Read Shekhawati रोम 2 Bible Online

रोम 2 - Shekhawati bible

रोम 2

¹थे जखा दुसरा को न्याय करो हो थारै कनै कोई भानो कोनी क्युं क थे दुसरा की जखी बाता को न्याय करो हो बा बाता म खुदई दोसी हो। जखी बाता को थे न्याय करो हो बे बाता थे खुदई करो हो।

²पण आपा जाणा हां क परमेसर को सचो न्याय बापै पड़ै ह जखा अंय्यां का करम करीं हीं।

³पण तू जखो अ सगळा काम करबाळा को न्याय करै ह जदकी तू खुद अ काम करै ह, जणा तू के जाणै ह क तू परमेसर का न्यायऊँ बच ज्यासी?

⁴थे बिकी दया अर बिकी सहनसिलता अर बिका थ्यावसनै ख्याई जोगो कोनी समजो के? तू सचमई जाणै ह क परमेसर की दया तनै पापऊँ मन फिराबा कानि लेज्यावै ह।

⁵पण थारा जीद्दि सुभाव अर पापऊँ मन नइ फेरबा की बजेऊँ थे थारै ताँई झाळ भेळी करर्या हो अर आ झाळ थार प बि दिन पड़सी जद परमेसर आपको सचो न्याय परगट करसी।

⁶क्युं क परमेसर हरेकनै बिका करमा गेल फळ देसी।

⁷बे मिनख जखा थ्यावसऊँ भला कामा म लागर मेमा, मान-समान अर अजर-अमर जीवननै टोवीं हीं बानै परमेसर अजर-अमर को जीवन देसी।

⁸पण जखा खुदकी परवा करीं हीं अर सचनै कोनी मानी पण बुरो करीं हीं, बापै परमेसर की झाळ अर रीस पड़सी।

⁹बुराई का गेला प चालबाळा दुख संकट भोगसी, आ बात पेली यहूदि मिनखा प अर सागै की सागै यूनानी मिनखा प बी लागू होवै ह।

¹⁰बा मिनखानै मेमा, मान-समान अर सुक-स्यांती मिलसी जखा भला काम करीं हीं। आ बात पेली यहूदि मिनखा प अर सागै की सागै यूनानी मिनखा प बी लागू होवै ह।

¹¹परमेसर भेद-भाव कोनी करै।

¹²जखा नेम-कायदानै जाण्या बिना पाप करीं हीं बे बिना नेम-कायदा क नास कर्या ज्यासी। अर जखा नेम-कायदानै जाणर पाप करीं हीं बे नेम-कायदा गेल नास कर्या ज्यासी।

¹³क्युं क नेम-कायदानै सुणबाळा परमेसर की नजर्या म धरमी कोनी होवै, पण बिपै चालबाळो धरमी बाजै।

¹⁴जद परमेसरनै नइ ध्यारबाळा जखा नेम-कायदा का नियमानै कोनी जाणै इकै पाछै बी ज बे आपकी समजऊँ नेम-कायदा की बातानै मानै जणा बे बिना नेम-कायदाई खुद ताँई नेम-कायदा ह।

¹⁵बाका काम आ दिखावै ह क नेम-कायदो बाका मना प मंडर्यो ह, बाकी अन्तर-आत्मा गुवाई देवै ह, कदै-कदै बाका बिचार बापै दोस लगावै अर कदै-कदै बानै बचावै ह।

¹⁶अ बाता चोखा समचार गेल जिको म परचार करूं हूँ बि दिन होसी जि दिन परमेसर मसी ईसु क जरिए मिनखा की लुखेड़ी बाता को न्याय करसी।

¹⁷तू खुदनै यहूदि मानै ह अर नेम-कायदा प तनै बिस्वास ह अर परमेसर प तनै गुमान ह,

¹⁸तू परमेसर की इंछ्यानै जाणै अर जखो सई ह बिनै मानै ह क्युं क नेम-कायदाऊँ तनै अ सीखाया गया ह।

¹⁹तू आ मानै ह क तू आँदा की आँख ह अर जखा अँधेरा म भटकर्या हीं बा ताँई च्यानणो ह,

²⁰मूरखानै गेलो बताबाळो ह अर टाबरानै सीखाबाळो ह क्युं क नेम-कायदाऊँ तनै सगळो ज्ञान अर सच मिल्यो ह।

²¹तू जखो दुसरानै सीखावै खुदनै क्युं कोनी सीखावै? तू जखो दुसरानै चोरी नइ करबा को परचार करै, खुद चोरी क्याले करै ह?

²²तू सीखावै ह क, “कुकरम नइ करनो चाए,” जणा खुद क्याले करै ह? तू जखो मूरत्याऊँ नफरत करै, मनदरनै क्याले लूटै ह?

²³तू खुद नेम-कायदा प गुमान करै, जणा नेम-कायदा का नियमानै तोड़र परमेसर को अपमान क्याले करै ह?

²⁴जंय्यां क पबितर सास्तर म मंडेड़ो ह क, “थारी बजेऊँ परमेसरनै नइ ध्यारबाळा मिनखा म परमेसर की बुराई होवै ह।”

²⁵क्युं क ज थे नेम-कायदानै मानो जणा तो सुन्नत को मतबल ह, पण ज थे नेम-कायदा का नियमानै तोड़ो जणा सुन्नत करायड़ा बी नइ करायड़ासा हो।

²⁶ज कोई गैर-यहूदि जखो बिना सुन्नत हाळो ह नेम-कायदा प चालै जणा बिनै सुन्नत हाळो नइ होबा प बी परमेसर सची सुन्नत हाळो गिणसी।

²⁷तू जिकी सुन्नत होईड़ी ह अर तेरै कनै मंडेड़ो नेम-कायदो बी ह इकै पाछै बी तू नेम-कायदा का नियमानै तोड़ै जणा जिकी कायाऊँ सुन्नत कोनी होईड़ी पण नेम-कायदा प चालै ह, बो तनै दोसी बतासी।

²⁸जखो मिनख देख-दिखावा को यहूदि ह बो सचो यहूदि कोनी अर काया की सुन्नत, सची सुन्नत कोनी।

²⁹सचो यहूदि बो ह जखो मांयऊँ यहूदि ह अर सची सुन्नत बा सुन्नत ह जखी आत्मा क जरिए मन की होवै ह मांडेड़ा नेम-कायदाऊँ नइ। अंय्यां का मिनख की बडाई मिनख नइ पण परमेसर खुद करै ह।