Read Shekhawati काम 21 Bible Online

काम 21 - Shekhawati bible

काम 21

¹बठैऊँ बिदा होर म्हें पाणी क गेला कोस अर रूदुस टापू होताहोया दो दिन पाछै पतरा नगरी म पुग्या।

²जठै म्हानै फिनीके जातो एक झाज हात आगो जिपै म्हें सवार होर चाल पड़्या।

³म्हानै साईपरस टापू दिख्यो जणा म्हें बिकै दिखणाद म जार सिरीया जाबाळो गेलो पकड़ लिओ अर सूर नगरी म रूक्या क्युं क बठै झाजऊँ माळ उतारनो हो।

⁴अर बठै क्युंक बिस्वास्यानै देखर म्हें बाकै सागै सात दिना ताँई रिह्या अर पबितर आत्मा क बताया गेल बे पोलुसऊँ बोलता हा की यरूसलेम म जाबा को बिचार छोड दे।

⁵आठवा दिन म्हें बठैऊँ रवानगी करी अर बे आपका टाबर-टिकरा समेत म्हानै नगरी क बारनै छोडर गया अर समदर क किनारा प पुगर म्हें गोडा टे'कर अरदास करी,

⁶जणा बाऊँ बिदा होर म्हें तो पाणी का झाज प चढगा अर बे आप-आप क घरा चलेगा।

⁷जणा म्हें पाणी क गेला पतूलिमयिस आया अर बिस्वासी भायानै नमस्कार कर बाकै सागै एक दिन रिह्या।

⁸अर दुसरा दिन बठैऊँ चालर म्हें कैसरिया पुग्या अर फलिपूस जखो चोखा समचार को परचार कर्या करतो हो बिकै घरा रूक्या जखो यरूसलेम म टाळेड़ा बा सात जणा मऊँ एक हो।

⁹बिकै च्यार कुंआरी छोर्या ही जखी परमेसर की खेबाळी ही।

¹⁰अर जद म्हानै बठै रेह्ता बोळा दिन होगा जणा अगबुस नाम को एक परमेसर की खेबाळो यहूदिआऊँ आयो।

¹¹बो म्हारै कनै आर पोलुस को कमर बांदबा को पट्टो लेर बिऊँ आपका हात पगानै बांद लिओ अर खेबा लाग्यो, “जिको ओ कमर पट्टो ह बिनै यरूसलेम म यहूदि मिनख अंय्यांई बांदसी अर बिनै परमेसरनै नइ ध्यारबाळा मिनखा क हाता म सूपसी आ बात मनै पबितर आत्मा बतावै ह।”

¹²अर आ बात सुणर म्हें अर बठै का मिनख पोलुसऊँ अरदास करबा लागगा की यरूसलेम नइ जावै।

¹³पण पोलुस बाऊँ बोल्यो, “थे ओ काँई करो हो? आ ढंगा रो-रोर थे मेरो मन कचो करो हो, म तो परबु ईसु का नामऊँ यरूसलेम म खाली बंदि बणबा ताँई नइ पण मरबा ताँई बी त्यार हूँ।”

¹⁴अर जद बो कोनी मान्यो जणा म्हें अंय्यां खेर क, “परबु की इंछ्या पूरी होवै” चुप होगा।

¹⁵आ दिना क पाछै म्हें त्यार होर यरूसलेम ताँई रवानगी करी।

¹⁶कैसरियाऊँ बी क्युंक बिस्वासी म्हारै सागै होगा अर म्हानै साईपरस का मनासोन नाम का एक मिनख क घरा ल्याया जखो सरूपोत का बिस्वास्या मऊँ एक हो अर म्हें बठैई रूक्या।

¹⁷म्हारै यरूसलेम पुगबा क पाछै बिस्वासी भाईड़ा राजी होर म्हारूँ मिल्या।

¹⁸अर दुसरा दिन पोलुस अर म्हें याकूब क कनै गया जठै सगळा बिस्वासी मंडळी का मुखिया बी हा।

¹⁹जणा बो बानै नमस्कार कर सगळा कामा क बारां म बतायो जखा काम परमेसर बिकी सेवा क जरिए गैर-यहूदिआ क मांयनै कर्यो।

²⁰आ सुणर बे परमेसर की बडाई करबा लागगा अर इकै पाछै बोल्या, “मेरा लाडला बिस्वासी भाईड़ा, तू देखै ह क यहूदिआऊँ मिनख झारा की तादाद म बिस्वास कर्या हीं अर मूसा का नेम-कायदा प चालबा ताँई कट्टर हीं।

²¹अर बानै तेरा बारां म आ पटी पढाई गई ह की तू गैर-यहूदि मिनखा म रेह्बाळा यहूदि मिनखानै आ सीखावै ह की थानै नइ तो नेम-कायदानै मानबा की जुर्त ह अर नइ थानै थारा टाबरा की सुन्नत कराबा की अर नइ पेलड़ा रिती-रिवाजा की लिकटी पिटबा की जुर्त ह।

²²इब काँई कर्यो जाय? क्युं क मिनखानै तो बेरो पड़सी क तू आयड़ो ह।

²³जणा इब तू म्हारो खेणो मान, अठै च्यार मिनख हीं जखा मन्नत माँगी ही।

²⁴इब तू अंय्यां कर बाकै सागै सुद हो अर बानै सीर मुंडाबा को खरचो दे। अर जद तू अंय्यां करसी जणा कोईनै बी सपाई देबा की जुर्तई कोनी क्युं क बे तनै अंय्यां करता देखसी जणा सगळा मतैई जाणज्यासी क जखी बाता बे तेरा बारां म सुणी ही बे सगळी झूठी ह अर तू खुदई नेम-कायदानै मानबाळो ह।

²⁵अर जठै ताँई गैर-यहूदिआ का बिस्वास्या को सुवाल ह बा ताँई म्हें कागद मांडर दे दिओ क बे मूरती क आगै चढाईड़ो मास, लोय अर गळो घोटेड़ो ज्यानबर को मास खाबाऊँ अर पराई लूगाया क सागै गळत कामाऊँ परै रेह्‍वै।”

²⁶जणा पोलुस दुसरा दिन बा मिनखा क सागै सुद होर मनदर म गयो अर आ बतायो की कूणसा दिन सुद होबा का दिन पूरा होसी अर बा सगळा ताँई चढावो चढायो जासी।

²⁷अर जद बे सात दिन पूरा होबाळा हा जणा एसिया का यहूदि मिनख मनदर म पोलुसनै देखर भीड़ का सगळा मिनखा का कान भर दिआ अर अंय्यां चिलार बिनै पकड़ लिआ।

²⁸“ओ इजरायल का रेह्बाळो म्हारी मदद करो ओ बोई मिनख ह जखो हर कठै मूसा का नेम-कायदा, आपणै अर इ मनदर क खिलाप सीख देतो फिरै ह। अर ओ यूनानीयानै मनदर म ल्यार इ पबितर झघानै सूगलो कर्यो ह।”

²⁹क्युं क इऊँ पेली बे बिनै इफिसीआ तरीफिमुस क सागै देख्या हा अर आ समजर्या हा की बो बिनै मनदर म लेर आयो हो।

³⁰इकै पाछै पूरी नगरी म बबाळ माचगो अर लोग भाग-भागर भेळा होगा अर पोलुसनै पकड़र मनदर मऊँ बारनै घसिटताई ल्याया अर हात्युहात मनदर का कुआड़ बंद कर दिआ।

³¹अर जद बे बिनै मारबाळाई हाक जणा रोमी पलटण का सरदारनै[18] खबर लागी क सगळी यरूसलेम नगरी म बबाळ माचर्यो ह।

³²जणा बो सिपाईड़ा अर सुबेदारनै लेर बेगोसो मोका प पुग्यो जणा भीड़ सिपाईड़ा अर सरदारनै देखर पोलुसनै पिटबो बंद कर दिओ।

³³जणा पलटण को सरदार बिकन आर बिनै साँकळऊँ बांदबा ताँई ओडार बुज्यो, “ओ कूण ह अर ओ काँई अपराद कर्यो ह?”

³⁴पण भीड़ मऊँ कोई क्युं बकबा लागर्यो अर कोई क्युं अर इ रोळा-बेदा क चलतै पलटण का सरदारनै कोनी बेरो पड़्यो क होयो के ह, जणा बो बिनै सेनाहाळा गड म लेज्याबा ताँई ओडायो।

³⁵अर जद बे सिढ्या प पुग्या जणा झाळा भरेड़ी भीड़ की बजेऊँ सिपाईड़ा पोलुसनै अधर उठार लेज्याणो पड़्यो।

³⁶क्युं क बे अंय्यां चिलाता बिकै गेल होर्या हा क, “इनै मार गेरो।”

³⁷अर जद बे बिनै सेनाहाळा गड म लेज्याबाळा हा, जणा पलटण का सरदारनै पोलुस बोल्यो, “थे ओडाओ तो म थारूँ क्युं बोलबो चाऊँ हूँ।” जणा बो बोल्यो, “तनै यूनानी बोलबो आवै ह के?

³⁸जणा तो तू बो मिसरी मिनख कोनी के? जखो क्युंक दिना पेली बगावत कर च्यार झार बगावत्यानै उजाड़ म लेगो हो।”

³⁹जणा पोलुस बोल्यो, “अजी म बो कोनी। म तो कलिकीया की मानेड़ी नगरी तरसुस को रेह्बाळो यहूदि मिनख हूँ। म थारूँ हात जो'ड़र खेऊँ हूँ की थे मनै मिनखाऊँ बात करबा को मोको द्‍यो।”

⁴⁰अर जद बो बिनै बोलबा ताँई ओडायो जणा बो पेड़ी प खड़्यो होर आपका हातऊँ इसारो कर्यो। अर जद लोग चुप होगा जणा बो इबरानी भासा म बोलबा लागगो।