Read Shekhawati 1 कुरन्थीयो 15 Bible Online

1 कुरन्थीयो 15 - Shekhawati bible

1 कुरन्थीयो 15

¹मेरा लाडला बिस्वास्यो, इब म थानै बि चोखा समचार की याद दिआऊँ जखो म थानै सुणायो हो। थे बिनै मान्या अर आज ताँई बिनै मानर्या बी हो।

²ज मेरै जरिए सुणाईड़ा समचार प थे मजबूतीऊँ चालो जणा परमेसर थानै बचासी। ज थे अंय्यां कोनी करस्यो जणा मसी म थारो बिस्वास करबो बेकार ह।

³सऊँ खास बात जिको मनै बेरो पड़्यो बा म थानै खे सुणाई क सास्तर म मांडेड़ो ह क, मसी आपणा पाप की सजा भोगबा ताँई मर्यो,

⁴अर बिनै कबर म धर दिओ गयो पण सास्तर म मांडेड़ो ह क बो तिजै दिन जी उठ्यो।

⁵इकै पाछै बो केफा क सामै परगट होयो जणा पाछै बो सगळा बारा भेजेड़ा चेला क सामै।

⁶इकै पाछै बो पानसोऊँ बेत्ती भाईड़ानै जद बे एक सागै भेळा हा दिख्यो, अर आमैऊँ घणकराक हाल ताँई जीवै ह, पण कई चलता रिह्या।

⁷इकै पाछै बो याकूबनै दिख्यो, जणा पाछै सगळा भेजेड़ा चेलानै दिख्यो,

⁸आखीर म मेरै सामै बी परगट होयो। जदकी म तो अजिब तरिकाऊँ भेजेड़ो चेलो बण्यो।

⁹म सगळा भेजेड़ा चेलाऊँ छोटो हूँ म तो भेजेड़ो चेलो खुवाबा जोगोई कोनी क्युं क म परमेसर की बिस्वासी मंडळी का मिनखानै सतायो करतो हो।

¹⁰अर आज म जोक्यु बी हूँ परमेसर की दयाऊँ हूँ, अर बिकी दया मेर ताँई बेकार कोनी गई म दुसरा भेजेड़ा चेलाऊँ बढचढ'र मेनत करी ह। पण आ मेरी काबलीयत कोनी आ तो परमेसर की दया ह।

¹¹जणा चाए म थानै चोखो समचार सुणायो हो नहिस चाए बे, म्हें एकई समचार सुणावां हां जिपै थे बिस्वास कर्या हो।

¹²जंय्यां की म्हें सगळा एकई समचार सुणावां हां क मसीनै मरेड़ा मऊँ ओज्यु जीवायो गयो हो, जणा थारै मऊँ कोई कंय्यां खे सकै ह क बिस्वास्यानै मर्या पाछै जीवायो कोनी ज्यासी?

¹³अर ज मर्या पाछै जीवायो कोनी जा सकै जणा मसी बी कोनी जीवायो गयो।

¹⁴अर ज मसीनै कोनी जीवायो गयो जणा म्हारो परचार करबो अर थारो बिस्वास करबो दोन्यु बेकार ह।

¹⁵ज आ बात सच ह क मर्या पाछै कोई कोनी जीवायो ज्यासी जणा परमेसर क बारां म थारूँ झूठ बोलबा ताँई म्हें दोसी बणगा हां क्युं क म्हें थारूँ खया हा क परमेसर मसीनै जीवायो हो।

¹⁶पण ज साच्याई मरेड़ा कोनी जीवाया जावीं जणा मसी बी कोनी जीवायो गयो।

¹⁷अर ज मसी कोनी जीवायो गयो जणा थारो बिस्वास करबो बेकार ह क्युं क परमेसर थानै थारा पाप की बजेऊँ सजा देसी।

¹⁸अर जत्ता बी मसी प बिस्वास करता होया मर्या बे तो नास होगा।

¹⁹अर ज आपा इ दुनिया की मो-मायानै पाबा ताँई मसीऊँ आस लगा राखी ह जणा आपा सगळा मिनखाऊँ अभागा मिनख हां।

²⁰पण सचाई आ ह क मसीनै मरेड़ा मऊँ जीवायो गयो आ इ बात की जामनी ह क मरेड़ानै जीवायो ज्यासी।

²¹क्युं क जंय्यां एक मिनखऊँ मोत आई बंय्यांई एक मिनख क जरिए मोतऊँ ओज्यु जी उठबो होयो।

²²आदम का करम को फळ मोत बिकी सगळी ओलादा प बी लागू होई बंय्यांई मसी का करम को फळ मोतऊँ जि उठबो बा सगळा प लागू होवै जखा मसीऊँ जुड़ेड़ा हीं।

²³पण आपणा सगळा को बी सरो आसी। सऊँ पेली परमेसर मसीनै मरेड़ाऊँ जीवायो अर जद ईसु ओज्यु आसी जणा परमेसर बा सगळानै जीवासी जखा मसीऊँ जुड़ेड़ा हीं।

²⁴इकै पाछै इ दुनिया को अंत आसी, मसी राज करबाळा, उपरी सक्‍तिया प राज करबाळा अर सक्‍तियानै नास करसी। जणा पाछै मसी आपको राज परम-पिता परमेसर क हाता म सूप देसी।

²⁵पण जद ताँई परमेसर मसी का सगळा बेरीयानै बिकै पगा तळै नइ कर दे मसी को राज करबो ते ह।

²⁶आखीर म आखरी बेरी मोत को नास कर्यो ज्यासी।

²⁷क्युं क सास्तर म मंडर्यो ह, “परमेसर सक्यु बिकै अधिकार तळै कर दिओ ह।” पण आ बात साप ह क, सक्यु म परमेसर सामिल कोनी ह क्युं क बो परमेसरई ह जखो सक्यु मसी क अधिकार क तळै कर्यो ह।

²⁸सक्यु परमेसर का बेटा क अधिकार तळै कर्या जाबा क पाछै, बो खुदनै पूरी-तर्या परमेसर क अधिकार क तळै कर देसी, परमेसर जखो बिनै ओ अधिकार दिओ ह। जणा पाछै परमेसर सगळी चिजा प पूरी-तर्या राज करसी।

²⁹ज आ बात सच ह क मरेड़ा मऊँ जि उठबो कोनी ह जणा बाको काँई होसी जखानै मरेड़ा ताँई बतिस्मो दिओ जावै ह? ज मरेड़ा मऊँ जि उठबो कोनी जणा बा कूणसी आस ह जि ताँई अंय्यां कर्यो जावै ह।

³⁰अर ज अंय्यां ह जणा म्हें तो बावळाई हां जखा हर घड़ी चोखा समचारनै सुणाबा ताँई खतरो उठावां हां।

³¹मेरा बिस्वासी भाईड़ो, मसी ईसु क सागै थारा रिस्ता की बजेऊँ म थार प गुमान करूं हूँ आ बात जत्ती सच ह बत्तिई आ बी सच ह क म रोजकी मेरी ज्यान को खतरो उठाऊँ हूँ।

³²ज परमेसर बिस्वास्यानै मर्या पाछै ओज्यु कोनी जीवावै जणा बाकै सागै लड़बा को काँई फाईदो जखा इफिसुस नगरी म मेरै सागै जंगली जिनावरा की जंय्यां लड़्या। ज सई मई मरेड़ा मऊँ जिबो कोनी ह, “जणा आओ आपा खाई पी करां क्युं क काल तो आपानै मरनोई ह।”

³³धोको मना खाज्यो क्युं क, “बुरी संगती चोखी बाणनै बिगाड़ देवै ह।”

³⁴चेता म आओ, अर पाप को गेलो छोड द्‍यो। म थानै थारी सरमिंदगी दिखाऊँ हूँ क्युं क थारै म क्युंक मिनख परमेसरनै कोनी जाणै।

³⁵पण कोई बुज सकै ह, “मरेड़ा कंय्यां जीवाया जा सकै ह? अर बानै कंय्यां की काया मिलसी?”

³⁶अरै बावळो! थे जखो बीज धरती म बोवो हो बो जद ताँई सिड़ नइ जावै ओज्यु कोनी उगै।

³⁷अर जिनै थे बोयो हो बा काया कोनी पण ग्युं को नहिस ओर ख्याको एक बीजई तो ह बिऊँ उगबाळो बोजो बोळो न्यारो ह।

³⁸परमेसर आपकी इंछ्या गेल बीजऊँ बोजा निकाळै ह। अर हरेक बीज को एक खास बोजो ह।

³⁹जत्ता बी जीव ह बाकी सगळा की काया एक जिसी कोनी। मिनखा की एक तर्या की काया ह, जिनावरा क दुसरी तर्या की, पंछ्या क न्यारी तो मछ्या की न्यारीई होवै ह।

⁴⁰क्युं क कई काया ईस्बर नगरी की होवै ह कई धरती की, पण ईस्बर नगरी की काया को तेज न्यारोई होवै ह अर धरती को न्यारो।

⁴¹जंय्यां क सूरज, चाँद अर तारा की चमक म फरक होवै ह। अर अठै ताँई क एक ताराऊँ दुसरा तारा की चमक म बी फरक ह।

⁴²इ ताँई जद मरेड़ा ओज्यु जीवाया ज्यासी जणा अंय्यांई होसी। अर जखी कायानै इ धरती प गाड्यो जावै बा नसबर ह पण जखी नई काया आपानै मिलसी बा अमर ह।

⁴³अर जखी कायानै धरती म गाड्यो जावै ह, बा कमजोर अर बेजत ह। पण जद आ काया ओज्यु जीवाई जासी बा परमेसर की मेमा अर सक्‍तिऊँ भरेड़ी होसी।

⁴⁴अर जखी कायानै धरती म गाड्यो गयो ह बा माटी की काया ह पण जद इ कायानै ओज्यु जीवायो ज्यासी आ आत्मिक होसी। अर ज माटी की काया होवै ह जणा आत्मिक काया बी होवै ह।

⁴⁵क्युं क पबितर सास्तर म मंडर्यो ह क “पेलो मिनख आदम जिनै एक जिंदा पराणी क रूप रच्यो गयो” पण आखरी मिनख मसी जीवन देबाळी आत्मा ह।

⁴⁶पेल्या आत्मिक जीवन कोनी मिलै पण माटी की काया मिलै पाछैई आत्मिक जीवन मिलै ह।

⁴⁷पेला मिनखनै धरती की माटीऊँ सरज्यो गयो। पण दुसरो मिनख मसी ईस्बर नगरीऊँ आयो।

⁴⁸धरती का सगळा मिनख माटी की काया ले राखी ह जंय्यांकी बि पेला मिनख की ही। अर ईस्बर नगरी म सगळा कनै आत्मिक काया होसी जंय्यांकी मसी की ह जखो ईस्बर नगरीऊँ आयो हो।

⁴⁹अर जंय्यां आपा माटीऊँ सरजेड़ा मिनख आदम कोसो रूप धारण करां हां, बंय्यांई आपा ईस्बर नगरीऊँ आएड़ा मसी की जंय्यां रूप बी धारण करस्यां।

⁵⁰मेरा लाडला बिस्वास्यो, म थानै बताऊँ हूँ क आपणी आ काया जखी मास अर लोयऊँ बणेड़ी ह परमेसर का राज म कोनी जा सकै। अर ना नसबर काया अमर होसी।

⁵¹थे गोर लगार सुणो, म थानै एक भेद की बात बताऊँ हूँ: आपा सगळा मरा कोनी, पण आपणो रूप बदल्यो ज्यासी।

⁵²अर जद आखरी नरसिंगो फुक्यो ज्यासी जणा आँख मीचताई आपा बदल्या जास्यां। नरसिंगा की उवाज जद आपणा काना म पड़सी जणा सगळा मरेड़ा बिस्वासी ओज्यु नइ मरबा ताँई जीवाया जासी अर जखा जीवता बिस्वासी हीं बे कदैई नइ मरबा ताँई बदल्या जासी।

⁵³क्युं क नसबर काया को नास नइ होबाळी काया म बदलबो जरूरी ह। अर मरबाळा जीवन को कदैई नइ मरबाळा जीवन म बदलबो जरूरी ह।

⁵⁴जद अंय्यां होसी, मतबल जद नसबर कायानै नास नइ होबाळी काया म बदल्यो ज्यासी जणा पबितर सास्तर म मंडेड़ो आंक पूरो होसी, “मोतनै नास कर बिनै जीत लिओ गयो।”

⁵⁵“हे मोत तेरी जीत कठै ह? अर तेरो डंक कठै ह?”

⁵⁶आपा मरा हां क्युं क आपा पाप करां हां, अर आपणै कनै नेम-कायदो ह जिकी बजै आपा जाणा हां क पाप करां हां।

⁵⁷पण परमेसर को धनेवाद ह क बो आपानै परबु ईसु मसी क जरिए मोत प जीत दिलावै ह।

⁵⁸इ ताँई मेरा लाडला बिस्वास्यो, बिस्वास म मजबूत बण्या रेह्ओ अर जमाई संका मना करो। अर परबु का काम म खुदनै लगाया राखो। क्युं क थे जाणो हो क परबु ताँई करेड़ो काम बेकार कोनी जावै।