Read Shekhawati काम 17 Bible Online

काम 17 - Shekhawati bible

काम 17

¹इकै पाछै बे अम्फिपुलिस अर अपुलोनिया होताहोया थिसलूनिकी म आया, जठै यहूदि मिनखा की एक अरदास करबाळी झघा ही।

²पोलुस आपकी बाण गेल बाऊँ मिलबा गयो अर बाऊँ यहूदिआ क तीन अरामहाळा दिन सास्तर का बचनानै लेर चरचा करी।

³अर धरमसास्तर को बखान कर आ साबित कर्यो क दुख भोगबो अर मरेड़ा मऊँ जिंदो होबो मसी ताँई जरूरी हो। सागैई बो आ बी बोल्यो क, “ईसुई छुटकारो देबाळो राजा ह। जिकी बाता म थानै बताऊँ हूँ।”

⁴बामैऊँ क्युंक जणा बिस्वास कर्या अर पोलुस अर सीलास म जार मिलगा। अंय्यां का बोळा परमेसर का भगत यूनानी मिनख अर मानी-थानी लूगाया बी अंय्यांई करी।

⁵इपै यहूदि जळता-बळता पिसा देर क्युंक बदमास मिनखानै आपकै सागै कर लिओ अर नगरी म बिदरो मचाबा लागगा। बे पोलुस अर सीलासनै भीड़ क सामै ल्याबा क चकर म यासोन क घरा धावो बोल्यो।

⁶बठै बानै बे कोनी लाध्या जणा बे यासोन अर क्युंक भायानै नगरी का अधिकारीया क कनै लेग्या अर चिलार कह्या, “बे सगळी दुनिया का मिनखा म उथल-पुथल मचार इब अठै आया हीं।”

⁷यासोन बानै आपकै घरा राख्यो अर अ सगळा बोली हीं ईसु नाम को कोई ओर राजा ह, अर अ रोम का राजा कैसर को आदेस कोनी मान्यो।

⁸आ सुणर नगरी का मिनख अर नगरी का अधिकारी लाल-ताता होगा।

⁹जणा अधिकारी यासोन अर दुसरा बिस्वास्यानै जमानत लेर छोड दिआ।

¹⁰जणा बठै का बिस्वासी भाईड़ा पोलुस अर सीलासनै रात्यु-रातई बठैऊँ बिरीया भेज दिआ अर बे बठै पुगर सिदा यहूदिआ क अरदास करबाळी झघा गया।

¹¹अठै का यहूदि थिसलूनिकी का यहूदि मिनखाऊँ चोखा हा अर बे पूरा मनऊँ बचननै अपणाया अर बे रोजकी बाकी बोलेड़ी बातानै सास्तर म टोता हा क बे बंय्यांई ह क कोनी।

¹²जिऊँ बोळा मिनख बिस्वास कर्या अर बामै यूनानी मिनख अर मानी-थानी लूगाया ही।

¹³अर जद थिसलूनिकी का यहूदि मिनखानै ओ बेरो पड़्यो की पोलुस बिरीया म बी परमेसर को बचन सुणार्यो ह जणा बे बठै आर भीड़नै बाकै खिलाप भर दिआ।

¹⁴जणा बठै का मसी भाईड़ा तावळासा पोलुसनै बिदा कर समदर किनारै भेज्या पण सीलास अर तिमूतियूस बिरीया मई रेह्गा।

¹⁵पोलुस का साती बिनै एथेंस नगरी ताँई छोडर बिको ओ आदेस लेर आया क सीलास अर तिमूतियूस मेर कनै बेगाऊँ बेगा आवै।

¹⁶पोलुस जद एथेंस म उडिकर्यो हो। जणा बो बि नगरी म मूरत्या की भरमार देखी अर बानै देखर बिकी अन्तर-आत्मा बोळी दुखी होई।

¹⁷जि बजेऊँ बो अरदास करबाळी झघा म यहूदि अर गैर-यहूदि मिनखा क सागै जखा परमेसर का भगत हा। अर रोजकी चोक म आबाळा जाबाळा क सागै बी चरचा करतो हो।

¹⁸बठै बो क्युंक एपिकूरी अर स्तोइकी ज्ञानी मिनखा क सागै बी चरचा करी। क्युंक मिनख कह्या, “ओ गेलो म्हारूँ काँई खेबो चावै ह?” अर क्युंक खेता हा, “लागै ह क ओ कोई पराया देवता की बात करै ह।” क्युं क बो ईसु अर बिकै मर्या पाछै ओज्यु जीबा का चोखा समचार को परचार करतो हो।

¹⁹जणा बे बिनै अरियुपगस[15] की सभा म लेग्या अर बिऊँ बुज्या, “थे आ कूणसी नई सीख देर्या हो।

²⁰थे म्हानै अणजाणी सीख बताओ हो, जणाई म्हें आको मतबल जाणबो चावां हां।”

²¹सगळा एथेंस का रेह्बाळा अर दुसरा देसाऊँ आर बसेड़ा परदेस्या को करीब-करीब सगळो टेम नई-नई बाता खेबा अर सुणबा मई बिततो हो।

²²अरियुपगस की भरी सभा म पोलुस खड़्यो होर बोल्यो, “एथेंस म रेह्बाळो म आयो जणाऊँ देखबा लागर्यो हूँ क थे सगळी बाता म बोळा धरमी हो।

²³म जद हांडतो-फिरतो थारी पूजबा की चिजा देख्यो हो जणा बठै मनै एक अंय्यां की बेदी दिखी जिपै मंडर्यो हो अणजाण देवता ताँई। थे जि ईस्बरनै बिना जाण्या पूजो हो म थानै बि ईस्बर क बारां मई बताऊँ हूँ।

²⁴बो परमेसर जखो इ सरस्टि अर इपै जोक्यु बी दिखै ह बिनै बणायो अर बोई ईस्बर नगरी अर धरती को मालिक ह। बो हाताऊँ बणाएड़ा देवरा म कोनी रेह्‍वै।

²⁵बिनै काँई बात की कमी? जखो बो मिनखा की सेवा लेवै? बो तो सगळा जिवांनै सांस, जीवन अर सक्यु देवै ह।

²⁶बो एकई मिनख क जरिए इ धरती प च्यारूमेर मिनख फेलाया। अर बाका टेम अर परदेसा की सीमा ते करी।

²⁷अर बो अंय्यां इ ताँई कर्यो क, मिनख बिनै टोवै अर बिनै पावै, पण बो आपणाऊँ दूर कोनी ह।

²⁸क्युं क क्युंक बोली हीं, ‘बिमैई आपणा पिराण, बिमैई आपा डोला-फिरां हां अर बिमैई आपणो बजूद ह।’ जंय्यां क थारा कबी बोलगा क, ‘आपा बिका टाबर हां।’

²⁹अर आपा परमेसर का टाबर हां, जणा आपानै ओ समजबो चाए क परमेसर आपणै हातऊँ घड़ेड़ी सोना-चाँदी अर भाठा की चिजा जंय्यां को कंय्यां हो सकै ह?

³⁰परमेसर बि टेम का मिनखा को लेखो कोनी लेबो चायो जद बे बिनै कोनी जाणता हा, पण इब बो हुकम देवै ह क सगळी धरती का सगळा मिनख पापऊँ तौबा करै।

³¹क्युं क एक दिन परमेसर पेल्याऊँ ते करेड़ा मिनख क हातऊँ[16] जगत का मिनखा को सचाई क सागै न्याय करसी। इ बात को सबूत देबा ताँई परमेसर बिनै मरेड़ा मऊँ जीवायो।”

³²मरेड़ा मऊँ ओज्यु जीबा की बात सुणर क्युंक मिनख बिपै हसबा लागगा। अर क्युंक बिऊँ बोल्या की, “इ बारां म म्हें ओज्यु कदै सुणस्यां।”

³³जणा पोलुस बठैऊँ चलेगो।

³⁴इकै पाछै कई मिनख बिस्वास कर्या अर बिकै गेल गया। आ मिनखा म अरियुपगस सभा को एक मिनख जिको नाम दिओनुसीस अर दमरिस नाम की एक लूगाई अर ओर बी बोळा मिनख हा।