बठै बोळा सारका मिनख भेळा होर्या हा।

²⁸जणा बो बाऊँ बोल्यो, “जंय्यां क थे पेलीऊँ जाणोई हो क एक यहूदि मिनख को गैर-यहूदि मिनखऊँ कोई समंद राखबो अर बिका घरा आबो जाबो बरजेड़ो ह, पण परमेसर मनै दिखायो ह क, नइ तो कोई मिनख सूगलो ह अर नइ निची जात को ह।

²⁹जणाई तो थे जद मनै बुलाया जणा म बिना क्युं बोल्याई आगो। इब थे मनै बताओ, मनै क्याले बुलवाया हो?”

³⁰जणा कुरनेलियुस खेबा लाग्यो, “आजऊँ ठिक च्यार दिन पेल्या जद म दिन का तीन बजै मेरै घरा अरदास करबा लागर्यो हो जणा म देख्यो क एक मिनख मेरै सामै आर खड़्यो होगो बिका गाबा भळका मारर्या हा।

³¹अर बो मेरूँ बोलबा लाग्यो कुरनेलियुस तेरी अरदास अर दिन दुख्यानै दियड़ो तेरो दान परमेसर क कनै पुगगो ह अर बिनै बो बोळो चोखो लाग्यो ह।

³²जणा तू इब अंय्यां कर याफा म कोईनै भेजर समोन नाम का मिनख जिनै पतरस बी बोलीं हीं बुलाबा भेज, बो चमड़ा को धंधो करबाळा समोन क घरा डटर्यो ह।

³³जणा म हात की हात तेरै कनै मिनख भेज्या, अर तू बी ठिक कर्यो जखो आकै सागै आगो। अर इब म्हें परमेसर क आगै इ ताँई भेळा होर्या की जोक्यु तनै परबु ओडायो ह बे सगळी बाता तेरूँ सुण सकां।”

³⁴जणा पतरस खेबा लाग्यो, “इब मनै पक्को बेरो पड़गो की परमेसर कोई भेद-भाव कोनी करै।

³⁵बो धरती का सगळा मिनखानै अपणावै जखा बिको डर मानै अर नेक काम करै चाए बो कोईबी हो।

³⁶परमेसर इजरायली मिनखानै चोखा समचार को संदेस दिओ क ईसु मसीऊँ थानै स्यांती मिलसी। जखो सगळा को परबु ह।

³⁷यहून्ना लोगानै पाणी को बतिस्मो लेबा क बारां म परचार करबा क पाछैऊँ, गलिलऊँ चालू होर सगळा यहूदिआ म जखी बाता होई बानै थे जाणो हो।

³⁸जंय्यां क थे जाणोई हो क परमेसर, कंय्यां पबितर आत्मा अर सक्‍तिऊँ ईसु नासरी को अभिसेक कर्यो। बो च्यारूमेर जार भलाई करतो अर सेतान का सतायड़ा सगळानै निरोगो करतो क्युं क परमेसर बिकै सागै हो।

³⁹म्हें बा सगळा कामा का गुवा हा जखा बो यहूदिआ अर यरूसलेम म कर्यो हो अर बिनैई बे सुळी प लटकार मार गेर्यो।

⁴⁰पण तीसरा दिन बिनै परमेसर ओज्यु जिंदो कर म्हारै प परगट कर्यो।

⁴¹सगळा प नइ पण बा गुवा प जानै परमेसर पेल्याऊँ टाळ राख्या हा, अर जखा बिकै ओज्यु जीबा क पाछै बिकै सागै खाया अर पीआ हा।

⁴²अर बो म्हानै हेलो पाड़बा अर गुवाई देबा को आदेस दिओ की परमेसर बिनैई मरेड़ा अर जीवता को न्याय करबाळो बणायो ह।

⁴³अर सगळा परमेसर की खेबाळा बिकै बारां म गुवाई दि ही की जखो बी बिपै बिस्वास करसी बिका पाप ईसु मसी क नाम म धुप ज्यासी।”

⁴⁴पतरस बोलर्योई हो, अत्ती बारां मई बा सगळा सुणबाळा प पबितर आत्मा उतर्यो।

⁴⁵पतरस क सागै आएड़ा सुन्नत होयड़ा यहूदि बिस्वासी आ देखर ऊक-चूक होगा की पबितर आत्मा को बरदान जखा गैर-यहूदि हीं बानै बी दिओ जार्यो ह।

⁴⁶क्युं क बे बानै भात-भात की बोली म परमेसर को गुणगान करता सुणर्या हा। जणा पतरस बोल्यो,

⁴⁷“आ सगळानै आपणी जंय्यांई पबितर आत्मा मिली ह, जणा इब कोई आनै पाणी को बतिस्मो लेबाऊँ मना कर सकै ह के?”

⁴⁸अर जणा पाछै पतरस बानै ईसु मसी क नाम म पाणीऊँ बतिस्मो लेबा ताँई हुकम दिओ। इकै पाछै बे सगळा पतरसऊँ हात जो'ड़र कह्या की बो थोड़ा घणा दिन ओर बाकै सागै रेह्‍वै।