Read Shekhawati गलातियो 2 Bible Online

गलातियो 2 - Shekhawati bible

गलातियो 2

¹म चोदा बरसा क पाछै बरनाबास क सागै पाछो यरूसलेम गयो, अर म तितूसनै बि मेरै सागै लेगो।

²म बठै कोनी जाबो चातो हो पण म बठै परमेसर की इंछ्या की बजेऊँ गयो। अर म बि चोखा समचार क बारां म चुपचाप बठै की बिस्वासी मंडळी का मुखियानै बतायो जखो म गैर-यहूदि मिनखानै सुणायो हो, क्युं क म अंय्यां कोनी चातो हो मेरी गेलड़ी मेनत बेकार चली जावै।

³तितूस जखो मेरै सागै यरूसलेम आयो हो बिकै यूनानी होबा क वावजुद बि बे बिकी सुन्नत करबा की जोर-जबरदस्ती कोनी कर्या।

⁴म्हें बठै बा मिनखा की बजेऊँ गया जखा म्हारै बिचमै ओलै-छानै मसी ईसु क गेल चालबाळा बणर आगा हा। अर बे अंय्यां इ बजेऊँ कर्या क मसी ईसुऊँ आबाळी अजादि को चोखो समचार जखो म्हानै मिल्यो ह बिको भेद लेर म्हानै दास बणावै।

⁵पण म्हें स्यात घड़ीई बाकै आगै हार कोनी मानी, जिऊँ चोखा समचार की सचाई थारै मांयनै बणी रेह्‍वै।

⁶अर जखा मिनख मान्या-थान्या हा, चाए बे कंय्यांका बी हो, मनै कोई फरक कोनी पड़ै, परमेसर कोईको भेद-भाव कोनी करै बानै मेरा सुणाईड़ा चोखा समचार म क्युंई कमी कोनी लाधी।

⁷अर बे इ बातनै समजगा क जंय्यां पतरसनै यहूदि मिनखानै चोखो समचार सुणाबा ताँई भेज्यो गयो ह बंय्यांई म बी गैर-यहूदि मिनखानै चोखो समचार सुणाबा ताँई भेज्यो गयो हूँ।

⁸क्युं क परमेसर, जखो पतरसनै भेजर यहूदि मिनखा म आपको काम कर्यो, इब बोई परमेसर मनै बी गैर-यहूदि मिनखा म भेजेड़ो चेलो बणार काम लेर्यो ह।

⁹अर जद याकूब, केफा अर यहून्ना जखा बिस्वासी मंडळी का खम्बा समज्या जाता हा, बे आ जाणग्या की ओ चोखो समचार परबु की दयाऊँ मिल्यो ह। जणा बे बरनाबास अर मेरै सागै संगती को हात मिला लिआ। अर बे राजी होगा की म्हें गैर-यहूदि मिनखानै चोखो समचार सुणाता रेह्‍वां अर बे खुद यहूदि मिनखानै सुणाता रेह्‍वै।

¹⁰अर बे म्हारूँ कह्या क म्हें जुर्तमंदा को ध्यान राखां, अर म खुद इ कामनै करबानै उतावळो हो।

¹¹पण जद केफा अन्ताकीया नगरी आयो जणा म बिकै मुंह पई बोल्यो क बो गळत हो।

¹²क्युं क बो गैर-यहूदि मिनखा क सागै रोटी खातो हो, पण जद याकूब क कनैऊँ मिनख बिकै बठै गया, जणा बो बा मिनखाऊँ डर जखा गैर-यहूदि मिनखा की सुन्नत करबो चाता हा गैर-यहूदि मिनखाऊँ न्यारो रेह्बा लाग्यो।

¹³अर जखा यहूदि मिनख बिकै सागै हा बे बी बिका पाखंड म बिकै सागै होगा, अठै ताँई क बरनाबास बी बंय्यांई करबा लाग्यो।

¹⁴अर म आ देखर क बे चोखा समचार की सचाई प खराईऊँ कोनी चालीं, जणा म सकै सामै केफाऊँ बोल्यो, “तू यहूदि होर बि गैर-यहूदि मिनखा की जंय्यां जीतो आर्यो ह, जणा गैर-यहूदि मिनखानै यहूदि मिनखा की जंय्यां जीबा ताँई क्यु खेवै ह?”

¹⁵आपा तो जलमजात यहूदि हां, पापी गैर-यहूदि मिनखा की जंय्यां कोनी हां।

¹⁶पण आपा जाणा हां, क मिनख नेम-कायदानै मानबाऊँ नहिस करमाऊँ परमेसर क सामै धरमी कोनी बणै, पण ईसु मसी प बिस्वास करबाऊँ धरमी बणै ह। जणा आपा बी ईसु मसी प बिस्वास कर्या अर आई बजे ह क आपा परमेसर क सामै धरमी बण्या, क्युं क बिधी-बिधान का करमाऊँ कोई बी धरमी कोनी बणै।

¹⁷अर ज आपा मसी म धरमी होबो चावां हां, अर बिधी-बिधान आपानै पापी बतावै, जणा के मसी पाप को सेवक कोनी? पक्काई बो कोनी।

¹⁸जा रितीयानै म छोड दिओ, बानै म ओज्यु मानू जणा म खुदई सजा को भागी हूँ।

¹⁹क्युं क म नेम-कायदा की बजेऊँ नेम-कायदा ताँई मरग्यो जिऊँ परमेसर ताँई जिऊँ। म मसी क सागै सुळी प चढायो गयो हूँ,

²⁰अर इब म खुद जिंदो कोनी हूँ, पण मसी मेरै म जीवै ह। अर ज म काया म जिंदो हूँ तो बस बि बिस्वासऊँ जिंदो हूँ जखो परमेसर का बेटा प ह, जखो मेरूँ परेम कर्यो अर मेरै ताँई खुदनै दे दिओ।

²¹म परमेसर की दयानै बेकार कोनी जाबा द्‍युँ, क्युं क ज नेम-कायदा की बजेऊँ धारमिक्‍ता मिलती, जणा मसी को मरबो बेकारई ह।