Read Shekhawati काम 18 Bible Online

काम 18 - Shekhawati bible

काम 18

¹जणा पाछै पोलुस एथेंसऊँ कुरन्थी म आयो।

²जठै बो अकविला नाम का एक यहूदि मिनखऊँ टकरायो। जिकी जन्मभौम पिन्तुस ही। अर बो इटलीऊँ आपकी लूगाई क सागै हाल आयोई हो। क्युं क बठै को म्हराज कलोदियुस सगळा यहूदिआनै रोमऊँ निकळ जाबा को हुकम काड्यो। जणाई पोलुस बाऊँ मिलबा गयो[17]।

³अर बो बाकै सागै रेह्बा अर काम करबा लागगो क्युं क बाको एकसोई धंधो हो। बे तम्मू बणाबाळा हा।

⁴पोलुस हर यहूदिआ का अरामहाळा दिन अरदास करबाळी झघा म यहूदि अर यूनानी मिनखा क सागै चरचा करतो अर बानै समजातो हो।

⁵अर जद सीलास अर तिमूतियूस मकीदुनियाऊँ आया जणा पोलुस आपको सगळो टेम बचन का परचार मई बितातो हो अर यहूदि मिनखा म आ साबित करतो की ईसुई मसी ह।

⁶पण जद बे मिनख पोलुस को बिरोद अर बिकी बुराई करबा लागगा जणा बो आपको पल्लो झाड़ लिओ अर बोल्यो, “थारी करनी थेई पाओ! इमै मेरी कोई जुबाबदारी कोनी अर इबऊँ म गैर-यहूदि मिनखा क कनै जास्युं।”

⁷बठैऊँ बो तितूस यूसतुस नाम का एक परमेसर का गैर-यहूदि भगत क घरा आयो; अर बिको घर हो जखो अरदास करबाळी झघा क सारैई हो।

⁸जणा अरदास घर को अधिकारी आपका सगळा परवार सेत्युं परबु म बिस्वास कर्यो अर बाकै सागै बोळा कुरन्थी म रेह्बाळा पोलुस की बाता सुणर बिस्वास कर्या अर बतिस्मो लिओ।

⁹अर एक रात परबु पोलुसनै दरसाव देर कह्या, “तू डरै मना बोलतोई रेह चुप मना होवै

¹⁰क्युं क म तेरै सागै हूँ, कोई तेरो बाळई बाको कोनी कर सकै। अर इ नगरी का बोळा मिनख मेरा बणसी।”

¹¹अर पोलुस बठै डेड बरस ताँई रेह्‍र मिनखानै परमेसर का बचना की सीख देतो रिह्यो।

¹²जद गलिओ अखाया परदेस को राजपाल हो बि टेम सगळा यहूदि एको कर पोलुसनै पकड़र कचेरी म खड़्यो कर दिओ अर बे बोल्या,

¹³“ओ मिनख मिनखानै परमेसर की भगती करबा की अंय्यां की रीत सीखावै जखी मूसा का नेम-कायदा क खिलाप ह।”

¹⁴पोलुस बोलबाळोई हो क अत्ता मई गलिओ बोल्यो, “ओ यहूदि मिनखो! ज आ गळत अर अपराद की बात होती जणा म थारी बात स्यांतीऊँ सुणतो।

¹⁵पण ओ झमेलो तो थारी बाता को, नाम अर थारा खुदका रिती-रिवाजा को ह इ मामलानै थेई जाणो म इ मामला को न्याय कोनी करूं।”

¹⁶आ खेर बो बानै कचेरी क बारनै निकळ्वा दिओ।

¹⁷जिकै पाछै बे अरदास घर का अधिकारी सोस्थिनेस कचेरी क सामै मार पिटाई करी पण गलिओ प आ बाता को कोई फरक कोनी पड़्यो।

¹⁸पोलुस क्युंक दिन कुरन्थी म रेह्बा क पाछै भायाऊँ बिदा होर परसकीला अर अकविला क सागै किंखिरीआस आयो अर बठै आपको सीर मुंडायो क्युं क बो कोई मन्नत माँगी ही। पाछै पाणी का झाज प सवार होर सिरीया ताँई रवानगी करी।

¹⁹अर इफिसुस पुगर परसकीला अर अकविलानै बठैई छोडर खुद अरदास घर जार यहूदि मिनखाऊँ चरचा करबा लाग्यो।

²⁰अर बे पोलुस का ओर थोड़ा दिन बठै रेह्बा ताँई न्होरा खाया पण बो कोनी मान्यो।

²¹अर बो बाऊँ बिदा होर बोल्यो, “परमेसर चायो तो आपा ओज्यु मिलस्यां।” आ खेर बो इफिसुस छोडर पाणी का झाजऊँ कैसरिया गयो अर बठैऊँ यरूसलेम जार बठै की बिस्वासी मंडळीऊँ नमस्कार कर अंताकीया गयो।

²³क्युं क दिन बठै रेह्‍र बो बठैऊँ बिदा होर गलातिया अर फरूगिया ठिकाणा म सगळा चेला-चपाट्यानै समाळतो फिर्यो।

²⁴अपुलोस नाम को एक यहूदि जिकी जन्मभौम सिकन्दरिआ ही बो बोलबा म बोळो माहिर हो अर सास्तर को चोखो ज्ञ्याता हो बो बा दिना इफिसुस आयो।

²⁵बिनै परबु का गेला की सीख मिली ही अर बो आपकी सगळी आत्माऊँ ईसु क बारां म सई-सई बाता सुणातो अर सीखातो हो, पण बो खाली पाणी को बतिस्मो देबाळा यहून्ना क बारां मई जाणतो हो।

²⁶अर बो अरदास घर म बेधड़क बोलबा लाग्यो। परसकीला अर अकविला बिकी बाता सुणबा क पाछै बिनै आपकै घरा ल्याया अर बिनै ओर बी चोखा ढंगऊँ परमेसर का गेला क बारां म समजाया।

²⁷अर जद अपुलोस अखाया परदेस जाबा की मन म करी जणा बठै का भाईड़ा बिकी मदद करी अर बिकै हात चेलानै एक कागद भेज्यो क बे बिकी आवभगत करै। अर बो बठै जार बा मिनखा की मदद करी जखा परमेसर की दयाऊँ बिस्वास म आया हा।

²⁸क्युं क बो सास्तरऊँ “ईसुई मसी ह” इ बातनै साबित कर सगळा मिनखा क सामै यहूदि मिनखा को मुंडो बंद कर दिओ।