Read Shekhawati काम 14 Bible Online

काम 14 - Shekhawati bible

काम 14

¹इकोनियुम म पोलुस अर बरनाबास अरदास करबाळी झघा म गया अर बठै उपदेस दिआ जिऊँ यहूदि अर यूनानी, बोळा मिनख बिस्वास कर्या।

²पण बे यहूदि जखा बिस्वास कोनी कर्या हा बे गैर-यहूदि मिनखानै बिस्वासी भाया क खिलाप भड़काया अर बाकै मना म झेर भर दिओ।

³पोलुस अर बरनाबास बोळा दिना ताँई बठैई रिह्या अर बिना कोई डर क परचार करता रिह्या। अर परबु बी बाका हाताऊँ अचरजभर्या काम अर चमत्कार दिखार आपकी दया का संदेसनै साबित कर्यो।

⁴अर नगरी म अंय्यां होयो क मिनखा म फूट पड़गी। कोई भेजेड़ा चेला को तो कोई यहूदि पंथ को हिमायत्यो होयो।

⁵पण जद यहूदि अर गैर-यहूदि मिनख आपका नेता सेत्युं बाकी बेजती करबा अर भाठा मारबा की सोची।

⁶जणा बानै इको पेल्याई बेरो पड़गो अर बे बाकै आबाऊँ पेलीई लिकोनिआ का लुस्तरा अर दिरबे नाम की नगर्या अर कनै का इलाका म भाग छुट्या।

⁷अर बठै परमेसर का चोखा समचार को परचार करबा लागगा।

⁸लुस्तरा म एक अंय्यां को मिनख हो जिकी टांग्या म जमाई जान कोनी ही बो जलमऊँई लंगड़ो हो।

⁹बो पोलुसनै ध्यानऊँ सुणबा लागर्यो हो जणा पोलुस बिकै कानि देख्यो अर बिमै निरोगो होबा को बिस्वास देखर

¹⁰जोरऊँ बोल्यो, “खड़्यो हो।” अर अत्ती खेताई बो खड़्यो होगो अर उछळबा कुदबा लागगो।

¹¹ओ चमत्कार देखर लुस्तरा का मिनख लिकोनिआ भासा म बोलबा लाग्या क , “मिनख रूप म खुद देवता आपणा कनै आया हीं।”

¹²बे बरनाबासनै जयुस[12] अर पोलुसनै हरमेस[13] कह्या क्युं क बो बोलबाळा म मुखियो हो।

¹³नगरी क बारला नाकै जयुस को देवरो हो। अर बि देवरा को पुजारी सांड अर माळा लेर नगरी का बारना प आयो क्युं क बो मिनखा क सागै पोलुस अर बरनाबास ताँई बलि देबो चाओ हो।

¹⁴अर जद भेजेड़ा चेला पोलुस अर बरनाबासनै इ बात को बेरो पड़्यो जणा बे आपका गाबा पा'ड़र बि भीड़ म कुदगा अर बाऊँ जोरऊँ खेबा लागगा,

¹⁵“थे काँई करो हो म्हें बी तो थारी जंय्यां का मिनख हां, म्हें तो थानै चोखा समचार सुणाबा आया हां क थे आ बेकाम की चिजानै छोडर बि जीवता परमेसरनै जाणो, जखो ईस्बर नगरी अर धरती, समदर अर जोक्यु बिमै ह बानै बणायो ह।

¹⁶बितेड़ा टेम म बो धरती का सगळा मिनखानै बाकी इंछ्या गेल चालबा दिओ।

¹⁷इकै पाछै बी बो खुदनै साबित करतो होयो, भलाई करी अर आसमानऊँ टेम-टेम प मी बरसार धरती प चोखी फसल उगार आपणानै देवै ह जिऊँ आपणो मन राजी होवै ह।”

¹⁸अ सगळी बाता बोलबा क पाछै बी, बे बोळी मुस्किलऊँ भीड़नै बलि देबाऊँ रोक्या।

¹⁹इकै पाछै अंताकीया अर इकोनियुम नगर्याऊँ क्युंक यहूदि आर भीड़नै भड़कार खुद म मिला लिओ। अर बे पोलुसनै भाठाऊँ मार'र बिनै मरेड़ो समजर बिनै नगरी क बारनै घिसर गेर दिआ।

²⁰पण जद चेला बिकै च्यारूमेर भेळा होया जणा बो खड़्यो होर नगरी म आयो अर दुसरा दिन बरनाबास क सागै दिरबे चलेगो।

²¹बि नगरी म बे परमेसर का समचार सुणार बोळा चेला बणार लुस्तरा अर इकोनियुम होताहोया पिसदिआ का अंताकीया म आगा,

²²अर चेलानै समजाता अर हिमत बंधाता हा क, “बिस्वास म बण्या रेह्ओ अर परमेसर का राज म बड़बा ताँई आपानै बोळा दुख भोगणा पड़सी।”

²³अर बे सगळी बिस्वासी मंडळ्या म मुखिया टाळ्या अर बरत क सागै अरदास कर बानै परबु क हाता म सूप दिआ जिपै बे बिस्वास कर लिआ हा।

²⁴जणा पाछै बे पिसदिआ क गेला होर पंफुलिया नाम का इलाका म गया।

²⁵अर पेरगे म बचन सुणार अतालिआ आया।

²⁶बठैऊँ बे न्याव प सवार होर अंताकीया गया जठै बे बि कामनै हाल पूरोई कर्यो हो जि ताँई बानै परमेसर का हाता म सूप्यो गयो हो।

²⁷बठै जार बे बिस्वासी मंडळी की सभा बुलार बानै बे सगळी बाता खे सुणाई जखी परमेसर गैर-यहूदिआ क मांयनै बाकै हाता करवायो अर कंय्यां गैर-यहूदि मिनखा ताँई सचा परमेसरनै मानबा को गेलो खुल्यो।

²⁸बे बोळा दिना ताँई बठैई बिस्वास्या क सागै रिह्या।