Read Shekhawati काम 20 Bible Online

काम 20 - Shekhawati bible

काम 20

¹बबाळ थमबा क पाछै पोलुस बिस्वास्यानै बुलार बानै आस बंधार अर बाऊँ बिदा लेर मकीदुनिया कानि रवाना होयो।

²अर बा परदेसा को दोरो कर्यो अर बठै का बिस्वास्यानै हिमत बंधार बो यूनान का अखाया परदेस गयो।

³अर बठै तीन म्हेना रेह्बा क पाछै बो पाणी का झाजऊँ सिरीया जाबो चायो जणा बिनै भणक लागी की यहूदि बिकी ताक म हीं। जणा बो मकीदुनिया होर जाबा की मन म करी।

⁴जणा बिरीया को पाईरस को छोरो सूपतरुस अर थिसलूनिकी अरिस्तखुस अर सिकन्दुस, दिरबे को गयुस, एसिया को तुखीकुस अर तरीफिमुस एसिया ताँई बिकै सागै होलिआ बाकै सागै तिमूतियूस बी हो।

⁵बे म्हारै अगाऊ जार तरोआस म म्हानै उडिकबा लागगा।

⁶अर जंय्यांई बिना खमिर की रोटी को त्युंहार सलट्योक, म्हें पाणी का झाजऊँ पाच दिना पाछै तरोआस पुग्या जठै म्हें सात दिन ताँई रिह्या।

⁷सपता का पेला दिन दितबारनै, म्हें एक सागै परबु की याद म रोटी खाबा ताँई भेळा होया। पोलुस जखो दुसरा दिन बठैऊँ जाबाळो हो बो बाऊँ बाता करी अर आदी रात ताँई बो बाऊँ बतळातो रिह्यो।

⁸अर जि माळ्या म म्हें भेळा होर्या हा बिमै बोळा सारका दिआ जळबा लागर्या हा।

⁹अर युतूखुस नाम को एक मोट्यार जंगला म बेठ्यो हो अर बिनै निंद का लटका आर्या हा। अर जद पोलुस देर ताँई बाता करतो रिह्यो जणा बिकी आँख लागगी अर बो तीसरा माळाऊँ निचै गिरगो अर जद बिनै उठाया, जणा बो बानै मरेड़ो लाध्यो।

¹⁰जणा पोलुस तळै आर बिनै आपकी छातीऊँ लगार मिनखाऊँ बोल्यो, “घबराओ मना क्युं क हाल तो ओ जीवै ह।”

¹¹अर इकै पाछै बो उपर जार परबु की याद म रोटी तोड़ी अर रोटी खार भागपाट्या ताँई बाऊँ बाता करतो रिह्यो। अर इकै पाछै बो बठैऊँ चलेगो।

¹²अर बे बि मोट्यारनै जीवतो घरा ल्याया अर बानै इऊँ बोळो चेन मिल्यो।

¹³म्हें पेल्याई पाणी का झाजऊँ असोस ताँई चाल पड़्या। बठै म्हानै पोलुसनै बी बिठाणो हो। ओ इंतजाम बो इ ताँई कर्यो क्युं क बो पैदल जाबाळो हो।

¹⁴अर जद पोलुस असोस म म्हानै मिल्यो जणा म्हें बिनै पाणी का झाज म चढार मितूलेने लिआया।

¹⁵बठैऊँ पाणी का झाजऊँ दुसरा दिन खियुस टापू प पुग्या। अर आगला दिन समदर पार कर सामोस टापू अर बिकै दुसरा दिन मिलेतूस नगरी जा टिक्या।

¹⁶पोलुस इफिसुसऊँ बारै-बारै होर जाबा की मन म कर राखी ही, क्युं क बो एसिया म टेम काटबो कोनी चातो हो, क्युं क बो पेन्तिकूस हाळै दिन ताँई यरूसलेम पुगबा की तावळ्या म हो।

¹⁷पोलुस मिलेतूसऊँ इफिसुस म खुवा भेज्यो अर बिस्वासी मंडळी का मुखियानै आपकै कनै बुलावो भेज्यो।

¹⁸अर जद बे बिकै कनै पुग्या जणा बो बानै बोल्यो, “थे तो जाणोई हो की जद म एसिया म पेली बर आयो हो, बि दिनऊँ लेर हाल ताँई मेरो चाल-चलन किसोक रिह्यो ह।

¹⁹अर थानै आ बताबा की जुर्त तो आथ कोनी क यहूदि मिनख जद एको कर मेरै खिलाप होगा हा। जिऊँ मेर प कत्ती तुमत आई ही पण आकै बावजुद बी म दिन-रात नरमाई अर आसुआ क सागै कंय्यां परबु की सेवा करतो रिह्यो।

²⁰अर जखी बात थारै ताँई चोखी ही बानै बताबा ताँई म कदैई मन म दबार कोनी राखी पण बा बाता की सीख सगळा क सामै अर घरा-घरा जार देतो रिह्यो।

²¹अर म यहूदि अर यूनानी मिनखानै पापऊँ मन फेर'र परमेसर कानि मुड़बा अर परबु ईसु मसी प बिस्वास करबा ताँई खेतो रिह्यो।

²²अर इब म पबितर आत्मा क कह्या गेल यरूसलेम जार्यो हूँ अर मनै कोनी बेरो क बठै मेर म काँई-काँई बितसी।

²³पण म खाली ओई जाणू हूँ क सगळी नगर्या म पबितर आत्मा मनै हुस्यार कर दिओ ह, क तुमत अर केद मनै उडिकै ह।

²⁴पण मनै मेरी ज्यान की परवा कोनी म तो बस मेरी भाग दोड़नै पूरी करबो चाऊँ हूँ। अर परमेसर की दया का चोखा समचार सुणाबा को काम जखो परबु मनै सूप्यो ह बिनै पूरो करबो चाऊँ हूँ।

²⁵अर इब म थानै बताबो चाऊँ हूँ क थे सगळा जणा जाकै मांयनै म परमेसर का राज क बारां म सुणायो हूँ मेरो मुंडो ओज्यु कोनी देखस्यो।

²⁶इ ताँई म आज थानै गुवाई देर बोलुँ हूँ क ज थारै मालो कोईबी नास होसी बिकी मेरी जुबाबदारी कोनी।

²⁷क्युं क म परमेसर की सगळी इंछ्या थानै बता दिओ हूँ।

²⁸जणा इब थे बिस्वासी मंडळी का रूखाळा हो आ जिमेदारी थानै पबितर आत्मा सूपी ह। बा लल्ड्या का रेवड़ा का गुवाळ्या बणो, जिनै परमेसर आपका बेटा का लोयऊँ मोल लिओ ह।

²⁹अर म आ बी जाणू हूँ क मेरै जाबा क पाछै थारै मऊँ अंय्यां का खुखार ल्याळी आज्यासी जखा कोईबी लल्डीनै कोनी छोडसी।

³⁰अर थारै मऊँ बी अंय्यां का मिनख खड़्या होसी जखा टेडी मेडी बाता बोलर बिस्वास्यानै आपकै गेल कर लेसी।

³¹जणा इब थे चेता म रेह्‍वो अर आ कदैई मना भूलज्यो की तीन बरसा ताँई दिन-रात आसुआ क सागै थानै एक-एकनै चेताबो कोनी भूल्यो।

³²अर इब म थानै परमेसर की साळसमाळ अर बिकी दया का बचना म सूपूँ हूँ जखो थानै तगड़ो करसी अर जखी बापोत परमेसर का सगळा मिनखा ताँई ह बा थानै बी देसी।

³³म कोईका सोना-चाँदी अर कपड़ा को लालच कोनी कर्यो।

³⁴अर थानै आ बताबा की बी जुर्त कोनी क म मेरा आ हाताऊँई मेरी अर मेरा सात्या की जुर्त पूरी करी।

³⁵म परबु ईसु का बे बचन याद राख'र की ‘लेबाऊँ देबो चोखो ह।’ मेरा हाताऊँ मेनत कर माड़ानै समाळर थानै दिखायो हूँ।”

³⁶आ खेर बो आपका गोडा क पाण बेठगो अर सगळा क सागै अरदास करबा लागगो।

³⁷जिकै पाछै बे सगळा जणा बोळा रोया अर पोलुस क बांथ घालर बिकै प्यारऊँ गळै मिलबा लागगा।

³⁸अर बे घणा दुखी तो इ बात प हा क बो बाऊँ बोल्यो हो क मेरो मुंडो थे ओज्यु कोनी देखस्यो। जणा पाछै बे बिनै पाणी का झाज प बिठाबा आया।