Read Shekhawati काम 2 Bible Online

काम 2 - Shekhawati bible

काम 2

¹पेन्तिकूस[2] का त्युंहार हाळै दिन बे सगळा बिस्वासी एक झघा भेळा होर्या हा।

²अत्ती बारां मई आसमानऊँ आँधी की सी उवाज होई अर बो सगळो घर जठै बे बेठ्या हा गुँजबा लागगो।

³अर बानै आग की लपटा जीब की जंय्यां फेलती दिखी, अर बे लपटा एक-एक प आर डटगी।

⁴बे सगळा पबितर आत्माऊँ भरगा अर जंय्यां पबितर आत्मा बानै बोलबा की सक्‍ति दि बे बंय्यांई दुसरी भासा म बोलबा लाग्या।

⁵बि टेम यरूसलेम म दुनिया का सगळा देसाऊँ यहूदि भगत आएड़ा हा।

⁶जद बे बा उवाज सुण्या जणा बठै घणीसारी भीड़ भेळी होगी अर बे आ सुणर ताजूब म पड़ग्या क अ सगळा तो म्हारीई भासा म बोलर्या ह।

⁷बे सगळा ऊक-चूक होगा अर ताजूब म पड़र बोल्या, “अ सगळा जखा बोलर्या ह अ गलिली कोनी के?

⁸जणा ओ कंय्यां होयो क आपा सगळा आनै आपणी भासा म बोलता सुणर्या हां।

⁹आपा जखा पारसी, मेदि, अर एलामी, मिसोपोटामिआ, यहूदिआ अर कपुदूकिया, पिन्तुस अर एसिया,

¹⁰फरूगिया अर पंफुलिया, मिसर अर साईरिन क सारै पड़बाळा लिबिया का रेह्बाळा। अर आपणा मऊँ क्युंक रोमऊँ आएड़ा मूसापिर हा।

¹¹जामैऊँ जलमजात यहूदि अर यहूदि धरमनै मानबाळा हां, अर आपणा मऊँ क्युंक करेती अर अरबऊँ बी आएड़ा हीं। पण आपा सगळा अठै परमेसर का ताजूब का कामा की चरचा आपणी खुदकी भासा मई सुणर्या हां।”

¹²बे ऊक-चूक होगा अर ताजूब कर आपसरी म बुजबा लाग्या क, “अठै ओ काँई होर्यो ह?”

¹³पण क्युंक जणा बिस्वास्या की हसी उडाबा लाग्या अर बोल्या, “अ तो पीएड़ा हीं।”

¹⁴जणा पतरस बा ग्यारा भेजेड़ा चेला क सागै खड़्यो होर जोरऊँ बोलबा लाग्यो, “यहूदिओ अर यरूसलेम का रेह्बाळो मनै खेबा द्‍यो, क अठै काँई होर्यो ह, अर मेरी बातानै गोर लगार सुणो।

¹⁵थे जंय्यां समजर्या हो बंय्यां कोनी ह आ मऊँ कोईसोई कोनी पीएड़ो अर बंय्यां बी हाल तो दिन का नोई बज्या ह।

¹⁶पण आ तो बा भबिस्वाणी ह जखी योएल परमेसर की खेबाळो बोली ही:

¹⁷“‘परमेसर बोलै ह आखरी दिना म, म मेरी पबितर आत्मा सगळा प उतारस्युं। अर थारा छोरा-छोरी परमेसर की बाता बतासी। अर थारा जवान दरसाव देखसी अर बूडा-ठेरा सपना देखसी।

¹⁸अर म मेरा दास दास्यानै बा दिना म मेरी पबितर आत्माऊँ भर देस्युँ। अर बे भबिस्वाणी करसी।

¹⁹म उपर अकास म चमत्कार अर निचै धरती प अचरजभर्या काम करस्युं। बा दिना म लोय, लाय अर धुँआ को बादळ होसी। परबु क पाछो आबा का बि म्हान अर मेमाभर्या दिन क आबाऊँ पेली

²⁰सूरज काळो अर चाँद लोय की जंय्यां लाल होज्यासी।

²¹अर जखा बी परबु को नाम लेवै ह, बानै बचायो ज्यासी।’

²²“इजरायल का रेह्बाळो, ईसु नासरी क बारां म आ बचनानै सुणो। परमेसर ईसु क हाता सेलाणी-चमत्कार अर अचरजभर्या काम कर आ साबित कर्यो क बो परमेसर कानिऊँ थारै ताँई भेजेड़ो मिनख हो। जंय्यां की थे सगळा जाणो हो।

²³परमेसर आपका मकसद अर आबाळी बातानै जाणबाळा ज्ञानऊँ पेल्याई ते कर्यो, क ईसु थारा हाता म सूप्यो ज्यासी अर थे पापी मिनखा क हाता बिनै पकड़र बिका हाता म किलां ठोकर बिनै सुळी प चढार मार गेरस्यो।

²⁴पण परमेसर बिनै मोतऊँ ओज्यु जीवा दिओ क्युं क आ होय कोनी सकै ही क मोत बिकै जेवड़ो घाल्या राखती।

²⁵बि ताँई दाऊद खेवै ह: “‘म सदाई परबुनै मेरै सामै देखूँ हूँ। क्युं क बो मेरै सागै ह। इ ताँई म कोनी डिगुं।

²⁶इ ताँई मेरो जीवड़ो राजी ह। अर मेरी जबान राजी-खुसी की बात करसी। अर म आस म जिस्युं।

²⁷क्युं क तू मेरी आत्मानै पताळ म कोनी छोडसी। अर नइ तू तेरा पबितर दासनै कबर म सिड़बा देसी।

²⁸तू मनै जुग-जुग जीबा को गेलो दिखायो ह। अर तेरी संगत मनै राजी कर देसी।’

²⁹“मेरा यहूदि भाई-भाणो सुणो, म थानै आपणा कूणबा का बडका मऊँ राजा दाऊद क बारां म साप-साप बताऊँ हूँ। बो मर्यो अर बिनै गाड दिओ। बिकी कबर हाल ताँई आपणै अठैई ह।

³⁰बो एक परमेसर की खेबाळो हो। अर बो बि वादानै जाणतो हो जखो परमेसर बिकै सागै कर्यो हो। क परमेसर दाऊद का कूणबा मऊँ एकनै बिकी जंय्यां राजगद्दि प बिठासी।

³¹अर दाऊद होबाळी बातानै पेल्याई देखर मसी क मर्या पाछै ओज्यु जीबा की बात बोल दिनी ही। क बिनै पताळ म कोनी छोड्यो जासी अर नइ बिकी काया कबर म सिड़बा देसी।

³²अर इ ईसुनै परमेसर मरेड़ा मऊँ जीवायो, अर इ बात का आपा सगळा गुवा हां।

³³परमेसर ईसुनै उठार आपकै दाया हात बिठायो जखी आदर की सऊँ उची झघा ह। अर परम-पिता का करार गेल बिनै पबितर आत्मा मिली अर बि आत्मानै बो आपणै उपर पूर दिओ। जिनै थे इब देखर्या अर सुणर्या हो।

³⁴क्युं क दाऊद ईस्बर नगरी कोनी गयो, पण बो खुद बोलै ह, ‘परबु मेरा परबुऊँ बोल्यो; जद ताँई म तेरा दुस्मननै तेरै पगा तळै को पाटो कोनी करद्‍युं मेरै दाया हात कानि बेठ।’

³⁵

³⁶“आ बात म इ ताँई खेऊँ हूँ, क इजरायल का रेह्बाळा आ बात ढंगऊँ जाणज्यावै क जि ईसुनै थे सुळी प चढायो हो। बिनैई परमेसर परबु अर मसी बणायो हो।”

³⁷अत्ती सुणताई बे पाणी-पाणी होगा अर पतरस अर दुसरा भेजेड़ा चेलाऊँ बुजबा लाग्या क, “यहूदि भाईड़ो इब म्हानै काँई करबो चाए।”

³⁸जणा पतरस बोल्यो, “थे थारा पापऊँ तौबा करो ईसु मसी का नाम म बतिस्मो लेल्यो जिऊँ थारा पाप धोया जासी। अर थानै पबितर आत्मा को बरदान मिलसी

³⁹क्युं क ओ करार थारै अर थारा टाबरा अर बा सगळा ताँई ह जखा आंतरै हीं। अर ओ बा सगळा ताँई बी ह जानै परबु आपणो परमेसर आपकै कनै बुलावै ह।”

⁴⁰पतरस ओर बी बोळी बाता बोलर बानै चेतायो। अर अरदास कर बोल्यो, “इ कुटिचर पिडी प पड़बाळा न्यायऊँ खुदनै बचाओ।”

⁴¹बोळाजणा बिकी बाता प बिस्वास कर्या अर हात्युहात बतिस्मो ले लिआ, अर बि दिन करीब तीन झार मिनख बाकी टोळी म सामिल होया।

⁴²अर बे भेजेड़ा चेलाऊँ उपदेस सुणबा, संगती करबा, एक सागै परबुनै याद करबा ताँई रोटी तोड़बा अर अरदास करबा म रमग्या।

⁴³भेजेड़ा चेला क हाता चमत्कार अर नइ होबाळा काम बी होर्या हा। इ बजेऊँ सगळा ताजूब करता अर परमेसर को डर मानता।

⁴⁴सगळा बिस्वास करबाळा एक मन अर एक चित होर संगती करता हा। अर जोक्यु बाकन हो बिनै आपसरी म बाट लेता।

⁴⁵बे आपकी जमीन-जायजाद अर चिज-बस्त बेचर जिकी जंय्यां जुर्त होती बिनै बंय्यांई बाट लेता हा।

⁴⁶बे रोजकी एक टोळी की जंय्यां मनदर म मिलता, एक-दुसरा का घरा म रोटी तोड़ता। राजी-खुसी अर सिदा मनऊँ एक सागै रळमिल रोटी खाता।

⁴⁷अर परमेसर को गुणगान गाता। बे सगळा इ दान दयाऊँ राजी हा। अर जखो बी परमेसर क जरिए छुटकारो पातो, परमेसर बिनै रोजकी बाकी टोळी म जोड़ देतो।