Read Shekhawati 1 कुरन्थीयो 13 Bible Online

1 कुरन्थीयो 13 - Shekhawati bible

1 कुरन्थीयो 13

¹ज म मिनखा अर ईस्बर नगरी दुता की बोली बोलुँ पण मिनखाऊँ परेम कोनी करूं, जणा म ठन-ठन करती पितळ की परात अर टन-टन करता थाळी गिलास हूँ।

²अर ज म परमेसर की बाता बताऊँ अर म सगळा भेद खोल सकूँ अर सगळो ज्ञान बी जाणल्युं, अर मनै अठै ताँई बिस्वास बी होवै क म डूँगरानै हटा सकूँ हूँ, पण परेम कोनी करूं, जणा म क्युंई कोनी।

³अर ज म मेरी सगळी धन सम्पति गरीबा म बाट द्‍युँ, अर ज म चोखा समचार ताँई मेरी कायानै जळाबानै बी दे द्‍युँ। इकै बावजुदबी ज म परेम नइ करूं, जणा मनै काँई फाईदो।

⁴क्युं क जिमै परेम होवै ह बो थ्यावस राखै ह, अर दया करै ह; अर ओ बळोकड़ो पुणो कोनी राखै; अर खुदकी बडाई कोनी मारै, अर गुमानऊँ फुलै कोनी,

⁵अर बो बुरी चाल कोनी चालै, अर खुदकी भलाई बी कोनी चावै, तावळोसो झाळ्या कोनी भरै, अर नइ बुराई को बदलो बुराईऊँ देवै।

⁶नइ बुराईऊँ राजी होवै ह पण सचाईऊँ राजी रेह्‍वै ह।

⁷परेम सगळी बातानै सेह लेवै ह, सगळी बाता प बिस्वास राखै ह, सगळी बाता की आस राखै ह, अर सगळी बाता ताँई थ्यावस राखै ह।

⁸परेम कदैई टळै कोनी; पण एक टेम आसी जद परमेसर की खेबाळा का बोलां की जुर्त कोनी रेह्सी; न्यारी-न्यारी बोली म बोलबा का बरदान की बी जुर्त कोनी रेह्सी; अर ज्ञान बी जातो रेह्सी।

⁹क्युं क आपणो ज्ञान अधुरो ह, अर परमेसर की खेबाळा का बोल बी अधुरा हीं;

¹⁰पण जद सगळी बाता पूरी करबाळो आसी जणा ओ अधुरो मिट ज्यासी।

¹¹क्युं क जद म टाबर हो जणा म टाबरा की जंय्यां बोलतो हो, अर टाबरा को सो मन हो, अर टाबरा की सी समज ही; पण जद म स्याणो होगो जणा म टाबरा की सी बाता छोड दि।

¹²हाल तो आपा परमेसर क बारां म सगळी बाता आदी-अधुरी समजा हां जंय्यां धुँधळा सिसा म चिजा दिखै। पण बो टेम आसी जद आपा परमेसरनै आमै-सामै देखस्यां। हाल म जोक्यु जाणू हूँ बो अधुरो ह पण बि टेम म सक्यु सूल जाणस्युं जंय्यां परमेसर मनै जाणै ह।

¹³पण इब बिस्वास, आस, अर परेम अ तीन्युई टळै कोनी पण आ सगळा म बडो परेम ह।