Read Shekhawati 1 कुरन्थीयो 10 Bible Online

1 कुरन्थीयो 10 - Shekhawati bible

1 कुरन्थीयो 10

¹मेरा लाडला बिस्वास्यो, म ओ चाऊँ हूँ क थे ओ जाणल्यो की आपणा बडका जखा मूसा की मान्या करता हा बे परबु का बादळ की छाया म लाल समदर क पार राजी-खुसी गया हा।

²बा सगळानै बादळ क तळै अर समदर क मांयनै मूसा की मानबाळा क रूप म बतिस्मो दिओ गयो हो।

³अर सगळा जणा एकई जंय्यां को आत्मिक खाणो खाया,

⁴अर सगळा एकई जंय्यांको आत्मिक पाणी पीआ, अर बे बि आत्मिक ढाडऊँ पीता हा जखी बाकै सागै चालती ही; अर बा ढाड मसी ह।

⁵पण बामैऊँ घणकराऊँ परमेसर राजी कोनी होयो अर बे मिनख उजाड़ मई मर'र ढेर होगा।

⁶अर अ बाता आपणा ताँई सीख ह क आपा बुरी बाता की इंछ्या नइ करां, जंय्यांकी बे कर्या हा,

⁷अर नइ मूरती धोकबाळा बणो जंय्यांकी बामैऊँ बण्गा हा, अर जंय्यां पबितर सास्तर म मांडेड़ो ह क, “बे मिनख खाबा-पीबा अर मूरती क सामै नाचा-कूदि अर एक दुसरा क सागै मोज-मस्ति करबा लाग्या।”

⁸अर नइ आपा कुकरम करां, जंय्यांकी बामैऊँ कई मिनख कर्या हा, अर एकई दिन म तेईस झार मिनख मरगा।

⁹अर नइ आपा मसीनै[4] बिचासां, जंय्यांकी बामैऊँ कई कर्या अर बे साप क डसबाऊँ मरगा।

¹⁰अर नइ सिकायत करो, जंय्यांकी बामैऊँ बोळाजणा कर्या करता हा अर बे नास करबाळा क हाता मार्या गया।

¹¹अर अ बाता बामै इ हिसाबऊँ होई जिऊँ बे दुसरा मिनखा ताँई सीख होई, अर आपानै चिताबा ताँई पबितर सास्तर म मांडी गई। क्युं क आपा अंय्यां का जुग म जिर्या हां जिमै अंत सांकड़ोई ह।

¹²इ ताँई जखो अंय्यां सोचै क, “म बिस्वास म मजबूत हूँ,” बो ध्यानऊँ रेह्‍वै क कदै अंय्यां नइ होज्या क बो बिस्वासऊँ गुड़ जावै।

¹³अर थे कदै बी अंय्यां कोनी बिचास्या गया। जखो मिनखा क सेह्बाऊँ बारनै हो। अर परमेसर तो बिस्वास जोगो ह बो थानै थारी सक्‍तिऊँ बेत्ती बिचासबा कोनी दे, पण जद थे बिचास्या जाओ हो जणा बो बिचासबा क सागै-सागै थानै बचाव ताँई उपाय बी बतावै ह।

¹⁴ओ लाडलो मूरती पूजा मना करज्यो।

¹⁵अर आ बात म थानै स्याणा जा'णर खेऊँ हूँ। अर जखो म थानै खेर्यो हूँ इनै थेई परख ल्यो।

¹⁶जि प्याला मऊँ आपा परबुभोज क रूप म धनेवाद देर पिवां हां, बो दरसावै ह क आपा मसी का लोय मऊँ पिवां हां। अर बा रोटी जखी आपा परबुभोज म तोड़र खावां हां बा दरसावै ह क आपा मसी की काया मऊँ खावां हां।

¹⁷क्युं क जंय्यां रोटी एक ह बंय्यांई आपा बी बोळा होर एक की काया हां, क्युं क आपा सगळा बि एक रोटी मऊँ खावां हां।

¹⁸थे बा इजरायल का मिनखा क बारां म सोचो जखा बेदी प चढाईड़ी चिजानै खावीं हीं, के बे बेदी का पाँतीवाळ कोनी?

¹⁹अर मेरो इ बातनै खेबा को काँई मतबल ह की मूरती प चढाईड़ो क्युं ह अर मूरती क्युं ह?

²⁰नइ, पण मेरो खेबा को ओ मतबल ह क परमेसरनै नइ ध्यारबाळा परमेसर की झघा ओपरी बलायानै बलि चढावै ह। अर म कोनी चाऊँ क थे ओपरी बलाया का साती बणो।

²¹जणा थे परबु अर ओपरी बलाय मऊँ एक कोई खा अर पी सको हो।

²²के आपा परबुनै चिड़ाबो चावां हां? के आपा परबुऊँ बेत्ती सक्‍तिसाली होगा?

²³आपा सक्यु करबा ताँई अजाद हां। पण सक्यु भलाई ताँई कोनी ह। आपा सक्यु करबा ताँई अजाद तो हां पण सगळी बाताऊँ बिस्वास मजबूत कोनी होवै ह।

²⁴थारै मऊँ सगळा जणा खुदको मतबलई नइ देखै पण दुसरा को ध्यान बी करै।

²⁵अर गोस बजार म जोक्यु बिकै बिनै अन्तर-आत्मा क खया गेल खायो अर बिका बारां म कोई सुवाल मना उठायो।

²⁶क्युं क सास्तर म मांडेड़ो ह, “आ धरती अर इ धरती प जोक्यु बी ह बो सक्यु परबु को ह।”

²⁷ज कोई बिस्वास नइ करबाळा मिनख थानै रोटी खाबा ताँई बुलावै जणा थारै सामै जखो बी परूस्यो जावै जणा थारी अन्तर-आत्मा की बजेऊँ बिनै कोई सुवाल बुज्या बिना बिनै खाल्यो।

²⁸पण ज कोई थानै बतावै क, “ओ देवता क चढाईड़ो चढावो ह,” जणा थानै बताबाळा अर अन्तर-आत्मा ताँई मना खाज्यो।

²⁹अर मेरै खेबा को मतबल थारी अन्तर-आत्माऊँ कोनी ह पण बी दुसरा मिनखऊँ ह। क्युं क मेरी अजादि दुसरा मिनख की अन्तर-आत्माऊँ क्युं परखी जावै?

³⁰अर ज म परबुनै धनेवाद देर रोटी म पाँती पताऊँ हूँ जणा बि ताँई मेरी बुराई नइ करबो चाए।

³¹इ ताँई थे चाए खायो, चाए पीयो, सक्यु परमेसर की मेमा ताँई करो।

³²थे इ हिसाबऊँ जीओ जिऊँ थे नइ यहूदि मिनखा ताँई, नइ यूनानी मिनखा ताँई अर नइ परमेसर की बिस्वासी मंडळी का मिनखा ताँई आखळी बणो।

³³मेरी जंय्यां बिना आ सोच्या की मनै काँई फाईदो होसी म दुसरा को फाईदो देखूँ हूँ अर सगळानै राजी राखूँ हूँ बंय्यांई करो, जिऊँ बे बचा लिआ जावै।