Read Shekhawati काम 8 Bible Online

काम 8 - Shekhawati bible

काम 8

¹सतफनुस की मोतनै साऊल सई बतायो। बि दिनऊँई बिस्वासी मंडळ्या प तुमत आ पड़ी जिऊँ ईसु का भेजेड़ा चेलानै छोडर बाकी सगळा बिस्वासी यहूदिआ अर सामरीया म बिखरगा।

²बामैऊँ क्युं क भगत सतफनुसनै गाड्या अर बिकै मरबा को म्हातम मनायो।

³अर साऊल हो जखो बिस्वासी मंडळ्यानै उजाड़तो फिरतो हो अर बो घरा मऊँ काड-काडर घिसर मोट्यार-लूगायानै जेळ म बंद करबा लाग्यो।

⁴अर दुसरी कानि बे बिखरेड़ा बिस्वासी जठै बी गया बठैई ईसु को चोखो समचार सुणाबा लागगा।

⁵फलिपूस सामरीया नाम की नगरी म जार बठै ईसुई मसी ह इकै बारां म परचार करबा लाग्यो।

⁶फलिपूस की बातानै सुणर अर बिका सेलाणी चमत्कारानै देखर लोग बिकी बाता प गोर धर्या।

⁷क्युं क बिका हाताऊँ बोळाजणा मऊँ सूगली ओपरी बलाया बार घालतीई निकळै ही। अर बोळा भाळ भेयड़ा अर लंगड़ा बिका हाताऊँ निरोगा होया।

⁸इ बजेऊँ नगरी का मिनख बोळा राजी होया।

⁹बि नगरी म समोन नाम को एक मिनख हो, जखो मिनखानै जादू दिखार ताजूब म गेर देतो। अर खुदनै बडो आदमी बतातो।

¹⁰छोटाऊँ लेर बडा ताँई सगळा बिकी बाता प गोर धरता हा, अर बिका बारां म खेता हा क, “बो परमेसर की बा सक्‍ति ह जखी बोळी तगड़ी खुवावै ह।”

¹¹क्युं क बो बोळा दिना ताँई बा मिनखानै जादू दिखार ताजूब म गेर राख्यो हो इ ताँई मिनख बिकाळी बाता प गोर धरता हा।

¹²पण जद फलिपूस मिनखानै परमेसर का राज अर ईसु मसी का नाम को चोखो समचार सुणायो जणा बे बिकी बाता प बिस्वास कर्या अर सगळा मोट्यार लूगाई बतिस्मो लिओ।

¹³आ देखर समोन खुदबी बिकी बाता प बिस्वास कर्यो अर ईसु मसी का नामऊँ बतिस्मो लेर बिकै गेल होलिओ, अर बो बा बडा-बडा सेलाणी-चमत्कारा अर अचरजभर्या कामानै देखर चोरंगो होज्यातो हो।

¹⁴अर जद ईसु का भेजेड़ा चेलानै ओ बेरो पड़्यो क सामरीया का रेह्बाळा परमेसर का बचनानै मानबा लागगा हीं जणा बे पतरस अर यहून्नानै बाकन भेज्या।

¹⁵अर बे बठै जार बा सगळा ताँई अरदास करी क बा सगळानै पबितर आत्मा मिलै।

¹⁶क्युं क हाल ताँई बे परबु ईसु का नामऊँ बतिस्मोई लिआ हा, बामैऊँ कोईसानैई परमेसर को आत्मा कोनी मिल्यो हो।

¹⁷जणा पतरस अर यहून्ना बापै हात धर्या अर बानै पबितर आत्मा मिलगो।

¹⁸समोन आ देख्यो क बाकै हात धरबाऊँ मिनखानै पबितर आत्मा मिल जावै ह जणा बो बाकै सामै रिपीआ धर'र बोल्यो,

¹⁹“अल्यो रिपीआ अर आ सक्‍ति मनै बी द्‍यो जिऊँ म बी जिपै हात धरूँ बिनै पबितर आत्मा मिलै।”

²⁰जणा पतरस बोल्यो, “तेरा रिपीआ बी तेरै सागै नास होज्यावै क्युं क तू परमेसर का बरदाननै रिपीआऊँ मोल लेबो चावै ह।

²¹इ चिज म तेरी कोई पाँती कोनी क्युं क परमेसर ताँई तेरै हिया म पेटा पाप ह।

²²इ ताँई तू बुरा कामाऊँ तौबा कर अर परबुऊँ अरदास कर जिऊँ तेरा हिया का बुरा बिचार माफ होज्यासी।

²³क्युं क तू बळोकड़ो ह अर पाप म उळजर्यो ह।”

²⁴जणा समोन बाऊँ बोल्यो, “थे मेर ताँई अरदास करो क थारा मुंडाऊँ निकळेड़ी कोईबी बात मेर प नइ पड़ै।”

²⁵जणा पाछै बे आपकी गुवाई देर अर परमेसर को बचन सुणार यरूसलेम हाळा गेला म सामरीया का कई गाँवा म ईसु को उपदेस सुणाता ओटा यरूसलेम पुगग्या।

²⁶जणा पाछै परमेसर को एक ईस्बर नगरी दुत फलिपूसनै आर बोल्यो, “खड़्यो हो अर दिखणाद कानि बि सुन्ना गेला म जा जखो यरूसलेमऊँ गाजा नगरी म जावै ह।”

²⁷जणा बो त्यार होर चाल पड़्यो अर बि गेला मई कूस देस को एक मिनख भगती कर यरूसलेमऊँ आर्यो हो जिनै हिंजड़ो बणायो गयो हो अर ओ कूस देस की राणी कन्दाकी का सगळा खजाना को अधिकारी हो।

²⁸बि टेम बो आपका रथ म बेठ्यो-बेठ्यो यसाया परमेसर की खेबाळा की पोथी मऊँ बाचर्यो हो।

²⁹जणा पबितर आत्मा फलिपूसऊँ बोल्यो, “इ रथ क सागै होले।”

³⁰जणा बो भागर बि रथ क कनै गयो जणा बो बिनै यसाया की पोथी बाचता सुण्यो अर आ सुणर बो बिनै बुज्यो, “तू जखा बाचै ह बानै समजै ह के?”

³¹जणा बो फलिपूसऊँ बोल्यो, “जद ताँई कोई मनै आ बचनानै कोनी समजावै जद ताँई म कंय्यां आका भेदानै जाणू।” अर बो बिऊँ बोल्यो, “थे उपर मेर कनै आर बिराजो।”

³²सास्तरऊँ जखो लेख बो बाचर्यो हो बो अंय्यां हो, “बिनै मारबा ताँई बि लल्डी की जंय्यां लेर गयो जखी कटबाळी होवै, अर जंय्यां उन्यो ऊन कतरबाळा क आगै चुपचालो सिदो खड़्यो रेह्‍वै ह बंय्यांई बो बी आपको मुंडो कोनी खोल्यो।

³³बिकी दुरदसा करी गई। बिनै न्याय कोनी मिल्यो। इ धरतीऊँ बिको जीव तो खोस लिओ गयो। अर इब बिकी पिडी क बारां म कूण बतावै?”

³⁴इपै बो हिंजड़ो हो जखो फलिपूसऊँ अरदास कर बुज्यो, “मनै अंय्यां बता अठै आ बात की ताँई बोली गई ह, ओ परमेसर की खेबाळो आपकी बात करै ह, क ओर कोईकी।”

³⁵जणा फलिपूस बोलबा लाग्यो अर बिनै सास्तर की आ बाताऊँ लेर ईसु का चोखा समचार ताँई सुणा दिओ।

³⁶अर बे चालता-चालता एक पाणी हाळी झघा पुग्या, जणा पाणीनै देखर हिंजड़ो बिऊँ बोल्यो, “अठै पाणी तो हई, जणा पाछै मनै बतिस्मो लेबा म काँई ढिलाई ह।”

³⁷[6](फलिपूस बिनै जुबाब दिओ, “तू तेरा मनऊँ पूरो बिस्वास करै जणा तनै कूण डाट सकै ह।” बो बोल्यो, “हाँ म मेरा पूरा मनऊँ मानू हूँ क परबु ईसु मसीई परमेसर को बेटो ह।”)

³⁸जणा पाछै हिंजड़ो रथनै रोकबा ताँई ओडायो अर बे दोन्यु जणा पाणी म उतर्या अर फलिपूस बिनै बतिस्मो दिओ।

³⁹अर जंय्यांई बे पाणी क बारनै निकळ्याक परबु की पबितर आत्मा फलिपूसनै उठा लेगो अर बिकै पाछै बो हिंजड़ो बिनै कोनी देख्यो अर बो राजी-खुसी आपका गेलै चलेगो।

⁴⁰अर दुसरी कानि फलिपूस खुदनै असदोद नगरी म पायो, अर नगरी-नगरी ईसु को चोखो समचार सुणातो-सुणातो कैसरिया पुगग्यो।