Read Shekhawati 1 कुरन्थीयो 16 Bible Online

1 कुरन्थीयो 16 - Shekhawati bible

1 कुरन्थीयो 16

¹मेरा भाईड़ो थे बुज्या हा क यहूदिआ म रेह्बाळा परमेसर का मिनखानै भेजबा ताँई जखा रिपीआ थे भेळा कर्या हो बाको काँई करनो ह? म थानै एकई बात ओडाऊँ हूँ बोई करो जखो म गलातिया की बिस्वासी मंडळीनै बोल्यो हो।

²अर जद बी सपता को पेलो दिन दितबार आवै, थे थारी कमाई मऊँ थोड़ो भोत न्यारो टाळता रेहज्यो जिऊँ म जदबी आऊँ थानै दान भेळो करबो नइ पड़ै।

³अर जद म थारै कनै आस्युं जणा बा मिनखानै जानै थे चास्यो, बिनै अधिकार चिठी देर थारा दाननै बाका हाता यरूसलेम भेज देस्युँ।

⁴अर ज मेरो जाबो होयो जणा बे मेरै सागैई चल्या ज्यासी।

⁵म मकीदुनिया होतो होयो थारै कनै आस्युं, क्युं क मनै पेली मकीदुनिया जाबो जरूरी ह।

⁶अर हो सकै तो म थारै कनैई रूक जास्युं अर स्याळा-स्याळा थारै कनैई रेहस्युं, बिकै पाछै जठैबी मेरो जाबो होसी बठै जाबा ताँई जुर्त की चिजा क सागै बिदा कर दिज्यो।

⁷क्युं क म आ कोनी चाऊँ क चालतोसो थारूँ मिलूँ; पण मनै आस ह अर ज परबु चायो तो म क्युंक दिन थारै कनैई रेहस्युं।

⁸पण पेन्तिकूस का त्युंहार ताँई तो म इफिसुस मई रेहस्युं,

⁹क्युं क बठै परबु को काम करबा ताँई ओ चोखो मोको ह। अर बठै मेरा बिरोद करबाळा बी बोळा हीं।

¹⁰अर ज थारै कनै तिमूतियूस आज्यावै जणा थे बिकी सूल आवभगत करज्यो क्युं क बो बी मेरी जंय्यां परबु को काम करै ह।

¹¹इ ताँई कोईबी बिनै छोटो नइ जाणै। अर जद बो थारै कनैऊँ बिदाई लेवै जणा सफर म चायती चिजा क सागै राजी-खुसी बिदा करज्यो। अर म दुसरा बिस्वासी भाईड़ा क सागै बिनै उडिकर्यो हूँ।

¹²इब म थानै अपुलोस क बारां म बताऊँ हूँ जंय्यां क थे मेरूँ बिकै बारां म बुज्या हो। म बिनै सूल समजायो हो क बो दुसरा बिस्वासी भाईड़ा क सागै थारै कनै पाछो चल्यो जावै। पण बो हाल जाबा ताँई राजी कोनी पण आगै कोई मोका प थारै कनै आज्यासी।

¹³चेता म रेहज्यो अर मजबूती क सागै बिस्वास म बण्या रेहज्यो। थे हिमत राखबाळा अर ठाडा बणो।

¹⁴अर थे जोक्युबी करो बो परेमऊँ करो।

¹⁵थे स्तिफनुस अर बिका परवार क बारां म तो जाणोई हो, क बे अखाया म मसी प सऊँ पेली बिस्वास करबाळा मिनख हीं। बे परमेसर का मिनखा की मदद करबा को बीड़ो उठा राख्यो ह। इ ताँई ओ मेरा लाडला बिस्वास्यो, म थारूँ अरदास करूं हूँ,

¹⁶थे खुदनै बानै अर बाकी जंय्यां मेनत क सागै परबु को काम करबाळा मिनखानै सूप द्‍यो।

¹⁷स्तिफनुस, फुरतुनातुस अर अखिकुस क आबाऊँ म बोळो राजी हूँ। जखो थे मेरै ताँई कर कोनी सक्या बो बे कर दिखाया क्युं क थे मेरै सागै कोनी हा।

¹⁸बे मेरी अर थारी आत्मानै राजी करी ह। इ ताँई अंय्यां का मिनख ईज्जत क जोगा हीं।

¹⁹एसिया की बिस्वासी मंडळी क कानिऊँ थानै नमस्कार। अर अकविला अर परसकीला! अर बाकै घर म भेळी होबाळी बिस्वासी मंडळी क कानिऊँ थानै नमस्कार।

²⁰अर सगळा भाईड़ा कानिऊँ बी थानै नमस्कार, थे हात जोड़र एक दुसरा को सत्कार करो।

²¹चिठी को ओ आखरी नमस्कार म पोलुस खुद मेरा हातऊँ थानै मांडूँ हूँ।

²²अर ज कोई परबुऊँ परेम कोनी करै बिपै स्राप पड़ै ह। म्हारा परबु जी तावळा आवै ह!

²³परबु ईसु की दया थार प होवै।

²⁴अर मसी ईसु म मेरो परेम थारै सागै बण्यो रेह्‍वै।