Read Shekhawati 1 कुरन्थीयो 6 Bible Online

1 कुरन्थीयो 6 - Shekhawati bible

1 कुरन्थीयो 6

¹ज थारै मऊँ कोईसाको दुसरा बिस्वासी भाई क सागै मनमुटाव ह। जणा थे बिका सुळजेटा ताँई परमेसर का मिनखा क कनै जाबा की बजाय कचेरी जाबा की हिमत करो हो?

²के थे ओ कोनी जाणो क परमेसर का मिनख जगत का मिनखा को न्याय करसी? परमेसर का मिनख जद सगळा जगत का मिनखा को न्याय करसी जणा आ छोटी-छोटी बाता को सुळजेटो कोनी कर सको के?

³अर थे ओ कोनी जाणो के आपा दुता को न्याय करस्यां? जणा इ जीवन की आ छोटी-छोटी बाता को काँई खेबो?

⁴ज थारै मांय अंय्यां की बाता होवै जणा थानै अंय्यां का मिनखा क कनै नइ जाणो चाए जाको बिस्वासी मंडळीऊँ कोई लेणदेण कोनी।

⁵थानै सरम आणी चाए! के साच्याई थारै मालो कोई ज्ञानी मिनख कोनी? जखो थारी तू-तू मे-मे को सुळजेटो कर सकै।

⁶पण थे जखा बिस्वासी भाई होर एक दुसरा क खिलाप मुकदमो करो हो अर थारी बाता को न्याय बिस्वास नइ करबाळा मिनखा कनै करवार्या हो।

⁷सचाई तो आ ह क थे आपसरी म एक दुसरा प मुकदमाबाजी करर्या हो जखी थारी हारनै दरसावै ह। इऊँ चोखो तो ओ होवै क थे अन्याय सेल्यो अर थे थारी हानी उठाल्यो।

⁸पण थे तो खुद अन्याय करो हो अर एक दुसरानै लूटो हो अर दुसरा मसी भाईड़ानै बी!

⁹के थे पक्काई कोनी जाणो क बुराई करबाळा मिनख परमेसर का राज का वारिस कोनी होसी? बावळा मना बणो! गंदा काम करबाळा, मूरतीपुजा करबाळा, कुकरमी, लुच्चा काम करबाळा अर लुच्चा-लफंगा[2],

¹⁰चोर लूटेरा, लालची, दारूखोर्या, भिड़ाबाळा, अर ठग परमेसर का राज का वारिस कोनी होसी।

¹¹अर थारै म बी पेल्या क्युंक मिनख अंय्यां का हा, पण इब थानै परबु ईसु मसी अर परमेसर की पबितर आत्मा क जरिए पापऊँ धोर पबितर कर परमेसर क सागै सई होबा ताँई परमेसरनै सूप दिओ गयो ह।

¹²कोई खे सकै ह, “मनै सक्यु करबा की छुट ह।” हाँ पण सक्यु थारै ताँई चोखो कोनी। म खे सकूँ हूँ क, “मनै सक्यु करबा की छुट ह” पण म कोई चिज क बस म कोनी।

¹³खेबत म आवै ह क, “रोटी पेट ताँई अर पेट रोटी ताँई होवै ह” पण परमेसर आ दोन्यानैई नास कर देसी। अर आपणी काया कुकरम करबा ताँई कोनी पण परबु की सेवा करबा ताँई ह। अर काया ताँई परबु बंदोबस्त करै ह।

¹⁴परमेसर परबु ईसुनैई जिंदो कोनी कर्यो पण बो आपकी सक्‍तिऊँ आपानै बी ओज्यु जिंदो करसी।

¹⁵के थे जाणो हो थारी काया परबु ईसुऊँ जुड़ेड़ी ह? जणा पाछै म आ अंगानै जखा मसी का हीं, आनै रांड का अंग कोनी बणबा द्‍युँ।

¹⁶थे कोनी जाणो के जखो मिनख रांड क सागै रेह्‍वै ह बो बिकै सागै एक तन होज्यावै ह? क्युं क पबितर सास्तर म मंडेड़ो ह क, “बे दोन्यु एक काया हो होज्यासी।”

¹⁷पण जखो परबु म मगन रेह्‍वै ह बो परबु की आत्मा क सागै एक होज्यावै ह।

¹⁸कुकरम मना करो। क्युं क इकै अलावा जत्ता बी पाप मिनख करै ह बो आपकी काया क बारनैऊँ करै। पण जखो मिनख कुकरम करै ह बो आपकी काया क सागै ही पाप करै ह।

¹⁹अर थे ओ कोनी जणो के थारी काया पबितर आत्मा को मनदर ह आ आत्मा थारै मांयनै रेह्‍वै ह जिनै परमेसर थानै दिओ ह। थे खुदका कोनी हो, पण परमेसर का हो।

²⁰क्युं क परमेसर थारी किमत चुकार थानै मोल लिआ ह। इ ताँई थे थारी कायाऊँ परमेसर की मेमा कर्या करो।