Read Shekhawati काम 5 Bible Online

काम 5 - Shekhawati bible

काम 5

¹बठै एक मिनख हो जिको नाम हनन्या हो अर बिकी लूगाई सफिरा नाम की ही बे दोन्यु मिलर आपकी जमीन को एक टुकड़ो बेच्यो।

²जणा बे दोन्यु जणा मिलर बि जमीन का रिपीआ मऊँ क्युंक थोड़ा घणा रिपीआ आपकै कनै राखलिआ अर बाकी का लेज्यार भेजेड़ा चेला क आगै कर दिआ।

³जणा पतरस बिऊँ बोल्यो, “हनन्या तेरा मन प सेतान कंय्यां कबजो कर लिओ क तू जमीन क बिकबाऊँ मिल्या पिसा म सक्यु राख'र पबितर आत्माऊँ झूठ बोलगो।

⁴बेचबाऊँ पेली इ जमीन प तेरोई हक हो अर बिकबा क पाछै बी बिका दाम तेराई हा। जणा पाछै तू तेरा मन म आ बात क्याले घड़ीं? अंय्यां कर तू मिनखाऊँ नइ पण परमेसरऊँ झूठ बोल्यो ह।”

⁵आ सुणताई हनन्या पड़गो अर पड़ताई पिराण तज दिआ। अर जत्ता बी आ सुणी अर देखी बा सगळा म डर बड़गो।

⁶अर क्युंक जवान मोट्यार आगै आर बिकी लासनै कफन म लपेटी अर बारनै लेज्यार बिनै गाड दिओ।

⁷करीब तीनेक घंटा पाछै बिकाळी लूगाई बी बठै आई अर जोक्यु बठै होयो बा बाता को बिनै कोनी बेरो हो।

⁸जणा पतरस बिनै बुज्यो, “तू बता थे बा जमीन अत्ता मई बेची ही के?” बा बोली, “हाँ, अत्ता मई बेची ही।”

⁹जणा पतरस बिऊँ बोल्यो, “थे दोन्यु परबु की पबितर आत्मानै बिचासबा ताँई क्याले सोची? इब देख तेरा मोट्यारनै गाडबाळा बारना मई खड़्या हीं अर बे तनै बी लेज्यासी।”

¹⁰जणा बा जदकी जद बिका पगा म पड़गी अर पड़ताई मरगी। जवान मोट्यार मांयनै आया जणा बा बानै मरेड़ी लाधी। जणा बे बिनै उठार बिका मोट्यार क कनैई बिनै बी गाड दिओ।

¹¹सगळी बिस्वासी मंडळी अर जत्ता बी इ बातनै सुणबाळा हा, बा सगळा म इ बात को डर बड़गो।

¹²भेजेड़ा चेला क हाता बोळी सेलाणी अर चमत्कार मिनखा म होर्या हा अर बे एक चित होर सुलेमान का बरिंडा म भेळा होता हा।

¹³बाकै सागै होबा की हिमत कोई मई कोनी ही पण इकै बावजुद बी लोग बाकी बडाई करता।

¹⁴अर बठिनै परबु प बिस्वास करबाळा लूगाई अर मिनख रोजकी बाकी टोळी म मिलता जार्या हा।

¹⁵भेजेड़ा चेला जोक्यु कर्या हा बिको नतिजो ओ होयो क लोग रोगलानै सड़का प खाट अर बिछावणा बिछार बापै सुवा देता क्युं क जद पतरस बठिकी जावै जणा बिकी छाया बापै पड़ सकै।

¹⁶यरूसलेम क आस-पास की नगर्याऊँ बी रोगला अर सूगली ओपरी बलाय रळेड़ा मिनखानै लेर आबा लाग्या। अर बे सगळा निरोगा होता हा।

¹⁷जणा म्हायाजक अर बाकै सागै का सदुकी पंथहाळा मिनख भेजेड़ा चेला प जळबा लागगा। जिकै चलतै बे बाकै खिलाप क्युं कारवाई करबा की सोची।

¹⁸अर बे बा भेजेड़ा चेलानै पकड़र कोठड़ी म बंद करवा दिआ।

¹⁹पण जंय्यांई रात होई जणा ईस्बर नगरी दुत आर बि कोठड़ी का कुआड़ानै खोल दिओ अर बा भेजेड़ा चेलानै बारनै लेज्यार बाऊँ बोल्यो,

²⁰“मनदर म जार खड़्या होवो अर इ नया जीवन की सगळी बाता मिनखानै सुणाओ।”

²¹जणा बे बिकी बात मानर भागपाट्याई मनदर म जा लिआ अर बठै सीख देबा लागगा। बठिनै म्हायाजक अर बिकाळा साती, इजरायल म रेह्बाळा सगळा बूडा-ठेरा की पंचायत बुलार बानै भेळा कर्या अर कोठड़ी म खुवा भेज्यो क बानै पंचायत क सामै हाजिर करो।

²²जणा सिपाईड़ा बानै ल्याबा ताँई कोठड़ी म गया। पण बे बानै बठै कोनी लाध्या, जणा सिपाईड़ा ओटा आर इ बात की खबर पंचायतनै दि।

²³अर कह्या, “म्हें कोठड़ी का बारना म पुग्याक जणा म्हानै बारना प कसर ताळो लागेड़ो लाध्यो अर पेरेदार बी पेरो देताई लाध्या पण जंय्यांई म्हें ताळो खोलर मांयनै बड़्याक जणा म्हानै बठै कोई कोनी लाध्यो।”

²⁴मनदर की रूखाळी करबाळा अर परधान याजक आ बात सुणर चकर म पड़ग्या क आखीरक बाकै सागै होयो तो होयो काँई?

²⁵अत्ता मई कोई आर बानै बतायो, “थे जानै कोठड़ी म बंद कर्या हा बे तो मनदर म मिनखानै सीख देर्या हीं।”

²⁶जणा मनदर की रूखाळी करबाळा सिपाईड़ा को सरदार आपहाळी सेना का क्युंक सिपाईड़ा क सागै गयो अर भेजेड़ा चेलानै बठैऊँ प्यारऊँ लिआयो। क्युं क बे मिनखाऊँ डरता हा इ ताँई बठै जोर-जबरदस्ती तो चाल कोनी सकै ही क कदै बे भाठा नइ बगाबा लागज्या।

²⁷बे बानै ल्यार बडी पंचायत क सामै हाजिर कर दिआ, जणा म्हायाजक बाऊँ बोल्या,

²⁸“म्हें थानै ठोक बजार आदेस दिन्यो हो क, बि मिनख का नाम की सीख मना दिज्यो, पण थारै काना प तो जुंई कोनी रिंगी। अर थे सगळा यरूसलेमनै बिकी सीखऊँ भर दिओ, थे काँई चाओ हो? बिको लोय म्हारै माथा मंढबो चाओ हो के?”

²⁹जणा पतरस अर दुसरा भेजेड़ा चेला बोल्या, “मिनखऊँ पेली परमेसर की बातनै मानबो जरूरी ह।

³⁰म्हारा बाप-दादा को परमेसर थारै हाता सुळी प चढार मार्या गया ईसुनै मोतऊँ ओज्यु जीवायो।

³¹अर परमेसर बिनैई आपका दाया हात कानि उचा पद प बिठार राजकुमार अर बचाबाळो बणायो ह। बो इजरायल का मिनखानै पापऊँ मन फेरबा को मोको अर पाप की माफी देसी।

³²अर आ बाता का गुवा म्हें हा, बंय्यांई पबितर आत्मा बी गुवा ह जिनै परमेसर बिका मानबाळानै दि ह।”

³³आ सुणर पंचायत का सदस्य लाल-ताता होर बानै मारबा की सोची।

³⁴पण बामै गमलिएल नाम को एक फरिसी जखो यहूदि नेम-कायदा सीखाबाळो हो अर सगळा मिनख बिकी ईज्जत करता हा। बो पंचायत म खड़्यो होर बा चेलानै चिनेक देर बारनै लेज्याबा ताँई हुकम दिओ।

³⁵जणा पाछै बो बोल्यो, “इजरायल का मिनखो, थे जखो आ मिनखा क सागै करबा जार्या हो बो सोच समजर करज्यो।

³⁶थानै याद होवै तो क्युंक बरसा पेली थियूदास आ खेतो होयो चमक्यो क म बी क्युं हूँ अर करीब च्यार सो मिनख बिकै गेल होलिआ, पण बो मार्यो गयो अर जत्ता बिनै मानता हा बे सगळा खिंडगा अर बिको आनदोलन मिटगो।

³⁷अर बंय्यांई नाम दरज कराबाळा दिना म गलिली यहूदा चमक्यो अर क्युंक मिनखानै बो बी आपकै गेल कर्यो पण बो बी मिटगो अर जत्ता बिनै मानता हा बे बी खिंडगा।

³⁸जणा म खेऊँ हूँ इमै टांग मना अड़ाओ अर आ मिनखानै खुला छोड द्‍यो क्युं क ओ काम ज मिनख कानिऊँ ह जणा अ सगळा मतैई मिट ज्यासी।

³⁹पण ज इमै परमेसर की मरजी ह जणा थे आनै कोनी रोक सकोगा। कदै अंय्यां नइ होज्या क थे परमेसरऊँ लड़बाळा बाज ज्याओ।”

⁴⁰जणा बे बिकाळी बात मानर बानै बुलवाया अर बाकै तड़ा पड़वार आ खेर छोड दिआ, अर आदेस दिओ क, “आईंदा इ ईसु नामऊँ कोई बात मना करज्यो।”

⁴¹बे राजी-खुसी पंचायतऊँ चलेगा क्युं क ईसु नामऊँ परमेसर बानै पिड़ा अर बेजती भोगबा जोगा समज्या।

⁴²बे रोजकी मनदर अर मिनखा क घरा म सीखाता अर चोखा समचार को परचार करता कोनी थक्या क ईसुई मसी ह।