Read Shekhawati काम 16 Bible Online

काम 16 - Shekhawati bible

काम 16

¹इकै पाछै पोलुस दिरबे अर लुस्तरा म गयो बठै बिनै तिमूतियूस नाम को एक चेलो मिल्यो जिकी माँ यहूदि बिस्वासण ही पण बिको बाप यूनानी हो।

²बो मिनख लुस्तरा अर इकोनियुम का बिस्वासी भाया म पेठहाळो हो।

³पोलुस क आ मन म ही की बो बिकै सागै चालै, जणा बठै का यहूदि मिनखा क चलतै बो बिकी सुन्नत करी क्युं क बे सगळा जाणता हा क इको बाप यूनानी ह।

⁴अर नगरी-नगरी जार बे, बा आदेसानै जानै यरूसलेम का भेजेड़ा चेला अर बिस्वासी मंडळी का मुखिया बणाया हा बानै सीखाता अर मनवाता हा।

⁵अंय्यां करता-करता बिस्वासी मंडळ्या बिस्वास म मजबूत होती गई अर गिणती म बढती गई।

⁶बे फरूगिया अर गलातिया परदेसा म होर गया, क्युं क पबितर आत्मा बानै एसिया म बचन सुणाबा ताँई मना कर दिओ हो।

⁷बे मूसिया क कनै पुगर बितूनिया जाबो चावा हा पण ईसु की पबितर आत्मा बानै बठै बी जाबा कोनी दि।

⁸जणा बे मूसियाऊँ होर तरोआस म आया।

⁹बठै पोलुस एक दरसाव देख्यो। अर बि दरसाव म बो काँई देखै ह क एक मकीदुनिया को मिनख बिनै हात जो'ड़र खेर्यो ह क, “थे मकीदुनिया आर म्हारी मदद करो।”

¹⁰बिकै ओ दरसाव देखताई म्हें मकीदुनिया जाबो चाया क्युं क परमेसर म्हानै बठै चोखो समचार सुणाबा ताँई बुलायो ह।

¹¹तरोआस नगरीऊँ रवाना होबा क पाछै म्हें पाणी का झाज म बेठर समोथराके, दुसरा दिन निआपोलिस पुग्या

¹²अर बठैऊँ बे जमीन क गेला फलिपी पुग्या। फलिपी मकीदुनिया परदेस की मानेड़ी नगरी अर रोमी मिनखा की बस्ति ही। म्हें क्युंक दिन बठै रिह्या।

¹³यहूदिआ क अरामहाळा दिन म्हें आ सोचर नगरी का दरूजा क बारनै नदि किनारै गया की बठै कोई अरदास करबा की झघा होगी। म्हें बठै बेठगा अर बा लूगायाऊँ बतळाबा लागगा जखी बठै भेळी होरी ही।

¹⁴बा लूगाया म थुआतिरा नगरीऊँ लुदिआ नाम की एक लूगाई ही जखी मेंगा भाव का गाबा बेच्या करती ही अर बा परमेसर की भगत ही। परबु बिका मन का पाट खोल दिआ अर बा पोलुस की बाता प गोर करी।

¹⁵अर आपका टाबर-टिकरा सेत्युं बतिस्मो लेबा क पाछै बा म्हारूँ बोली, “ज थे मनै परबु की सची बिस्वासण मानो हो जणा चालर मेरै घरा रेह्ओ ,” अर बा म्हानै मनार लेगी।

¹⁶म्हें जद अरदास करबा हाळी झघा म जार्या हा जणा म्हानै एक दासी मिली जिमै हूँण बताबाळी बलाय ही अर मिनखा की हूँण बतार बा आपका मालिकानै बोळा पिसा कमार देरी ही।

¹⁷जणा बा म्हारै गेल आर कूकबा लागी की, “अ मिनख सचा परमेसर का दास हीं जखा थानै छुटकारा को गेलो दिखावीं हीं।”

¹⁸बा बोळा दिना ताँई अंय्यांई करती री जणा पोलुस दुखी होर बि नुगरी ओपरी बलायऊँ बोल्यो, “म ईसु मसी का नामऊँ तनै आदेस द्‍युँ हूँ क तू इमैऊँ निकळज्या।” अर बा अत्तो खेताई बिमैऊँ निकळगी।

¹⁹बिका मालिक आ देखर क आपणी कमाई को सादन तो जातो रिह्यो जणा बे पोलुस अर सीलासनै खिंचर चोक म परधान क कनै लेग्या।

²⁰बे बानै न्याय करबाळा क आगै लेग्या अर बाऊँ कह्या क , “अ यहूदि मिनख ही जखा आपणी नगरी म खळबळी मचा राखी ह।

²¹अर अ आपणा मिनखानै अंय्यां का रिती-रिवाज सीखार्या हीं जानै मानबो अर बापै चालबो रोम्या का नियमा क खिलाप ह।”

²²बाकै खिलाप भीड़ बी भेळी होर बोलबा लागी। जणा पाछै न्याय करबाळा बाका गाबल्या फड़वार बाकै तड़ा मराबा को हुकम दिआ।

²³बाकै अणमेदा का तड़ा पड़वार बे बानै पाछा कोठड़ी म बंद कर दिआ अर कोठड़ी का दरोगानै सूल पेरो देबा ताँई आदेस दिओ।

²⁴जणा बो दरोगो आदेस गेल बानै मांयली कोठड़ी म बंद कर बाका पगानै काठ म ठोक दिआ।

²⁵आदी रातनै पोलुस अर सीलास अरदास अर परमेसर का भजन गाबा लागर्या हा अर बानै सगळा केदि सुणर्या हा।

²⁶अत्ती बारां मई धरती हालगी अर काळ-कोठड़ी की निम तकात हालगी अर सगळा केद्‍या की साँकळा टूटगी अर कुआड़ बी मतैई खुलगा।

²⁷दरोगो जाग्यो अर सगळा कुआड़ खुला देखर सोच्यो क सगळा केदि भाग छुट्या जि बजेऊँ बो खुदनै मारबा ताँई आपकी तलवार काडी।

²⁸जणा पोलुस जोरऊँ बोल्यो, “खुदनै नुकसान मना पुचावै! म्हें सगळा अठैई हां।”

²⁹जणा बो मसाल मंगार मांयनै गयो अर धुजतो-धुजतो पोलुस अर सीलास क पगा म पड़गो।

³⁰अर बो बानै बारनै लेज्यार बुज्यो, “म्हराज छुटकारो पाबा ताँई मनै काँई करबो चाए?”

³¹जणा बे बिऊँ बोल्या, “परबु ईसु म बिस्वास कर। अंय्यां करबाऊँ तू अर तेरो सगळो कूणबो छुटकारो पासी।”

³²इकै पाछै बे बिनै अर बिका घर म भेळा सगळा मिनखानै परबु को बचन सुणाया।

³³बि रातई बो बानै लेज्यार बाका घाव धोया अर आपका सगळा कूणबा समेत रात्यु-रातई बतिस्मो लिओ।

³⁴जणा बो बानै आपकै घरा लेज्यार जिमायो अर आपका पूरा कूणबा सेत्युं परमेसर प बिस्वास कर खुसी मनाई।

³⁵दिन उग्यो जणा न्याय करबाळा सिपाईड़ा क हात खुवा भेज्या की बा मिनखानै छोड द्‍यो।

³⁶जणा बो दरोगो ह जखो पोलुसनै आर बोल्यो, “न्याय करबाळा थानै दोन्यानै छोडबा ताँई ओडाया ह जणा इब थे बारनै आर राजी-खुसी जाओ।”

³⁷पण पोलुस अकड़गो अर बा सिपायड़ाऊँ बोल्यो, “म्हें रोमी होतासोता बी, बे म्हारै प लगाया गया दोस की जाच पड़ताळ कर्या बिनाई म्हारै सगळा क सामै तड़ा मरवार म्हानै कोठड़ी म बंद कर दिआ। अर इब चुपचाला म्हानै छोडर्या हीं, अंय्यां कोनी चालै जद ताँई बे खुद आर म्हानै नइ छोडै म्हें कोनी जावां।”

³⁸आ बात सिपाईड़ा जार बा न्याय करबाळाऊँ बोली जणा बे आ सुणर क बे रोमी हीं डरग्या।

³⁹जणा बे खुद आर बाकै सामै हाता जोड़ी करी अर बठैऊँ बानै बारनै ल्याया अर हात जो'ड़र कह्या, “थे दया कर इ नगरीऊँ चल्या जाओ।”

⁴⁰जणा बे बठैऊँ छुटबा क पाछै सिदा लुदिआ क घरा गया अर बिस्वासी भाईड़ाऊँ मिल-मिलार बानै हिमत बंधार बठैऊँ चलेगा।