Read Shekhawati रोम 8 Bible Online

रोम 8 - Shekhawati bible

रोम 8

¹जणा इब मसी ईसु म जिबाळा ताँई कोई दंड कोनी,

²क्युं क मसी ईसु म जीवन देबाळी पबितर आत्मा को नेम-कायदो मनै पाप अर मोत का बिधानऊँ छुटावै ह।

³नेम-कायदो आपानै कोनी बचा सक्यो क्युं क पापी मिनख सुभाव की बजेऊँ बो कमजोर होगो। जणा परमेसर बो कर्यो जखो नेम-कायदो कोनी कर सक्यो, बो आपका एकलोता बेटानै आपणा पाप की सजा भोगबा ताँई आपणी पाप्या की काया स्यारकी काया म भेज्यो। अंय्यां परमेसर पापी काया म पापनै दंड दिओ।

⁴जिऊँ नेम-कायदा की जुर्त आपणा म पूरी होज्यावै क्युं क आपा मिनख सुभाव की बिधीऊँ नइ पण पबितर आत्मा की बिधी गेल जीवां हां।

⁵क्युं क बे जखा आपकी काया का सुभाव गेल जिवीं हीं बाका मन काया की इंछ्या पूरी करबा म लाग्या रेह्‍वै पण जखा पबितर आत्मा गेल जिवीं हीं बाका मन जखो पबितर आत्मा चावै बा बाता म लाग्या रेह्‍वै ह।

⁶काया की बाता प मन लगाबो तो मरबो ह, पण पबितर आत्मा प मन लगाबो जीवन अर स्यांती ह।

⁷काया प मन लगाबो तो परमेसरऊँ बेर बांदबो ह, क्युं क आ नइ तो परमेसर का नियमा प चालै अर नइ कदै चाल सकै।

⁸अर बे जखा काया का सुभाव गेल जिवीं हीं बे परमेसरनै राजी कोनी कर सकै।

⁹ज थारै म परमेसर को पबितर आत्मा बास करै ह जणा थे काया का सुभाव गेल कोनी जीओ पण पबितर आत्मा गेल जीओ हो। क्युं क जिमै मसी को पबितर आत्मा बास कोनी करै बो मसी को कोनी।

¹⁰ज थारै म मसी बास करै ह जणा थारी काया पाप की बजेऊँ मरेड़ी होबा क बावजुद बी थारी आत्मा धारमिक्‍ता की बजेऊँ जीवै ह।

¹¹अर ज बो पबितर आत्मा जखो मसी ईसुनै मरेड़ा मऊँ जीवायो हो, थारै मांयनै बास करै ह जणा बो, जखो मसी ईसुनै मरेड़ा मऊँ ओज्यु जीवायो हो थारी नसबर कायानै आपकी पबितर आत्माऊँ जखी थारै मांयनै बास करै ह ओज्यु जीवासी।

¹²जणा पाछै मेरा लाडला बिस्वास्यो, आपणा प इ काया को कोई एसान कोनी जिऊँ आपा इकै गेलई जीवां।

¹³क्युं क ज थे इ नसबर काया का सुभाव गेल जीओ जणा मरस्यो। पण ज थे पबितर आत्माऊँ काया का सुभावनै मार द्‍यो जणा जिस्यो।

¹⁴जखा परमेसर की पबितर आत्मा गेल चालीं हीं बे परमेसर की ओलाद हीं।

¹⁵क्युं क जखी आत्मा थानै दि गई ह, बा थानै ओज्यु दास बणाबा नहिस डराबा ताँई कोनी पण आपानै बिकी ओलाद बणाबा ताँई ह जिऊँ आपा “अब्बा, परम-पिता” खेर बुलावां हां।

¹⁶पबितर आत्मा खुद आपणी आत्मा क सागै मिलर गुवाई देवै ह क आपा परमेसर की ओलाद हां।

¹⁷अर ज आपा बिकी ओलाद हां जणा परमेसर का वारिस अर मसी क सागै पाँतीवाळ बी हां, ज आपा बिकै सागै दुख म पाँतीवाळ हां जणा बिकै सागै मेमा म बी पाँतीवाळ हां।

¹⁸म सोचूँ हूँ क, इ टेम जखो दुख आपा भोगर्या हां बो आबाळी मेमा क आगै क्युंई कोनी।

¹⁹क्युं क आ सरस्टि बोळी आसऊँ बि टेमनै उडिकरी ह जद परमेसर आपकी ओलादनै परगट करसी।

²⁰आ सरस्टि आपकी इंछ्याऊँ नइ पण इनै बणाबाळा की इंछ्याऊँ बेमतबल की होगी, इ आसऊँ क

²¹आबी आपका नास होबाऊँ छुटकारो पार परमेसर की ओलादा की मेमाभरी अजादि म पाँतीवाळ होवै।

²²क्युं क आपा जाणा हां क हाल ताँई सगळी सरस्टि जच्चा किसी पिड़ाऊँ तड़पर बार घालरी ह।

²³आ सरस्टिई नइ पण आपा बी जानै पबितर आत्मा को पेलो फळ मिल्यो हो, मांय-मांय घुटता रिह्या हां। क्युं क आपा इ बातनै उडिकर्या हां क बो आपानै आपकी ओलाद की जंय्यां अपणावै अर काया को छुटकारो होज्यावै।

²⁴क्युं क आपा इ आस मई बचाया गया हां। ज आस पूरी होज्यावै जणा आस कठै री? क्युं क पूरी होईड़ी बाता की आस कोई कोनी करै।

²⁵पण ज आपा बि बात की आस करां जखी हाल ताँई पूरी कोनी होई जणा आपा बिनै थ्यावस राखर उडिकां हां।

²⁶अंय्यांई पबितर आत्मा आपणी कमजोरी म आपणी मदद करै ह, क्युं क आपा कोनी जाणा क आपा कूणसी रीतऊँ अरदास करां हां। पण पबितर आत्मा खुद कुराणर जिको बखान कोनी कर सकां आपणा ताँई अरदास करै ह।

²⁷पण बो हियानै जाणबाळो जाणै ह क पबितर आत्मा की मनस्या काँई ह? क्युं क परमेसर की इंछ्याऊँई पबितर आत्मा परमेसर का मिनखा ताँई बिचोली करै ह।

²⁸अर आपा जाणा हां क जखा परमेसरऊँ परेम करै ह बा ताँई हर बात मिलर भलाई पैदा करै, बा ताँई, जखा बिका मकसद गेल बुलाया गया हीं।

²⁹जिनै बो पेल्या टाळ्यो बानै बो बिका बेटा स्यारका बणाबा ताँई ते कर्यो। जिऊँ बोळा भायां म बो पेलीपोत को बणै।

³⁰जानै बो टाळ्यो बानै बो बुलायो अर जानै बो बुलायो बानै धरमी बी बणायो अर जानै बो धरमी बणायो बानै मेमा बी दिनी।

³¹जणा आ बातानै देखर आपा काँई बोलां, ज परमेसर आपणै कानि ह जणा आपणै सामै कूण हो सकै ह?

³²जखो आपका बेटानै बी आपणा सगळा ताँई मरबानै दे दिओ। जणा पाछै बो बिकै सागै आपानै सक्यु क्युं कोनी देसी?

³³परमेसर का टाळेड़ा मिनखा प कूण दोस लगा सकै ह? बो परमेसरई ह जखो बानै निरदोस बणावै ह।

³⁴कूण ह जखो आपणा प दोस लगासी? क्युं क मसी ईसु आपणा ताँई मर्यो अर आई नइ, बो मरेड़ा मऊँ ओज्यु जियो जखो इब परमेसर क दाया हात कानि बेठ्यो ह अर आपणा ताँई बिचोली करै ह।

³⁵कूण ह जखो आपानै मसी का परेमऊँ न्यारो करसी? दुख नहिस मुसीबत नहिस दिन घालबो नहिस काळ नहिस कंगाली नहिस जोखम नहिस कटारी?

³⁶जंय्यां क पबितर सास्तर म मंडेड़ो ह: “क्युं क तेरी बजेऊँ म्हानै हर टेम मोत को मुंडो देखणो पड़ै; म्हें कटबाळी लल्डी समज्या जावां हां।”

³⁷आ सगळी बाता म बी म्हें म्हानै परेम करबाळा की बजेऊँ जीतबाळाऊँ बी बढर हा।

³⁸क्युं क म पक्काई जाणू हूँ क नइ तो मोत अर नइ जीवन, नइ ईस्बर नगरी दुत अर नइ उपरी सक्‍तिया प राज करबाळा, नइ इ टेम की कोई चिज अर नइ आबाळा टेम की कोई चिज, नइ कोई सक्‍तिया

³⁹अर नइ उचाई अर नइ गेराई अर नइ सरस्टि की कोई चिज आपानै परमेसर का बि परेमऊँ न्यारो कर सकै जखो आपणा परबु मसी ईसु म ह।