Read Shekhawati रोम 13 Bible Online

रोम 13 - Shekhawati bible

रोम 13

¹सगळा मिनखानै अधिकार्या का कायदा कानून मानबो चाए। क्युं क परमेसर की मरजी क बिना कोई राज कोनी कर सकै, अर परमेसरई अधिकारी बणावै ह।

²जणा जखो बी अधिकारी को बिरोद करै ह, बो परमेसर का हुकमा को बिरोद करै ह। अर जखा परमेसर की व्यवस्था को बिरोद करीं हीं बानै सजा मिलसी।

³क्युं क अधिकारी चोखा काम करबाळानै डराबा ताँई नइ पण बुरा काम करबाळानै डराबानै ह। अर ज थे परधानऊँ नइ डरबो चाओ जणा चोखा काम करो जिऊँ अधिकार्याऊँ थारी बडाई होसी।

⁴क्युं क अधिकारी थारी भलाई ताँई परमेसर को सेवक ह। पण ज तू बुरो करै ह जणा बिऊँ डर क्युं क बो अंय्यांई तलवार कोनी ले मेली। बो परमेसर को सेवक ह जखो बुराई करबाळा प बिका न्यायनै ल्यावै ह।

⁵इ बजेऊँ थानै अधिकारी को कह्यो मानबो जरूरी ह। सजा का डरऊँई नइ पण थारी अन्तर-आत्मा की बजेऊँ बी ओ जरूरी ह।

⁶जणाई थे लगान बी चुकाओ हो, क्युं क अधिकारी परमेसर का सेवक होवीं हीं जखा आपको काम पूरो करबा म लाग्या रेह्‍वै।

⁷कोईकी उधारी ह जणा बिनै चुकतो कर दे, अर जखो कर जिनै देणो ह बिनै दे। अर चुंगी लेबाळानै चुंगी दे। जिऊँ डरबो चाए बिऊँ डर अर जिको मान करबो चाए बिको मान कर।

⁸आपसी प्यार-परेम क अलावा कोईको करजो खुद प मना राख। क्युं क एक दुसराऊँ परेम करबाळो नेम-कायदानै पूरो करै ह।

⁹जंय्यां क, “तू कुकरम मना करै, हत्या मना करै, चोरी मना करै, दुसरा की चिजा को लालच मना करै,” अ सगळा अर बचेड़ा सगळा हुकम बी इ हुकम क मांयनै ह क, “तू दुसराऊँ बी तेरी जंय्यां परेम कर।”

¹⁰ज थे कोईऊँ परेम करो हो जणा थे बाको बुरो कोनी चाओ। परेम करबो सगळा नेम-कायदानै पूरो करबो ह।

¹¹आज का टेमनै देखता अंय्यां कर, थे जाणो हो क निंदऊँ जागबा की घड़ी आगी ह। क्युं क इब आपणो छुटकारो बि टेमऊँ सांकड़ैई ह जद आपा बिस्वास कर्यो हो।

¹²रात ढळबाळी ह, अर दिन उगबाळो ह। अँधेरा का काम करबो छोडो अर उजाळा का हतियार उठाल्यो।

¹³जणा क्युंना आपा सूल रेह्‍वां जंय्यां मिनख दिन का उजाळा म रेह्‍वै। खा पीर धुत्त रेह्बाळासा नइ, नइ कुकरम अर रांडबाज की जंय्यां, नइ लड़बाळा की जंय्यां अर नइ बळोकड़ा की जंय्यां।

¹⁴पण परबु ईसु मसी का सुभावनै लेर आपणा पापी सुभावनै अर मन की इंछ्यानै मारो।