Read Shekhawati 1 कुरन्थीयो 8 Bible Online

1 कुरन्थीयो 8 - Shekhawati bible

1 कुरन्थीयो 8

¹आपा मूरत्या क आगै चढाईड़ा परसाद क बारां म जाणा हां, “क्युं क आपा सगळा ज्ञानी हा।” अर ज्ञान मिनखानै गुमान म फुलावै ह। पण परेम करबाऊँ सको भलो होवै ह।

²अर ज कोई खेवै क बो क्युं जाणै अर जिकै बारां म बिनै जाणबो चाए बिकै बारां म कोनी जाणै जणा बो क्युंई कोनी जाण्यो।

³अर ज कोई परमेसरऊँ परेम करै बिकी परमेसर म पिछाण ह।

⁴आपा मूरत्या क चढाईड़ा परसाद क खाबा क बारां म बी जाणा हां, अर ओ बी जाणा हा क इ सरस्टि म परमेसर क अलावा कोई दुसरो परमेसर आथई कोनी।

⁵जदकी इ धरती प अर अकास म बोळा ईस्बर अर मालिक खुवावै ह।

⁶पण आपणो तो एकई परमेसर ह अर बो आपणो परम-पिता ह बोई सक्यानै रच्यो। अर एकई परबु ह, अर बो परबु ईसु मसी ह जिमै सगळी चिजा ह अर जिमै सक्यानै रच्यो गयो अर जिमै आपा जीवां हां।

⁷पण ओ ज्ञान सगळा मिनखानै कोनी। अर कई मिनख तो इब ताँई मूरती धोकी हीं, अर बे आ सोचर अंय्यां की चिजा खावीं क ओ तो परसाद ह। अर बाकै अंय्यां करबाऊँ बाकी अन्तर-आत्मा असुद हो जावै ह क्युं क बाको मांयलो माड़ो ह।

⁸अर बो परसाद आपानै परमेसर क कनै लेर कोनी जावै। इ ताँई ज आपा परसाद ना खावां जणा आपणो क्युंई कोनी घटै अर ज खावै जणा क्युंई बढै कोनी।

⁹इ ताँई थे चेता म रेह्ओ क थारी छुट बिस्वास म कमजोर मिनख ताँई पाप करबा की बजै नइ बणज्यावै।

¹⁰क्युं क ज कोई अंय्यां को मिनख जखो बिस्वास म कमजोर हो अर तनै, जिनै इ बारां म ज्ञान ह मनदर म परसाद खातो देखै जणा कदै बिनै मूरती क चढाईड़ो परसाद खाबा की हिमत नइ मिलज्यावै।

¹¹अर तेरै इ ज्ञानऊँ बि बिस्वास म कमजोर भाई को नास होज्यासी जि ताँई परबु ईसु मसी खुदकी जान दि ह।

¹²अर अंय्यां कर तू तेरा भाई क खिलाप पाप करै ह। अर बाको बिस्वास कम कर मसी क खिलाप बी पाप करै ह।

¹³इ ताँई ज खाबो मेरा बिस्वासी भाईनै पाप करबा ताँई उकसावै ह जणा म कदैई मास कोनी खास्युं जिऊँ म मेरा बिस्वासी भाई क सामै पाप की बजै नइ बणू।