Read Shekhawati 1 कुरन्थीयो 7 Bible Online

1 कुरन्थीयो 7 - Shekhawati bible

1 कुरन्थीयो 7

¹थे मनै मांडी ही क, के ओ चोखो ह क मिनख ब्या नइ करै?

²इ बात क बाबत म खेबो चाऊँ हूँ, कुकरमऊँ बचबा ताँई सगळा मोट्यारा की खुद-खुदकी लूगाई होणी चाए, अर सगळी लूगाया क मोट्यार होणा चाए।

³मोट्यारनै आपकी लूगाई की इंछ्या स्यांत करनी चाए; अर बंय्यांई लूगाईनै मोट्यार की इंछ्या स्यांत करनी चाए।

⁴लूगाईनैई आपकी काया प हक कोनी पण बिका मोट्यार को बी बिकी काया प हक ह; अर बंय्यांई मोट्यारनैई कोनी पण बिकी लूगाई को बी बिकी काया प हक ह।

⁵थे मोट्यार लूगाई एक दुसरा की इंछ्या मना मारज्यो। पण आपसरी म बतळार क्युंक देर ताँई इनै टाळ सको हो जिऊँ थारै अरदास करबा म दिकत नइ होवै, अर इकै पाछै थे ओज्यु एक सागै रह्यो; क्युं क कदै अंय्यां नइ हो क खुदनै बस म राखबा की कमी को फाईदो उठार सेतान थानै बिचासै।

⁶अर म आ बात मेरै कानिऊँ खेऊँ हूँ पण ओ हुकम कोनी ह।

⁷अर म अंय्यां चाऊँ हूँ क सगळा मिनख मेरी जंय्यांई बिना ब्या क रेह्ता। पण एक कनै एक बरदान ह जणा दुसरा कनै दुसरो। अंय्यां सगळा मिनखानै परमेसर कानिऊँ न्यारो-न्यारो बरदान मिलेड़ो ह।

⁸अर इब म बानै जाको ब्या कोनी होयो अर जाको मोट्यार लूगाई मरेड़ो ह बानै खेऊँ हूँ क बा ताँई कतो बडिया ह क बे मेरी जंय्यां ब्या नइ करै।

⁹पण ज थे खुदनै बस म नइ राख सको जणा इऊँ चोखो तो ओ ह क थे ब्या करल्यो; क्युं क इ भूख म जळबाऊँ ब्या करबो घणो चोखो ह।

¹⁰अर इब म बानै आदेस देऊँ हूँ जखा ब्याईड़ा हीं, अर ओ मेरो आदेस कोनी पण परबु को हुकम ह क लूगाई आपका मोट्यारनै नइ छोडै

¹¹अर ज बा आपका मोट्यारनै छोड बी देवै जणा बिनै दुसरो ब्या नइ करबो चाए अर हो सकै तो बिनै ओज्यु आपका मोट्यार क सागै मेळमिलाप करलेणो चाए। अर अंय्यांई मोट्यारनै बी आपकी लूगाईनै नइ छोडणो चाए।

¹²अर इब आकै अलावा जखा मिनख रेह्गा बानै परबु कोनी पण म खेऊँ हूँ, ज कोई बिस्वासी भाईड़ा क लूगाई होवै अर बा बिस्वास कोनी करै पण बिकै सागै रेह्बा ताँई राजी ह जणा बो मिनख आपकी लूगाईनै नइ छोडै।

¹³अर अंय्यांई ज कोई लूगाई को मोट्यार बी बिस्वास कोनी करै पण बो बिकै सागै रेह्बा म राजी रेह्‍वै जणा बा लूगाई बी आपका मोट्यारनै नइ छोडै।

¹⁴क्युं क बो बिस्वास कोनी करबाळो मोट्यार आपकी बिस्वासी लूगाई क सागै रेह्बाऊँ परमेसर की नजर्या म भाबाळो होज्यावै ह अर अंय्यांई अबिस्वासी लूगाई आपका बिस्वासी मोट्यार क सागै रेह्बाऊँ परमेसर की नजर्या म भाबाळी होज्यावै ह। अर ज थे अंय्यां कोनी करो जणा थारा बेटा-बेटी बी असुद होसी पण अंय्यां करबाऊँ बे परमेसर की नजर्या म पबितर होसी।

¹⁵अर इकै पाछै बी कोई बिस्वास नइ करबाळा मोट्यार लूगाई न्यारो होबो चावै जणा बो न्यारो हो सकै ह। क्युं क अंय्यां की बाता प मसी मोट्यार लूगाई अजाद हीं। क्युं क परमेसर आपानै सुक-स्यांतीऊँ रेह्बा ताँई बुलायो ह।

¹⁶ओ लूगायो थे जाणो हो के? थारै अंय्यां करबाऊँ काँई बेरो थे थारा अबिस्वासी मोट्यारानै बचाल्यो? ओ मोट्यारो थे जाणो हो के? थारै अंय्यां करबाऊँ काँई बेरो थे थारी अबिस्वासी लूगायानै बचाल्यो?

¹⁷परबु जिनै जंय्यां को बरदान दिओ ह अर जिनै जि रूप म टाळ्यो ह, बिनै चाए की बो बंय्यांई जीवै। अर म सगळी बिस्वासी मंडळ्यानै अंय्यांई सीखाऊँ हूँ।

¹⁸ज सुन्नत करवायड़ा मिनखनै परबु बुलावै जणा बिनै सुन्नत की सेलाणीनै नइ लुखाणो चाए। अर अंय्यांई बिना सुन्नतहाळा मिनखनै जद परबु बुलावै जणा बिनै सुन्नत कराबा की कोई जुर्त कोनी।

¹⁹क्युं क परमेसर का हुकमानै मानबा क अलावा नइ तो सुन्नत अर नइ सुन्नत नइ कराबो कोई माईनो राखै ह।

²⁰सगळा मिनखानै बंय्यां रेह्बो चाए जंय्यां बिनै बुलायो गयो ह।

²¹तनै जद बुलायो गयो हो बी टेम का के तू दास हो? तू इकी चिंत्या मना करै। पण ज तू अजाद होबो चावै ह तो मोका को फाईदो उठा।

²²क्युं क जि दासनै परबु बुलायो ह बो परबु को अजाद मिनख ह। अर अंय्यांई अजाद मिनखनै परबु बुलायो ह बो परबु ईसु मसी को दास ह।

²³परबु थारो मोल देर थानै मोल लिआ ह। इ ताँई मिनखा का गुलाम मना बणो।

²⁴ओ मेरा लाडला बिस्वास्यो, परमेसर की सोबत म रेह्‍वो पण थानै थारी बी दसाऊँ भागबा की जुर्त कोनी जिमै रेह्तासोता थानै बुलायो गयो हो।

²⁵कुंआरी ताँई परबु क कानिऊँ मनै कोई हुकम कोनी मिल्या। इ ताँई म परबु की दयाऊँ अर बिस्वास जोगो होबा की बजेऊँ सला देऊँ हूँ।

²⁶अर म सोचूँ हूँ क इ दुख की घड़ीनै देखता तो थारो बिना ब्या क रेह्बो चोखो ह।

²⁷अर ज तेरै लूगाई ह तो बिऊँ न्यारो होबा की कोसिस मना करै, अर ज तेरै लूगाई कोनी तो बिनै ब्याबा की कोसिस मना करै।

²⁸अर ज तू ब्या बी करै ह तो ओ पाप कोनी; अर ज कोई कुंआरी छोरी ब्याई जावै ह तो बा कोई पाप कोनी करै। पण ब्याईड़ा मिनखानै बोळी परेसानी होवै ह अर म आ परेसान्याऊँ थानै बचाबो चाऊँ हूँ।

²⁹ओ मेरा लाडला बिस्वास्यो, म तो आई खेऊँ हूँ, क टेम बोळो कम ह। इ ताँई इबऊँ जिकै लूगाई ह बो अंय्यां रेह्‍वै जंय्यां बिकै लूगाई आथई कोनी।

³⁰अर जखा बिलखै ह बे अंय्यां रेह्‍वै जंय्यां बे कदै दुखीई कोनी होया। अर जखा राजी हीं बे अंय्यां रेह्‍वै क बे कदै राजीई कोनी रिह्या। अर जखा चिज मोल लेवीं हीं बे अंय्यां रेह्‍वै क बाकन क्युंई कोनी।

³¹अर जखा इ दुनिया की चिजा का मजा लेर्या हीं, बे अंय्यां रेह्‍वै क बे चिजा बाकै काम की कोनी। क्युं क इ दुनिया का रिती-रिवाज जाता रेह्सी।

³²अर म चाऊँ हूँ क थे चिंत्या मना करज्यो। क्युं क एक कुंआरो मिनख परबु क बारां म सोचतो रेह्‍वै ह क परबुनै कंय्यांसिक राजी करूं।

³³अर एक ब्याईड़ो मिनख दुनिया म ही मगन रेह्‍वै अर आ सोचतो रेह्‍वै ह क खुदकी लूगाईनै कंय्यांसिक राजी राखूँ।

³⁴अर अंय्यां करबाऊँ बिको जीवन दो हिस्सा म बट जावै ह। अर अंय्यांई कुंआरी छोरी क सागै ह। एक कुंआरी छोरी परबु की चिंत्या म रेह्‍वै ह जिऊँ बा आत्मा म अर काया म पबितर हो सकै। पण एक ब्याईड़ी लूगाई इ दुनिया की बाता म मगन रेह्‍वै ह अर आ चावै ह क म मेरा मोट्यारनै कंय्यांसिक राजी राखूँ।

³⁵अर म अ बाता थार प पाबंदि लगाबा ताँई कोनी बोलुँ हूँ पण थारी भलाई ताँई बोलुँ हूँ। जिऊँ थे इ दुनिया की चिंत्यानै छोडर परबु क हाता म रेह सको।

³⁶अर ज कोई ओ सोचै की जिऊँ मेरी सगाई होईड़ी ह बा छोरी तो जुवान होगी ह अर म इऊँ ब्या नइ कर इको हक मार्यो हूँ जणा बो जंय्यां चावै ह बो बिकै सागै करै ओ पाप कोनी, अर बिनै बिकै सागै ब्या कर लेणो चाए । [3]

³⁷पण जखो आपकै हिया म गांठ बांद राखी हो अर जिपै खुदका मन को दबाव बी कोनी, अर बो आपकी इंछ्यानै बस म राख सकै अर बो आपका हिया म आ ध्यार राखी हो क म मेरी सगाई होईड़ीऊँ ब्या कोनी करूं जणा बो चोखो करै ह।

³⁸इ ताँई जखो बी आपकी सगाई होईड़ीऊँ ब्या करै ह बो चोखो करै ह। पण जखो ब्या कोनी करै बो ओर बी चोखो करै ह।

³⁹अर जद ताँई लूगाई को मोट्यार जीवै ह, बा ब्या का बंदण म बंदी रेह्‍वै ह। पण ज बिका मोट्यार की मोत होज्यावै जणा बा चावै बिकै सागै ब्या करबा ताँई अजाद ह पण परबु म।

⁴⁰अर ज बा जंय्यां ह बंय्यांई रेह्‍वै जणा राजी रेह्सी। ओ मेरो बिचार ह अर म आ सोच्यो हूँ क मेरै मांयनै बी परमेसर की पबितर आत्मा को बास ह।