Read Shekhawati 1 कुरन्थीयो 3 Bible Online

1 कुरन्थीयो 3 - Shekhawati bible

1 कुरन्थीयो 3

¹मेरा लाडला बिस्वास्यो, म थारै सागै बंय्यां बात कोनी कर्यो जंय्यां आत्मिक मिनखा क सागै करूं हूँ। पण मनै थारै सागै अंय्यां बात करनी पड़ी जंय्यां दुनिया का मिनखा क अर मसी म नया बिस्वास्या क सागै करी जावै ह।

²म थानै पीबा ताँई दुद दिओ भार्यो खाणो नइ, क्युं क थे बिनै कोनी खा सका हा। अर नइ हाल ताँई खा सको हो।

³क्युं क थे हाल ताँई इ दुनिया का मिनखा की जंय्यां हो। थे आपसरी म बळोकड़ोपूणो अर कळै राखो हो। जणा थे इ दुनिया का मिनखा की जंय्यां कोनी के? अर इ दुनिया का मिनखा की जंय्यां बरताव कोनी कर्या के?

⁴क्युं क थारै मऊँ एक बोलै ह, “म पोलुस को चेलो हूँ” अर दुसरो बोलै ह, “म अपुलोस को हूँ” जणा थे दुनिया का मिनखा की जंय्यां कोनी जिर्या के?

⁵जणा थेई बताओ अपुलोस कूण ह अर पोलुस कूण ह? म्हें तो परमेसर का मामुलीसा सेवक हा जाकी बजेऊँ थे बिस्वास म आया। म्हारै मऊँ हरेक जणो बो काम करै ह जखो परमेसर म्हानै करबा ताँई दिओ ह।

⁶म बीज बोयो, अपुलोस सिंच्यो, अर परमेसर बिनै बोजो बणायो।

⁷जखो बोवै अर सिचै ह बो कोई मायनो कोनी राखै। सऊँ बडो परमेसर ह जखो बिनै बढावै ह।

⁸सिचबाळा अर बीज बोबाळा म कोई फरक कोनी। हरेकनै परमेसर बाकी मेनत गेल मजुरी देसी।

⁹परमेसर की सेवा म म्हें साती-संगी हां, अर थे परमेसर का खेत अर बिका भवन हो।

¹⁰परमेसर की दयाऊँ म एक चोखा चेजारा की जंय्यां निम धरी ह। अर बिपै ईमारत दुसरो बणार्यो ह। पण सगळानै ओ ध्यान राखबो चाए की बो बिपै कंय्यांको काम करर्यो ह।

¹¹क्युं क परमेसर ईसु मसीनै एकलोती निम की जंय्यां पेलीई धर दिओ ह, अर बिकी झघा कोई दुसरी निम कोनी धरी जा सकै।

¹²ज कोई बि निम प सोना, चाँदी, हिरा-मोती, लकड़ी, घास अर फुसनै काम लेर ईमारत बणावै,

¹³जणा हरेक का काम सामै आसी, क्युं क न्यायहाळो दिन आगऊँ आनै चोड़ा म ल्यासी। अर बे कंय्यांको काम कर्या ही इकी परख आगऊँ होसी।

¹⁴जिको काम बि आग म टिक्यो रेह्सीक बिनै फळ मिलसी।

¹⁵अर ज कोईसाको काम बळ ज्यासी जणा बो हानी उठासी। पण बो खुद बच ज्यासी जंय्यां की आगऊँ बचर निकळगो हो।

¹⁶थे जाणो कोनी के थे परमेसर का मनदर हो अर परमेसर की पबितर आत्मा थारै म रेह्‍वै ह?

¹⁷अर ज कोई परमेसर का मनदरनै बरबाद करसी बिनै परमेसर नास करसी। क्युं क परमेसर को मनदर पबितर ह, अर बो थे हो।

¹⁸थे खुदनै धोको मना द्‍यो। अर ज कोई मिनख ओ सोचतो हो की बो इ दुनियादारी म ज्ञानी ह जणा इऊँ चोखो ओ ह क बो बेबुदी को बण्यो रेह्‍वै जिऊँ बो ज्ञानी बण सकै।

¹⁹क्युं क परमेसर की नजर्या म इ दुनिया को ज्ञान बावळोपुणोई ह। अर पबितर सास्तर म मंडेड़ो ह क, “परमेसर ज्ञान्यानै बाकीई चतराई म फसावै ह।”

²⁰अर “परमेसर ज्ञान्या का बिचारानै बी जाणै ह क बे ख्याई काम का कोनी।”

²¹इ ताँई कोई बी मिनख काँई कर सकै ह इपै गुमान नइ करै क्युं क सक्यु थारोई ह।

²²जणा चाए बो पोलुस हो, चाए अपुलोस हो, चाए केफा हो, चाए सरस्टि हो, जीवन हो नहिस मोत हो, चाए आज की बाता हो नहिस आबाळा काल की बाता हो अ सगळी चिजा थारी ह।

²³थे मसी का हो अर मसी परमेसर को ह।