Read Shekhawati रोम 4 Bible Online

रोम 4 - Shekhawati bible

रोम 4

¹जणा पाछै म्हें काँई बोलां क आपणा धरती का बडका अब्राहमनै इ धारमिक्‍ताऊँ काँई समज म आयो?

²क्युं क ज अब्राहमनै बिका कामा की बजेऊँ धरमी गिण्यो जातो, जणा आतो बि ताँई गुमान करबा की बात ही, पण परमेसर क सामै नइ।

³पबितर सास्तर काँई खेवै ह? “अब्राहम परमेसर प बिस्वास कर्यो, जिकी बजेऊँ बो धरमी खुवायो।”

⁴काम करबाळानै मजुरी देबो कोई एसान कोनी ह, बो तो बिको हक ह।

⁵पण ज कोई मिनख करम कोनी करै पण खाली बि परमेसर म बिस्वास करै जखो पाप्यानै धरमी बणावै ह, जणा बिको बिस्वासई बिकी धारमिक्‍ता खुवावै ह।

⁶जिनै परमेसर बिना करमा क धरमी मानै बिनै दाऊद बी धने खेवै ह,

⁷“भागहाळो ह बो जिका अधरम माफ कर्या गया, अर जखा का पापनै ढक्यो गयो!

⁸भागहाळो ह बो मिनख जिका पाप परबु कोनी गिणै!”

⁹जणा आ धारमिक्‍ता हाळी बात यहूदि मिनखा पई नइ पण गैर-यहूदि मिनखा प बी लागू होवै ह। क्युं क जंय्यां म्हें कह्या हा क, “अब्राहम को बिस्वास बि ताँई धारमिक्‍ता गिण्यो गयो।”

¹⁰बिको बिस्वास धारमिक्‍ता म कद गिण्यो गयो? के बिकी सुन्नत होबा क पाछै? नइ, सुन्नत होबा क पाछै नइ पण पेली!

¹¹इकै पाछै धारमिक्‍ता की छाप क रूप म एक सेलाण की जंय्यां बो सुन्नत करवाई। ओ बिस्वास बो जद दरसायो हो जि टेम का बिकी सुन्नत कोनी होई ही। जणा बो बा सगळा को बाप ह जखा बिना सुन्नतहाळा हीं पण बिस्वास करीं हीं। जिऊँ गैर-यहूदि बी धरमी गिण्या जावै।

¹²जखो बिस्वास अब्राहम आपकी सुन्नत होबाऊँ पेली कर्यो, ज सुन्नतहाळा सुन्नत की सेलाण क सागै बंय्यां को बिस्वास बी करै जणा बो बाको बी बाप ह।

¹³अब्राहम अर बिकी ओलादानै ओ करार क बे जगत का वारिस होसी, नेम-कायदाऊँ कोनी मिल्या पण बि धारमिक्‍ताऊँ मिल्या जखी बिस्वास की बजेऊँ आई ही।

¹⁴ज नेम-कायदानै मानबाळा जगत का वारिस होता जणा बिस्वास को काँई मोल रेह्तो अर करार बी बेकार होज्यातो।

¹⁵क्युं क नेम-कायदा का नियमानै तोड़बाऊँ परमेसर की झाळ मिनखा प पड़ै ह अर जठै नेम-कायदा कोनी बठै बिनै तोड़बा की गुंजाईस कोनी।

¹⁶जणा इऊँ आ बात साबित होवै ह क परमेसर को करार बिस्वास को फळ होवै ह जखो बिकी दयाऊँ मिलै ह। आई बजे ह क बिको करार अब्राहम की सगळी पिड्या प लागू होवै ह, खाली नेम-कायदा का नियमानै मानबाळा पई नइ पण बा सगळा प बी जखा अब्राहम की जंय्यां को बिस्वास राखीं हीं। बो आपणा सगळा को बाप ह।

¹⁷जंय्यां क पबितर सास्तर म मंडर्यो ह, “म तनै बोळा कूणबा को बाप बणायो।” बि परमेसर क सामै जिपै बो बिस्वास कर्यो जखो मरेड़ानै ओज्यु जीवावै ह अर जखी बात आथई कोनी बानै परगट करै ह बो अब्राहम आपणो बाप ह।

¹⁸जठै आस करबा की गुंजाईस कोनी बठै आपका मन म आस लेर अब्राहम बिपै बिस्वास कर्यो, आई बजे ही क बो कह्या गेल बोळा कूणबा को बाप बण्यो जंय्यां पबितर सास्तर म मंडर्यो ह, “तेरै बोळी ओलाद होसी जखी गिणी कोनी जासी।”

¹⁹बो चोखी तर्या जाणतो हो क बिकी काया सो बरस की बूडी मरियलसी होगी अर सारा बांझ ह, इकै बावजुद बी बिस्वास म बिना हाल्या

²⁰परमेसर का करार म बिस्वास जगायो राख्यो। आई नइ पण बिस्वासनै ओर बी मजबूत कर परमेसरनै मेमा दि।

²¹बिनै पक्को बिस्वास हो क जखो करार परमेसर बिऊँ कर्यो ह बिनै बो पूरो करबा की ताकत राखै ह।

²²आई बजे ही क बिको ओ बिस्वास बिकी धारमिक्‍ता गिण्यो गयो।

²³पबितर सास्तर को ओ बचन क, “बिस्वास बि ताँई धारमिक्‍ता गिण्यो गयो”, खाली बि ताँई नइ

²⁴पण आपणा ताँई बी ह। परमेसर आपानै जखा बिपै बिस्वास राखां हां धरमी मानसी। बो आपणा परबु ईसुनै ओज्यु जीवायो।

²⁵ईसुनै आपणा पाप ताँई मरबानै दिओ गयो अर आपानै धरमी बणाबा ताँई मरेड़ा मऊँ ओज्यु जीवायो गयो।