Read Shekhawati काम 23 Bible Online

काम 23 - Shekhawati bible

काम 23

¹पोलुस म्हापंचायत क कानि एक टक देखर बोल्यो, “इजरायल का यहूदि भाईड़ो, म हाल ताँई परमेसर क सामै ईमानदारी क सागै साप मनऊँ जियो हूँ।”

²पण म्हायाजक हनन्या पोलुस क सारै खड़्या मिनखनै ओडायो “इकै होठा प मार।”

³आ बात सुणर पोलुस बिनै बोल्यो, “ओ कपटी तू तो चुनाऊँ लिपेड़ी भीत ह, परमेसर तनै मारसी। तू मूसा का नेम-कायदा गेल मेरो न्याय करबा अठै बेठ्यो ह, पण तूई नेम-कायदा क खिलाप मनै मारबा ताँई ओडावै ह।”

⁴जणा कनै खड़्या मिनख पोलुसऊँ बोल्या, “तेरी अत्ती हिमत क तू परमेसर का म्हायाजकनै बुरो-भलो खेवै।”

⁵जणा पोलुस बोल्यो, “यहूदि भाईड़ो, मनै कोनी बेरो हो की ओ म्हायाजक ह; क्युं क पबितर सास्तर म मंडेड़ो ह की तू मिनखा का परधाननै बुरो मना खेजे।”

⁶जणा पोलुस आ जा'णर क अठै एक टोळी सदुकीया की अर दुसरी फरिसीया की ह जणा बो पंचायत म जोरऊँ बोल्यो, “ओ यहूदि भाईड़ो, म फरिसी हूँ अर फरिसीया की ओलाद हूँ, अर मरबा क पाछै ओज्यु जी उठबा की मेरी आस की बातनै लेर मेर प मुकदमो चालर्यो ह।”

⁷पोलुस क अ बाता खेताई फरिसी अर सदुकीया म खिचा-ताणी होबा लागगी अर पंचायत म फूट पड़गी।

⁸क्युं क सदुकी मानी ही की नइ तो मरबा क पाछै कोई जी उठै, नइ कोई ईस्बर नगरी दुत ह, अर नइ आत्मा ह; पण फरिसी आ बाता म बिस्वास करीं हीं।

⁹अंय्यां चोखी खिचा-ताणी होगी। अर फरिसीया की टोळी मऊँ क्युंक सास्तरी खड़्या होर जोर-जोरऊँ खेबा लाग्या क, “म्हें इ मिनख म सजा देबा जोगो कोई दोस कोनी देखां, हो सकै क बिऊँ कोई आत्मा नहिस कोई ईस्बर नगरी दुत बोल्यो होसी, जणा इमै काँई बात होगी?”

¹⁰अर जद बाकी राड़ घणी बढगी जणा इ डरऊँ क बे कदै पोलुस का टुकड़ा-टुकड़ा नइ कर दिं, पलटण को सरदार आपकी पलटण का क्युं क सिपाईड़ानै ओडायो क, “जाओ अर जोरामादी बिनै बामैऊँ काड ल्याओ अर सेनाहाळा गड म लेज्याओ।”

¹¹बि रात परबु बिनै दरसाव देर बोल्यो, “हिमत बांद अर जंय्यां तू मेरै बारां म अठै गुवाई दि ह, ठिक बंय्यांई तनै रोम म बी देणी पड़सी।”

¹²सुआरै क्युंक यहूदि पोलुसनै मारबा को जाळ बिछायो अर सोगन खाई क बिनै मार्या पेली म्हें क्युंई कोनी खावां पिवां

¹³अर जखा ओ जाळ बिछायो हो बे चाळिसऊँ बी बेसी हा।

¹⁴बे, बा परधान याजका अर यहूदि नेता क कनै जार बोल्या, “म्हें सोगन खाई ह क पोलुसनै मार्या पेली जीब प क्युंई कोनी धरां।

¹⁵जणा इब थे अर म्हापंचायत का सगळा जणा पलटण का सरदार क कनै जार ओ भानो लेल्यो क थे बिका मुकदमा क बारां म ठिक-ठिक जाच करबो चाओ हो, बिनै थारै कनै ल्याबा की बोलो, अर म्हें बिनै थारै कनै पुगबाऊँ पेलीई मार देस्यां।”

¹⁶आ बात पोलुस को भाण्जो सुणली क बे बिनै मारबा क चकरां म ह, जणा बो गड म जार आ बात पोलुसनै बता दि।

¹⁷जणा पोलुस एक सुबेदारनै बुलार बिऊँ बोल्यो, “इ मोट्यारनै पलटण का सरदार क कनै लेज्याओ, ओ बिऊँ क्युं बोलबो चावै।”

¹⁸जणा बो बिनै पलटण का सरदार क कनै लेज्यार बोल्यो, “केदि पोलुस मनै बुलार मेरूँ अंय्यां बोल्यो ह की ओ मोट्यार पलटण का सरदारऊँ क्युं बोलबो चावै ह, तू इनै बिकन लेज्या।”

¹⁹जणा पलटण को सरदार बिको हात पकड़र बिनै कूणा म लेज्यार बिऊँ बुज्यो, “तू मेरूँ काँई खेबो चावै ह?”

²⁰बो बिऊँ बोल्यो, “यहूदि आ साजिस करी, क थे पोलुसनै इ भानै पंचायत म लेर आओ अर अंय्यां मानो जंय्यां क बे बिकी ओर चोखी ढाळ जाच करबो चावीं हीं।

²¹पण थे बाकी मना मानज्यो, क्युं क बामैऊँ चाळिसऊँ बेसी मिनख बिकी घात म बेठ्या हीं, जखा आ सोगन खाराखी ह क, जद ताँई बे पोलुसनै नइ मार गेरीं जणा ताँई क्युंई कोनी खावीं पीवीं। अर बे इब त्यार हीं अर तेरी हामळनै उडिकीं हीं।”

²²जणा पलटण को सरदार ओ आदेस देर मोट्यारनै बिदा कर्यो, “आ कोईनैई मना खिजे क तू मनै अ बाता बताई ह।”

²³जणा पलटण को सरदार दो सुबेदारानै बुलार बोल्यो, “रात क नो बजे कैसरिया जाबा ताँई दो सो सिपाईड़ा, सत्तर घुड़सवार अर दो सो भाला बगाबाळानै त्यार राखो।

²⁴अर पोलुस ताँई बी घोड़ा त्यार राखो, जिऊँ बिनै राजपाल फेलिक्स क कनै राजी-खुसी पुगा सको।”

²⁵बो बाकै हात कागद भेज्यो जिमै अंय्यां मंडर्यो हो क,

²⁶“म्हराज राजपाल फेलिक्सनै कलोदियुस लूसियस को नमस्कार।

²⁷इ मिनखनै यहूदि पकड़र मारबो चावै हा, पण जद मनै इको बेरो पड़्यो की ओ रोमी ह। जणा सिपाईड़ा लेर इनै छुटा ल्यायो।

²⁸म आ जाणबो चाओ हो क बे इपै काँई दोस लगावीं हीं, जि बजेऊँ म इनै यहूदि म्हापंचायत लेगो।

²⁹जणा म समजगो की बे आपका धरम का नेम-कायदा क बारां म इपै दोस लगार्या हीं, पण इमै मार देबा अर इनै केद करबा जोगो इमै कोई दोस कोनी ह।

³⁰अर जद मनै ओ बेरो पड़्यो की बे इ मिनखनै मारबा क चकरां म हीं, जणा म तावळोसो इनै तेरै कनै भेज दिओ। अर इपै मुकदमो चलाबाळानै बी आदेस दिओ की तेरै सामै जार इपै मुकदमो बाजी करै।”

³¹जणा पाछै सिपाईड़ा ओडाया गेल बिनै रात्यु-रात अन्तिपतरिस नगरी म ल्याया।

³²अर दुसरा दिन पैदल चालबाळा सिपाईड़ा पोलुसनै घुड़सवारा क सागै छोडर पाछा सेनाहाळा गड म आग्या।

³³अर जद बे कैसरिया पुग्याक जणा बे पोलुसनै तो बि राजपाल क सामै खड़्यो कर्यो अर पलटण क सरदार क हातऊँ मंडेड़ो कागद बिनै दिओ।

³⁴बो कागद बाचर बो पोलुसनै बुज्यो, “तू कूणसा इलाका को ह?” अर जद बिनै ओ बेरो पड़गो क कलिकीया को ह

³⁵जणा बो बिऊँ बोल्यो, “जद तेरै प मुकदमाबाजी करबाळा आसी जणा तेरा मुकदमा की सुणाई होसी।” अर बे बिनै हेरोद का गड म निगरानी म राखबा ताँई ओडायो।