Read Shekhawati काम 7 Bible Online

काम 7 - Shekhawati bible

काम 7

¹अर म्हायाजक बिऊँ बुज्यो, “अ बाता सची ह के?”

²जणा सतफनुस बोल्यो, “यहूदि भाई-भाणो अर मेरा बाप समान बडको मेरी सुणो। थानै बेरो होवै तो जद आपणो बाप अब्राहम हारान देस म बसबाऊँ पेली मिसोपोटामिआ म हो। जणा मेमाऊँ भरेड़ो परमेसर बिकै सामै परगट होयो।

³अर बिनै बोल्यो, ‘तू तेरा देस अर तेरा कूणबानै छोड-छाडर बि भौम म चल्योजा जखी म तनै दिखास्युं।’

⁴जणा बो परमेसर क कह्या गेल कसदिआ का देसनै छोडर हारान देस म चलेगो अर बिका बाप क मर्या पाछै परमेसर बिनै इ देस म ल्यायो जिमै आज थे रेहर्या हो।

⁵पण परमेसर बिनै बापोत म क्युंई कोनी दिओ अठै ताँई पग म्हेलबा की झघा बी कोनी दिनी। पण बिऊँ करार कर्यो क, ‘म तनै अर तेरै पाछै तेरा कूणबानै ओ देस देस्युँ।’ जद परमेसर अब्राहमऊँ ओ करार कर्यो हो बि टेम बिकै कोई आस-ओलाद कोनी ही।

⁶अर परमेसर बिऊँ अंय्यां बोल्यो, ‘तेरी ओलाद दिसावर म च्यार सो बरस ताँई गुलामी म रेह्सी अर बठै का मिनख बानै दिन घालसी।

⁷तेरा टाबरानै दिन घालबाळा देस को म न्याय करस्युं जणा पाछै बे बि देसऊँ अजाद होर अठै आर मेरी भगती करसी।’

⁸परमेसर अब्राहमऊँ बोल्यो क, ‘आपणा बिच होयड़ा करार की सेलाण आ ह की तेरा कूणबा का सगळा छोरा की सुन्नत[5] होणी चाए।’ इ बजेऊँ अब्राहम इसाक का जलम क पाछै आठवा दिन बिकी सुन्नत करी। अर अंय्यांई इसाक याकूब की अर याकूब आपका बारा छोरा की सुन्नत करी जखा आपणा बारा गोता का बाप-दादा हा।

⁹आपणा गोता का बाप-दादा आपका भाईड़ा युसूफ प जळता हा। जणा बे बिनै मिसर देस का मिनखानै बेच दिआ पण परमेसर बिकै सागै हो।

¹⁰अर बो बिनै सगळी तुम्ताऊँ बचायो। परमेसर बिनै बुदी देर मिसर का राजा की नजर्या म उठायो, जिऊँ राजा बिनै आपको खास आदमी बणा लिओ, जणा इब राज-काज की अर राज महल की सगळी जिमेदारी बिनैई सूप दिनी।

¹¹इकै पाछै बठै मिसर अर कनान देस म काळ पड़्यो जिऊँ तराई-तराई माचगी। अर आपणा बडकानै खाबा का लाला पड़गा।

¹²अर जद याकूब क काना म आ बात पड़ी क मिसर म अनाज ह जणा बो पेली आपणा बाप-दादा जखा बिका बेटा हीं बानै दाणा का जोगाड़ म मिसर भेज्यो।

¹³अर जद बे दुसर क मिसर आया जणा युसूफ आपका भायानै आपकी पिछाण बताई अर मिसर का राजानै बी जणाई बिका परवार का बारां म बेरो पड़्यो।

¹⁴जणा युसूफ आपका बाप याकूब अर आपका कूणबानै जखा कुल मिलार पिच्चेतर जणा हा, बा सगळानै मिसर बुलवालिआ।

¹⁵जणा याकूब अर बे सगळा मिसर गया, अर बो अर आपणा बाप-दादा बठैई पिराण तज्या।

¹⁶बठैऊँ बाकी हाड्यानै सेकेन ल्यार बि कबर म धर्या जिनै अब्राहम हमोर का बेटाऊँ मोल ली ही।

¹⁷अर जद अब्राहम क सागै परमेसर का करेड़ा करार क पूरो होबा को टेम आयो जणा मिसर म आपणा मिनखा की गिणती बोळी बढगी ही।

¹⁸जणा पाछै मिसर म दुसरो राजा होयो जखो युसूफनै कोनी जाणतो हो।

¹⁹बो आपणा मिनखा को फाईदो उठार बानै बोळो दिन घाल्यो, जिऊँ आपणा बडका आपका टाबरानै मरबा ताँई बारनै बगाबा प बेबस होगा।

²⁰अर बा दिना मई मूसा को जलम होयो, अर बो परमेसर क सामै बोळो सोवणो हो। अर तीन म्हेना ताँई बिका माँ-बाप बिनै घर मई पाळ्यो-पोस्यो।

²¹अर जद बिका माँ-बाप बिनै बारनै छोड्याया हा जणा बिनै मिसर का राजा की छोरी उठार आपकै सागै लेगी अर बिनै आपको टाबर कर पाळबा लागगी।

²²अर बिनै मिसरी मिनखा की सगळी बिद्‍या सीखाई गई ही, अर बो खेबा अर काम करबा म सागेड़ो होगो।

²³जद बो चाळिसेक बरस को होयो जणा बिको मन आपका इजरायल का यहूदि भाई-भाणाऊँ मिलबा को कर्यो।

²⁴जणा बो आ देख्यो क एक मिसरी मिनख एक इजरायली मिनख क सागै बुरो बरताव बरतर्यो ह, जणा बो बिनै बचायो अर बि मिसरी मिनखनै मार बिको बदलो लिआ

²⁵अर बो आ देखी क इब बिका यहूदि भाई-भाण आ जाण ज्यासी क परमेसर बिनै बाका छुटकारा ताँई भेज्यो ह, पण बाकै क्युंई पलै कोनी पड़ी।

²⁶आगलै दिन बो दो इजरायली यहूदि भाईड़ानै घुळता देख्यो जणा बो बानै छुटाबा ताँई बोल्यो थे तो दोन्यु इजरायली हो जणा पाछै आपसरी म क्युं घुळो हो।

²⁷पण बामैऊँ जखो बुरो बरताव बरतै हो बो मूसा क धको मार बोल्यो, ‘तनै म्हारै प कूण परधान अर न्याय करबाळो बणायो ह?

²⁸काल जंय्यां बि मिसरी मिनखनै मार्यो हो बंय्यांई तू मनै बी मारबो चावै ह के?’

²⁹आ सुणर मूसा भागर मिधान देस म बसगो, जठै बिकै दो टाबर होया।

³⁰चाळिस बरस ओर बितगा जणा बिनै सीनै डूँगरी क कनै उजाड़ म एक बळती झाड़ी की आँच म ईस्बर नगरी दुत दरसाव दिओ।

³¹आ देख ताँई मूसा ऊक-चूक होगो, जणा ओर सूल देखबा ताँई झाड़ी क कनै गयो, जणा बिनै परबु की उवाज सुणी,

³²‘म तेरा बाप-दादा को परमेसर हूँ, म अब्राहम, इसाक अर याकूब को परमेसर हूँ,’ आ सुणताई मूसा तो थर-थर धुजबा लाग्यो अर बिकी क्युं देखबा की हिमत कोनी होई।

³³परबु बिऊँ बोल्यो, ‘पगा मऊँ खुसड़ा काड दे क्युं क जि धरती प तू खड़्यो ह बा पबितर झघा ह।

³⁴म मेरा मिनख, जखा मिसर म हीं बाकी दुरदसा देख्यो हूँ अर बाको बार-घोड़ो सुण्यो हूँ, जणाई तो म बानै बठैऊँ छुटाबा ताँई तळै उतर्यो हूँ, इब तू आज्या म तनै मिसर म भेजस्युं।’

³⁵ओ बोई मूसा ह जिनै बे ओ खेर भगा दिओ हो क तनै कूण म्हारै प परधान अर न्याय करबाळो बणायो ह? बिनैई परमेसर बि ईस्बर नगरी दुत क जरिए जखो बिनै झाड़ी म दरसाव दिओ हो, राजकरबा अर अजाद करबा ताँई भेज्यो।

³⁶ओ बोई मूसा ह जखो बानै मिसर देस, लाल समदर अर बि उजाड़ म चाळिस बरसा ताँई सेलाणी-चमत्कार दिखार बानै लिआयो।

³⁷ओ बोई मूसा ह जखो इजरायल का मिनखानै बोल्यो हो, ‘परमेसर थारा यहूदि भाया मऊँ मेरी जंय्यां को परमेसर की खेबाळो भेजसी।’

³⁸ओ बोई ह जखो उजाड़ म इजरायली मिनखा की मंडळी क सागै हो, जिऊँ सीनै डूँगरी प ईस्बर नगरी दुत बतळायो हो अर बो आपणा बाप-दादा क सागै बी हो। अर जिनै आपणा ताँई परमेसरऊँ जीवन देबाळा बचन मिल्या।

³⁹पण आपणा बाप-दादा बिकी कोनी मानी, अर बे बिनै तज'र आपका मननै बदलर ओज्यु मिसर जाबो चावै हा।

⁴⁰अर हारुणऊँ बोल्या, ‘म्हारै ताँई अंय्यां को देवता बणा जखो म्हारै आगै-आगै चालै, क्युं क जखो मूसा म्हानै मिसर देसऊँ ल्यायो म्हें कोनी जाणा क बिकै सागै काँई होयो?’

⁴¹बा दिना म बे आप ताँई एक गाय का बाछ्या की मूरती घड़र धर लिनी अर बिकै बलि चढार खुदका हाताऊँ बणाएड़ी मूरती प खुसी मनाई।

⁴²जणा परमेसर बाऊँ मुंडो फेर लिओ, अर बानै आसमान का चाँद-तारानै धोकबा ताँई छोड दिओ जंय्यां की परमेसर की खेबाळा की पोथ्या म मंडर्यो ह, ‘ओ इजरायल का कूणबा का मिनखो, थे उजाड़ म चाळिस बरसा म मनै ज्यानबर अर चढावो चढाया हो के?

⁴³पण थे तो मोलेक देवता का तम्मू अर तारा देवता रिफान की मूरतीनै सागै लिआ हांडता हा जखी मूरत्यानै थे धोकबा ताँई बणाई ही, इ ताँई म थानै बेबिलोन क परै लेज्यार गुलामी म देस्युँ।’

⁴⁴बि उजाड़ म परमेसर को तम्मू जिमै आपणा बापदादा परमेसरऊँ अरदास करता हा बो बी आपणा बाप-दादा क सागै हो। अर ओ ठिक बंय्यांई हो जंय्यां परमेसर मूसानै दिखार बिनै बणाबा ताँई ओडायो हो।

⁴⁵इकै पाछै आपणा बाप-दादानै ओ तम्मू बाका बापदादाऊँ मिल्यो अर जद बे यहोसू क सागै अठै आया अर बिकाळी निगा म बे बा जात्याऊँ इ देसनै ले लिओ हो, जानै आपणा बाप-दादा क सामैऊँ परमेसर भगा दिओ हो, अर बो तम्मू दाऊद क जमाना ताँई अठैई रिह्यो।

⁴⁶परमेसर दाऊद प दया करी, जणा बो बिऊँ इजरायल का मिनखा ताँई परमेसर को बडो अरदास घर बणाबा की अरदास करी।

⁴⁷पण परमेसर का मनदरनै राजा सुलेमान बणायो हो।

⁴⁸पण परम-परधान परमेसर तो हाताऊँ बणाएड़ा मनदर म कोनी रेह्‍वै। जंय्यां की परमेसर की खेबाळा बोल्यो ह,

⁴⁹परबु खेवै ह, ‘ईस्बर नगरी मेरो सिंघासन अर आ धरती मेरा पगा तळै की चोकी ह, थे मेर ताँई कंय्यां को घर बणास्यो? धरती प अंय्यां की कोई झघा ह के जठै म अराम कर सकूँ?

⁵⁰अ सगळी चिजा मेरीई तो बणाएड़ी ह।’”

⁵¹आ खेर सतफनुस बानै सुणाबा लाग्यो, “परमेसरनै कोनी मानबाळा अर बिका बचनानै नइ सुणबाळा ढिट मिनखो, थे सदाई थारा बाप-दादा की जंय्यां पबितर आत्मा को बिरोद करता आया हो।

⁵²अंय्यां को कोई परमेसर की खेबाळो होयो हो के जिनै थारा बाप-दादा कोनी सताया हो? बे बा परमेसर की खेबाळानै मार गेर्या जखा बि परमेसर का धरमी दास क आबा को समचार पेल्याई दिआ करता हा। अर ठिक बंय्यांई थे बी बिनै धोकाऊँ पकड़ाबाळा अर मारबाळा होया।

⁵³थानै ईस्बर नगरी दुताऊँ नेम-कायदा का हुकम तो मिलग्या पण थे आनै कोनी मानो।”

⁵⁴अ बाता सुणताई बे सतफनुस प लाल-ताता होगा, अर आँख्या का'डर जाड़ भीचबा लागगा।

⁵⁵पण बो तो पबितर आत्माऊँ भर'र ईस्बर नगरी कानि देख्यो, जणा बो परमेसर की मेमा का तेज अर परमेसर क दाया हात कानि ईसुनै खड़्यो देखर

⁵⁶बोल्यो, “सुणो म ईस्बर नगरीनै खुली अर मिनख का बेटानै परमेसर क दाया हात कानि खड़्यो देखर्यो हूँ।”

⁵⁷आ सुणताई बे आपका कान बंद कर लिआ अर जोरऊँ चिलाटी घालर एक सागै बिपै टूटर पड़्या।

⁵⁸बे बिकै सागै धका-मुकी करताई बिनै नगरी क बारनै लेग्या अर बिपै भाठा बगाबा लाग्या। अर बिकै खिलाप हाळा गुवा आप-आपका गाबा साऊल क पगा म म्हेल दिआ।

⁵⁹अर बे बिपै भाठा बगाबा लागर्या हा बि टेमई बो परमेसरऊँ आ खेतो अरदास करबा लाग्यो, “ओ परबु ईसु मेरा पिराणानै थारै कनै बुलाल्यो।”

⁶⁰इकै पाछै बो गोडावाणी पड़्यो अर जोरऊँ बोल्यो, “परबु ओ पाप आपै मना मंढो।” आ खेर बो पिराण तज दिआ।