Read Shekhawati 2 कुरन्थीयो 1 Bible Online

2 कुरन्थीयो 1 - Shekhawati bible

2 कुरन्थीयो 1

¹आ चिठी परमेसर की इंछ्याऊँ म, मसी ईसु को भेजेड़ो चेलो पोलुस अर आपणो बिस्वासी भाई तिमूतियूस[1] परमेसर की कुरन्थी नगरी की बिस्वासी मंडळी का मिनखानै अर अखाया का सगळा परमेसर का मिनखानै मांडां हां।

²आपणा परम-पिता परमेसर अर परबु ईसु मसी की दया अर सुक-स्यांती थारै सगळा प बणी रेह्‍वै।

³परमेसर जखो आपणा परबु ईसु मसी को परम-पिता ह, दया करबाळो अर अराम देबाळो परमेसर धने ह।

⁴अर जद आपणा प कळेस आवै ह जणा बे आपानै हिमत बंधावै ह। जिऊँ आपा बी परमेसर की बि हिमत की बजेऊँ बा मिनखानै जखा कळेस म पड़्या हीं हिमत बंधा सकां।

⁵क्युं क जंय्यां मसी जखी पिड़ा भोगी बिनै म्हें बी भोगां हां जिऊँ आपा मसी की बजेऊँ परमेसर की बि म्हान मददनै बी भोगां।

⁶ज म्हें सताया जावां हां जणा बो थानै हिमत बंधाबा अर थारा छुटकारा ताँई होवै ह। थे राजी हो जणा म्हें बी राजी हां। अर थारो राजी रेह्बोई थानै हिमत क सागै बा कळेसानै भोगबा की ताकत देवै ह जखा कळेस म्हें भोगां हां।

⁷म्हानै थार प पक्की आस ह क्युं क म्हें जाणा हां क जंय्यां थे म्हारा कळेस म म्हारा साती हो बंय्यांई बि अराम म बी साती हो जखो म्हानै मिलै ह।

⁸क्युं क मेरा लाडला बिस्वास्यो, म्हें आ चावां हां क जखी पिड़ा म्हें एसिया म भोगी बिकै बारां म थे जाणो। बठै म्हें म्हारी सेवाऊँ बी बेत्ती पिड़ा भोगी। अठै ताँई क मरबा की बी नोबत आगी ही।

⁹अर म्हें हिया म आ बी सोचली ही क म्हानै मोत की सजा होगी ह। जिऊँ म्हें खुद प भरोसो नइ कर परमेसर प भरोसो कर सकां जखो मरेड़ानै बी ओज्यु जीवावै ह।

¹⁰अर बोई म्हानै बि दरदनाक मोतऊँ बचायो। अर इ टेम बी बोई म्हानै बचावै ह। क्युं क म्हें बिपैई आस लगा राखी ह इ ताँई आगै बी बोई म्हानै बचासी।

¹¹थे म्हारै ताँई अरदास कर म्हारी मदद करो हो। ओ बिकोई नतिजो ह क म्हानै खतराऊँ बचायो जावै ह। अर बोळानै परमेसर जखो म्हारै ताँई कर्यो ह बिकै बजेऊँ परमेसरनै धनेवाद देबा को मोको मिलै ह।

¹²म्हानै गुमान ह क म्हें साप अन्तर-आत्माऊँ आ खे सकां हां, क म्हें इ दुनिया का मिनखा क सागै अर खासकर थारै सागै परमेसर की खराई अर ईमानदारीऊँ रिह्या हां। अंय्यां म्हें परमेसरऊँ मिलबाळी दयाऊँ कर्या हां, दुनियादारीऊँ मिलबाळी बुदीऊँ नइ।

¹³म्हें थानै अंय्यां की कोई बात कोनी मांडर्या जखी नइ बाच सको अर नइ समज सको। म आस करूं हूँ क थे इ चिठी की सगळी बातानै सूल समज ज्यास्यो।

¹⁴जंय्यां क थे म्हानै हाल क्युंक हदताई समजो हो। पण जद परबु ईसु क ओज्यु आबा का दिन थे सगळा म्हारै प गुमान करस्यो जंय्यां म्हें थार प करां हां।

¹⁵अर इ भरोसा की बजेऊँई म थारै कनै दो बर आबा की मन म करी जिऊँ थानै दो बर आसिरबाद पाबा को मोको मिल सकै।

¹⁶अर म सोचूँ हूँ क मकीदुनिया जाती टेम थारूँ मिलर जाऊँ अर मकीदुनियाऊँ ओटो आती टेम थारै कनै होतो आऊँ जिऊँ थे यहूदिआ नगरी का मेरा सफर ताँई मेरै सागै जुर्त की चिजा बांदो।

¹⁷इ ताँई ज म आ बाता की इंछ्या करी ही जणा के म उपला मनऊँ करी ही? क म इ दुनिया का मिनखा की जंय्यां हूँ जखा एक टेम हाँ-हाँ अर नइ-नइ करीं हीं?

¹⁸पण परमेसर बिस्वास जोगो ह, इ ताँई जखा बोल म्हें थानै बोल्या हा बे सचा हीं।

¹⁹क्युं क परमेसर का बेटा ईसु मसी जिको परचार तिमूतियूस, सिलवानुस अर म कर्या हा बो हाँ-हाँ अर नइ-नइ म कोनी हो। पण ईसु मसी म बो हाँ म हो।

²⁰क्युं क ईसु मसी म परमेसर का सगळा करार, हाँ म हीं अर आपा बी इ बजेऊँ खेवां हां क अंय्यांई होवै अर ओ परमेसर की मेमा ताँई होवै ह।

²¹बो परमेसरई ह जखो ईसु मसी की बजेऊँ थानै म्हानै सागै जो'ड़र पक्को कर्यो अर आपणो अभिसेक कर्यो ह।

²²बो आपकी छाप आपणा प लगाई ह, बो आपणा हिया म पबितर आत्मा दिनी ह। आ इ बात की जामनी ह क बो बे सगळा आसिरबाद आपानै देसी जानै देबा ताँई बो करार कर्यो ह।

²³परमेसर मेरो गुवा ह क म ओज्यु कुरन्थी नगरी म इ ताँई कोनी आयो क्युं क म थानै दिन घालबो कोनी चातो हो।

²⁴अर इको ओ मतबल कोनी क म्हें थारा मालिक हां जखा थानै खेवां क थारो बिस्वास कंय्यां को होवै। पण म्हें तो थारी खुसी ताँई थारै सागै काम करां हां, क्युं क थे बिस्वास म मजबूत हो।