Read Shekhawati काम 13 Bible Online

काम 13 - Shekhawati bible

काम 13

¹अंताकीया की बिस्वासी मंडळी म परमेसर की खेबाळा अर उपदेस देबाळा कई हा, जंय्यां की बरनाबास, समोन जिनै काळ्यो बी बोलता हा अर कुरेन को लूकियुस अर देस की चोथी पाँती को राजपाल हेरोद[10] को गोद आयड़ो भाई मनाएम, अर साऊल।

²जद बे बरत क सागै परमेसर की भगती करर्या हा बि टेमई पबितर आत्मा बाऊँ बोली, “मेर ताँई बरनाबास अर साऊलनै बि काम ताँई नाकै टाळो जि काम ताँई बानै बुलायो गयो ह।”

³जणा बे बरत अर अरदास कर बाकै माथा प हात म्हेलर बानै बिदा कर्या।

⁴पबितर आत्मा क कह्या गेल बरनाबास अर साऊल सिलूकीया गया जठैऊँ झाज म बेठर साईपरस नाम का टापू प पुग्या।

⁵अर बे बि टापू की सलमीस नगरी म पुगर बठै यहूदिआ की अरदास करबाळी झघा म परमेसर का बचन सुणाया, अर यहून्ना जिनै मरकुस बी बोलीं हीं, एक मददगार की जंय्यां बाकै सागै हो।

⁶अर बे, बि सगळा टापूऊँ होताहोया बि टापू क परलै नाकै की नगरी पाफुस म पुग्या। जठै बानै बार-ईसु नाम को एक यहूदि जादूगर अर झूठो परमेसर की खेबाळो मिनख मिल्यो।

⁷अर बो राजपाल सिरगियुस-पोलुस जखो दिमागऊँ बोळो तेज हो बिकै सागै हाळो मिनख हो, ओ सिरगियुस-पोलुस बरनाबास अर साऊलनै आपकै कनै बुलार बाऊँ परमेसर को बचन सुणबो चातो हो।

⁸पण बार-ईसु जादूगर जिको नाम यूनानी भासा म अलिमास हो, बो बाको बिरोद कर टापू का राजपालनै परमेसर प बिस्वास करबाऊँ रोकबो चायो।

⁹जणा साऊल पबितर आत्माऊँ भर'र जिनै पोलुस बी बोलीं हीं[11] बिकै कानि एक टक देख्यो।

¹⁰अर बोल्यो, “सगळा छळ कपटऊँ भरेड़ा सेतान की ओलाद, भलाई का बेरी। तू परमेसर का सचा अर सिदा गेलानै तोड़बो मोड़बो कोनी छोडै के?”

¹¹जणा ले इब तेरै प परमेसर को हात पड़्यो ह, अर इब तू आँदो होज्यासी अर क्युंक टेम ताँई दिन का च्यानणानै कोनी देखसी। अत्ती खेताई बिकी आँख्या क आगै अँधेरोसो होगो अर अठिनै-बठिनै टपटोळा मारबा लागगो जिऊँ कोई बिको हात पकड़र बिनै लेज्यावै।

¹²जणा टापू को राजपाल आ देखर परबु की सीख प ताजूब क सागै बिस्वास कर्यो।

¹³पोलुस अर बिकाळा साती पाफुसऊँ झाज म बेठर पंफुलिया की पिराग नगरी म आया; पण यहून्ना जिनै मरकुस बोलता हा बानै छोडर यरूसलेम चलेगो।

¹⁴अर बे बठैऊँ चालर पिसदिआ का अंताकीया म आया अर अरामहाळा दिन अरदास करबाळी झघा म जार बेठगा।

¹⁵मूसा का नेम-कायदा अर परमेसर की खेबाळा की पोथी मऊँ बाचर अरदास घर का अधिकारी बाऊँ बोल्या, “यहूदि भाईड़ो, मिनखानै देबा ताँई थारै कनै कोई उपदेस ह तो आर ख्यो।”

¹⁶जणा पोलुस खड़्यो होर आपका हात को इसारो मिनखा कानि कर बोल्यो, “परमेसरऊँ डरबाळो गैर-यहूदिओ अर इजरायली मिनखो ध्यानऊँ सुणो।

¹⁷इजरायली मिनखा को परमेसर आपणा बाप-दादानै आप ताँई टाळ लिओ हो। अर जद अ मिसर म परदेसी होर रेह्ता हा जणा बो आनै बठै फळायो अर आपकी ताकतऊँ बानै बठैऊँ छुटा ल्यायो।

¹⁸अर करीब चाळिस बरसा ताँई बो बानै उजाड़ म बरदास करतो रिह्यो।

¹⁹अर कनान देस का सात राजनै नास कर बो बा धरती इजरायली मिनखानै बाकी बापोत होबा ताँई दे दि।

²⁰आ बाता म करीब साडे च्यार सो बरस लाग्या हा। इकै पाछै परमेसर की खेबाळा सेमुएल क टेम ताँई परमेसर बानै न्याय करबाळा दिआ।

²¹इकै पाछै बे परमेसरऊँ एक राजा की माँग करी जणा परमेसर बिन्यामीन का गोत मऊँ एक मिनख किस का छोरा साऊलनै बापै चाळिस बरसा ताँई राजा बणायो।

²²इकै पाछै परमेसर साऊल की झघा दाऊदनै बाको राजा बणायो; जिकै बारां म बो बोल्यो की, ‘यिसै को छोरो दाऊद जखो मेरा हिया जंय्यां को ह मनै मिलगो, जखो मेरी सगळी इंछ्यानै पूरी करसी।’

²³इ मिनख क कूणबा मऊँई परमेसर आपका वादा गेल इजरायल का मिनखानै छुटाबाळा ईसुनै भेज्यो।

²⁴बिकै आबाऊँ पेली यहून्ना सगळा इजरायली मिनखा म पापऊँ तौबा कर पाणी को बतिस्मो लेबा को परचार करतो हो।

²⁵जद यहून्ना आपको काम पूरो करबाळो हो जणा बो मिनखानै बोल्यो, ‘थे जखो मनै समजर्या हो, म बो कोनी हूँ बो तो मेरै पाछै आसी अर म तो बिकाळा जूता का सळू खोलबा जोगोई कोनी हूँ।’

²⁶सुणो मेरा यहूदि भाईड़ो, अब्राहम की संतानो अर गैर-यहूदि परमेसर का भगतो! छुटकारा का अ बचन थारै कनैई पुग्या हीं।

²⁷यरूसलेम का रेह्बाळा अर यहूदि नेता आ कोनी जाण्या क ईसुई छुटाबाळो ह, अर अरामहाळा दिन सीखाया जाबाळा बे बचन जखा परमेसर की खेबाळा क कानिऊँ मांड्या गया हा, बाका भेद बी कोनी जाण्या। पण ईसु प दोस लगार सास्तर का बा बचनानै बे पूरा कर्या।

²⁸बानै बिमै मारबा जंय्यां को कोई दोस कोनी लाध्यो इकै पाछै बी बे पीळातुसऊँ बिनै मारबा की माँग करी।

²⁹अर जद बे बिकै बारां म मंडेड़ी सगळी बातानै पूरी करली, जणा बे बिनै सुळीऊँ तळै उतार बिकी लासनै एक कबर क मांयनै धर दिआ।

³⁰पण परमेसर बिनै मरेड़ा मऊँ ओज्यु जिंदो कर्यो।

³¹अर बो बानै जखा बिकै सागै गलिलऊँ यरूसलेम आया हा, बोळा दिना ताँई दिखतो रिह्यो अर इब बेई मिनखा क सामै बिका गुवा हीं।

³²म्हें थानै परमेसर का बि करार का चोखा समचार को परचार करर्या हां जखो आपणा बडका क सागै कर्यो गयो हो।

³³परमेसर ईसुनै ओज्यु जीवार, बा बात आपणा ताँई पूरी करी ह, जखा बिकी संतान हां, जंय्यां की दुसरा भजन म मंडेड़ो ह क, ‘तू मेरो छोरो ह, अर म आजई तेरो बाप बण्यो हूँ।’

³⁴अर बिनै अंय्यां मरेड़ा मऊँ ओज्यु जिंदो कर दिओ जिऊँ बो कदैई नइ सिडै़। इ ताँई परमेसर बोल्यो क, ‘म दाऊद क सागै करार करेड़ी सगळी पबितर अर पक्काइऊँ होबाळी बरकत तेरै प करस्युं।’

³⁵जणाई बो एक दुसरा भजन म अंय्यां बोल्यो की, ‘तू तेरा पबितर मिनखनै कबर म सिड़बा कोनी देवै।’

³⁶अर दाऊद तो परमेसर की इंछ्या गेल आपका टेम म सेवा कर मरगो अर बिनै बठैई गाड्यो गयो जठै बिका बडका गडर्या हा अर बाकी लास सिड़गी।

³⁷पण परमेसर जिनै मरेड़ा मऊँ जिंदो कर्यो बो कोनी सिड़यो।

³⁸जणा यहूदि भाईड़ो, थे जाणल्यो क ईसुई ह जिकै जरिए थार प पापऊँ माफी की घोसणा करी ह।

³⁹थानै नेम-कायदा गेल छुटकारो कोनी मिल सकै, पण जखो बी बिपै बिस्वास करसी बिनै सगळा पापऊँ अजाद कर्यो जासी अर परमेसर क सामै धरमी बणायो जासी।

⁴⁰इ ताँई चेता म रेह्‍वो अंय्यां नइ हो क जोक्यु परमेसर की खेबाळा बोल्या हीं बा थारै सागै नइ होवै। क्युं क परमेसर की खेबाळा की पोथी म मंडर्यो ह,

⁴¹‘हसी करबाळो! अचरज कर मरज्यावो! क्युं क म आ दिना म अंय्यां को काम करबाळो हूँ, जिकै बारां म ज थानै कोई बतातो जणा बी थे बिपै जमाई बिस्वास कोनी करता।’”

⁴²अर जद बे आपको उपदेस देर बठैऊँ जार्या हा जणा बानै सुणबाळा मिनख बाऊँ बोल्या, “आगला अरामहाळा दिन म्हानै अ बाता ओज्यु सुणाज्यो।”

⁴³सभा क खतम होबा क पाछै यहूदि अर गैर-यहूदि जखा यहूदि धरम पंथ म रळेड़ा भगत हा बे पोलुस अर बरनाबास क गेल होलिआ। पोलुस अर बरनाबास बाऊँ बात कर बानै समजाया की परमेसर की दया म बण्या रेह्ओ।

⁴⁴इकै पाछै आगला अरामहाळा दिन करीब सगळी नगरी परबु को बचन सुणबा ताँई भेळी होई।

⁴⁵इ भीड़नै देखर यहूदि बळगा अर पोलुस की बाता क खिलाप बोलता होया बिकी बुराई करी।

⁴⁶जणा पोलुस अर बरनाबास हिमत कर बोल्या, “ओ जरूरी हो क परमेसर को बचन सऊँ पेली थानै सुणायो जावै पण थे इनै थारूँ दूर कर्या अर खुदनै अजर-अमर जीवन को भागी कोनी मान्या जणा इब म्हें गैर-यहूदिआ क कनै जावां हां।

⁴⁷क्युं क अ आदेस म्हानै परबु दिओ ह। बो बोलै ह, ‘दुसरा देसा ताँई म थानै च्यानणो बणायो हूँ। जिऊँ ओ होवै की थारै जरिए मुक्‍ति को ओ संदेसो धरती का सगळा मिनखा म फेल जावै।’”

⁴⁸आ सुणर गैर-यहूदि मिनख बोळा राजी होया अर परबु का बचना की मेमा करबा लागगा। अर जत्ता बी अजर-अमर जीवन ताँई टाळेड़ा हा बे बिस्वास कर्या।

⁴⁹अर सगळा परदेस म परबु को बचन फेलगो।

⁵⁰पण यहूदि नेता, गैर-यहूदिआ की मानी-थानी यहूदि धरमनै मानबाळी भगत लूगाया अर नगरी का मान्या-थान्या मिनख जखा परमेसरनै मानबाळा हा बाका कान भर पोलुस अर बरनाबास क खिलाप बिदरो कर बानै, बि नगरी क बारनै कढवा दिओ।

⁵¹जणा पोलुस अर बरनाबास बानै चेताबा ताँई आपकै पगा की धूळ झाड़र बठैऊँ इकोनियुम चलेगा।

⁵²अर बठिनै अंताकीया का बिस्वासी राजी होर्या हा अर बे पबितर आत्माऊँ भरता गया।