Read Shekhawati 2 कुरन्थीयो 10 Bible Online

2 कुरन्थीयो 10 - Shekhawati bible

2 कुरन्थीयो 10

¹मसी की दिनता अर नरमाई क सागै म पोलुस निजी तोरऊँ बोलुँ हूँ। थारै मऊँ क्युं क जणा मेरै बारां म बोलीं हीं क जद म थारै आमै-सामै होऊँ बि टेम थारै सागै नरमाईऊँ रेह्ऊँ हूँ अर जद म थारूँ दूर रेह्ऊँ बि टेम सकताई बरतुँ हूँ।

²म सोचूँ हूँ क जद म थारै कनै आऊँ जणा बा मिनखा क सागै सकताई बरतबा की जुर्त कोनी जखा सोचीं हीं क म्हें दुनियादारी को जीवन जीवां हां।

³सई ह, म्हें इ दुनिया म रेह्‍वां तो हां पण इ दुनिया का मिनखा की जंय्यां लड़ा कोनी।

⁴क्युं क सेतान का नइ दिखबाळा गडानै ढाबा ताँई म्हारै कनै इ दुनिया का राछ कोनी पण बे राछ हीं जामै परमेसर की सक्‍ति ह।

⁵जणाई म्हें गुमान भरी बाता अर मतानै जखा परमेसर का ज्ञान क खिलाप ह नकारा हां, मसी की मानबा ताँई म्हें म्हारी सोचनै बस म राखां हां।

⁶अर जद थे सगळी बाता म मसी का गेला प चालस्यो जणा आपा बा मिनखानै जखा बिका गेला प कोनी चालै सजा देस्यां।

⁷थे तो बा चिजानैई देखो हो जखी आँख्या क सामै ह। अर ज कोई खेवै क मनै बिस्वास ह क म मसी को हूँ। जणा बिनै आ बी मान लेणो चाए क जंय्यां बो मसी को ह जणा म्हें बी मसी का हां।

⁸परबु म्हानै थारै उपर जखो अधिकार दिओ ह बिपै ज म गुमान करूं जणा बिपै मनै सरमिंदा होबा की जुर्त कोनी। क्युं क ओ अधिकार थारै आत्मिक जीवननै बणाबा ताँई ह इनै बिगाड़बा ताँई कोनी।

⁹इ चिठीऊँ थानै डराबा को मेरो कोई इरादो कोनी।

¹⁰क्युं क क्युंक मिनख मेरै बारां म बोलै ह क, “बिकी चिठ्या हिया प ठेस लगाबाळी अर दुख देबाळी ह। पण जद बो म्हारै सामै होवै जणा बो खाट काटेड़ोसो लागै अर बिकी बाता म बी दम कोनी होवै ह।”

¹¹जखा अंय्यां खेवै ह बानै ओ बी जाण लेबो चाए क जंय्यां म्हें चिठी म मांडां हां बंय्यां का म्हारा काम बी हीं।

¹²क्युं क म्हें बा मिनखा की जंय्यां कोनी जखा खुदकी बडाई खुदई करीं हीं। बे खुदकी एक दुसराऊँ बराबरी करीं हीं अर अंय्यां कर बे खुदई बावळा खुवावीं हीं।

¹³म्हें बढचढ'र बात कोनी करां, पण बि हक ताँई जखो परमेसर म्हानै दिओ ह, गुमान करां हां इमै थे बी आगा हो।

¹⁴म्हानै जत्तो गुमान करबो चाए बिऊँ बढर कोनी करां। क्युं क म्हें मसी को चोखो समचार थारै कनै लेर आबाळा म पेलीपोत का हां।

¹⁵अर म्हें दुसरा का करेड़ा काम की सबासी कोनी लेवां। पण म्हानै आस ह क थारो बिस्वास बढसी जिऊँ थारै मांयनै म्हारो काम बी बढसी।

¹⁶जणा पाछै म्हें थारै अलावा दुसरी झघा जा सकां हां अर बठै चोखो समचार सुणा सकां जठै कोई कोनी सुणार्यो। जणा म्हारै गुमान करबा प कोईको आँगळी उठाबा को सुवालई पैदा कोनी होवै।

¹⁷पण, “ज कोई मिनख गुमान करबो चावै बो परबु क बारां म गुमान करै।”

¹⁸क्युं क जखो खुदकी बडाई करै ह बा नइ पण जिकी परबु बडाई करै ह बा बडी बात ह।