Read Shekhawati 2 कुरन्थीयो 13 Bible Online

2 कुरन्थीयो 13 - Shekhawati bible

2 कुरन्थीयो 13

¹म तीसरकै थारूँ मिलबा आर्यो हूँ। “सगळी बाता को फेसलो क बे सई ह क कोनी, दो-तीन गुवा की मोजूदगी म होणी चाए।”

²जद म दुसरकै थारै सागै हो, जणाबी अर इब जदकी म थारूँ दूर हूँ, बा मिनखानै जखा पाप कर्या ह बानै, अर सगळा मिनखानै ओज्यु खेऊँ हूँ, ज मेरो ओज्यु आबो होसी, जणा म बानै कोनी बकसूँ।

³अंय्यां म इ ताँई खेर्यो हूँ, क्युं क थे इ बात को सबूत चाओ हो की मेरै जरिए मसी बोलै ह। बो थारै सागै बरताव करै जणा बो कमजोर कोनी ह, पण थारै मांयनै आपकी सक्‍ति दिखावै ह।

⁴बो कमजोरी म हो जणा बो सुळी प मर्यो, पण बो परमेसर की सक्‍तिऊँ जिंदो ह। अर म्हें बी बिमै तो कमजोर हां पण परमेसर की सक्‍ति की बजेऊँ बिकै सागै जीवां हां जिऊँ थानै सुदार सकां।

⁵खुदनै बिचासो अर देखो क, थे बिस्वास म खरा हो क कोनी। ज थे हो जणा थानै बेरो पड़सी क मसी थारै म जीवै ह। ज ईसु मसी थारै म कोनी जीवै जणा इको मतबल ह क थे नाकाम होगा।

⁶अर म आस करूं हूँ, जद थे ढुंढस्यो जणा पास्यो क म्हें नाकाम कोनी होया।

⁷अर म्हें परमेसरऊँ अरदास करां हां क, थे बुराई नइ करो। ओ इ ताँई कोनी ह क, म्हारी कामयाबिनै दिखावां हां। पण इ ताँई क थे बोई कर्यो जखो सई ह, चाए म्हें नाकामई नजर आवां।

⁸क्युं क म्हें कदैई सचाई क खिलाप कोनी गया। पण जोक्यु बी कर्या बो सच ताँई कर्या।

⁹म्हें राजी हां जद म्हें कमजोर अर थे ताकतबर हो। अर आ अरदास बी करां हां क, थे मजबूतऊँ बी मजबूत बणो।

¹⁰इ ताँई थारूँ दूर होतासोता बी, म आ बातानै थारै ताँई मांडर्यो हूँ। जिऊँ क जद म थारै कनै आऊँ, जणा मनै परबु का दियड़ा हकनै कल्डाई दिखाबा ताँई काम म नइ लेणो पड़ै। ओ हक थानै बणाबा ताँई ह, थानै गेरबा ताँई कोनी।

¹¹ओ मेरा लाडला बिस्वास्यो, म आखीरक आ बोलां क सागै इ चिठीनै बंद करूं हूँ, राजी रेह्ओ, थारो भेवार बदलो, एक दुसरानै हिमत बंधाओ, स्यांती अर मेळमिलापऊँ रेह्ओ। जणा परमेसर जखो स्यांती अर परेम को दातार ह, बो थारै सागै रेह्सी।

¹²एक दुसराको हात जोड़र मान करो।

¹³सगळा परमेसर का मिनख थानै नमस्कार मांडी हीं।

¹⁴परबु ईसु मसी की दया अर परमेसर को परेम अर पबितर आत्मा को संगरो थारै सगळा क सागै होतो रेह्‍वै।