Read Shekhawati गलातियो 3 Bible Online

गलातियो 3 - Shekhawati bible

गलातियो 3

¹ओ बावळो गलाति मिनखो, थानै कूण भंगरा दिओ? म थानै साप-साप बता दिओ हो, क कंय्यां ईसु मसीनै सुळी प चढायो गयो हो।

²म तो थारूँ अत्तो जाणबो चाऊँ हूँ, क थानै पबितर आत्मा को बरदान नेम-कायदानै मानबा की बजेऊँ मिल्यो नहिस जखो चोखो समचार थे सुण्या बिपै बिस्वास करबा की बजेऊँ मिल्यो हो?

³थे अत्ता बावळा कंय्यां हो सको हो? के थे सोचो हो जखो काम पबितर आत्मा थारै मांयनै चालू कर्यो बिनै थे थारूँ पूरो कर सको हो?

⁴के थे अत्तो दुख बेकार मई भोग्या? पण ओ पक्काई बेकार कोनी।

⁵परमेसर, जखो थानै पबितर आत्मा दिनी ह अर थारै मांयनै ताजूब हाळा काम करै ह, के बो थारै मांयनै अ काम नेम-कायदानै मानबा की बजेऊँ नहिस थारै मसी का चोखा समचार प बिस्वास करबा की बजेऊँ करै ह?

⁶जंय्यांकी, “अब्राहम परमेसर प बिस्वास कर्यो अर आ बात बिकै ताँई धारमिक्‍ता गिणी गई।”

⁷जणा इऊँ तो आ साबित होवै ह, क जखा बिस्वास करबाळा हीं, बे अब्राहम की ओलाद हीं।

⁸नेम-कायदा म पेल्याऊँई बतायो गयो हो क, गैर-यहूदि मिनख बिस्वासऊँ धरमी होसी। जणाई तो परमेसर कानिऊँ अब्राहमनै ओ समचार सुणायो गयो क, “तेरै जरिए धरती का सगळा कूणबानै आसिरबाद मिलसी।”

⁹जणा जखा बिस्वास राखै ह, बानै बिस्वासी अब्राहम क सागै आसिरबाद मिलै ह।

¹⁰जखो बी नेम-कायदानै मानबा की बजेऊँ परमेसरनै राजी करबो चावै ह, बो सराप क बस म ह, क्युं क नेम-कायदा म मांडेड़ो ह क, “जखो बी नेम-कायदा म मांडेड़ी सगळी बातानै नित-नित कोनी मानै बो सरापित ह।”

¹¹इऊँ तो ओ साबित होवै ह, क नेम-कायदा क जरिए परमेसर क सामै कोई धरमी कोनी होवै। क्युं क सास्तर म मंडर्यो ह क, “परमेसर क सामै मिनख बिस्वासऊँ धरमी होसी अर जिसी।”

¹²पण नेम-कायदो बिस्वास की निम प कोनी ह। अर “जखो बिनै मानै ह बो बिकैई सारै जीवै ह।”

¹³मसी आपणा सरापनै आपकै उपर लेर आपानै नेम-कायदा का सरापऊँ अजाद कर दिओ। क्युं क पबितर सास्तर म मंडेड़ो ह क, “जखो बी सुळी प लटकायो जासी बो सरापित ह।”

¹⁴मसी ईसु आपानै इ ताँई छुटायो ह क अब्राहमनै दियड़ो आसिरबाद गैर-यहूदि मिनखानै मिल सकै, जिऊँ आपानै बिस्वास करबा की बजेऊँ पबितर आत्मा मिल सकै जिको करार करेड़ो ह।

¹⁵ओ मेरा लाडला बिस्वास्यो, म थानै एक खेबत क जरिए बताऊँ हूँ, क जद कोई मिनख कोईऊँ करार करै ह, जणा बो बि करेड़ा करारनामा म बंद जावै ह, अर बिनै बो कोनी टाळ सकै अर नइ बिमै क्यु घटा-बढा सकै ह।

¹⁶अंय्यांई परमेसर अब्राहमऊँ अर बिका वंसऊँ करार कर्यो, परमेसर अंय्यां कोनी बोल्यो क, “म तेरा वंसजाऊँ करार करूं हूँ” वंसजा को मतबल तो बोळा होवै पण बो “वंस” बोल्यो अर आ बात एक मिनखनै दिखावै अर बो मसी ह।

¹⁷मेरै खेबा को मतबल ओ ह, क जखो करार परमेसर पेल्याऊँ कर दिओ बिनै च्यार सो तीस बरस क पाछै आबाळो सास्तर कोनी बदल सकै। अर नइ बिका वादानै नकार्यो जा सकै।

¹⁸क्युं क ज बापोत नेम-कायदाऊँ मिलती जणा करारऊँ कोनी मिलती, पण परमेसर अब्राहम प आपकी दया दिखाई अर बापोती करार की बजेऊँ बिनै दि।

¹⁹जणा नेम-कायदा की कठै जुर्त री? आ तो पाछै दि गई जिऊँ आपानै बेरो चालै क आपा पाप करां हां, बि एक वंसज क आबा ताँई जिकै बारां म करार कर्यो गयो हो। अर नेम-कायदा तो ईस्बर नगरी दुता की बजेऊँ मूसानै दिआ गया हा, अर बो मिनखानै दिओ। अर मूसा अंय्यां एक बिचोलिओ होयो।

²⁰बिचोलिओ तो दो मिनखा क बिचमै होवै ह, पण परमेसर एकई ह।

²¹के जणा नेम-कायदा परमेसर का करेड़ा करार क खिलाप ह? अंय्यां पक्काई कोनी! क्युं क ज नियमानै मानबा की बजेऊँ परमेसरऊँ आपानै जीवन मिलतो, जणा सचमई नेम-कायदाऊँ पाप धुप जाता।

²²पण नेम-कायदा बोलै ह, पाप सगळानै आपकै बस म ले लिआ, जणा परमेसर को बादो बा सगळा ताँई ह जखा ईसु मसी प बिस्वास करीं हीं अर आ बात बस बिस्वास पई टिकरी ह।

²³पण बिस्वास क आबाऊँ पेली, आपा नेम-कायदा क मांयनै बंदि की जंय्यां हां। मतबल ओ हो क, जद ताँई बिस्वास कोनी आयो हो, जणा ताँई आपानै नेम-कायदानै मानबो जरूरी हो।

²⁴इ ताँई नेम-कायदो मसी ताँई आपणानै पुगाबाळो गरूजी की जंय्यां होयो, जिऊँ आपा बिस्वास की बजेऊँ परमेसर क सामै धरमी होआं।

²⁵पण इब जद बिस्वास आगो ह जणा इब आपा नेम-कायदा क बस म कोनी।

²⁶थे सगळा इब मसी ईसु प बिस्वास करबा की बजेऊँ परमेसर का बेटा हो।

²⁷अर थार मऊँ जत्ता बी मसी म बतिस्मो लिआ हो बे मसीनै गाबा की जंय्यां पेर लिआ हीं।

²⁸जणा इब नइ तो कोई यहूदि रिह्यो अर नइ यूनानी, नइ गुलाम, नइ अजाद, नइ नर, नइ नारी, क्युं क थे सगळा मसी ईसु म एकई हो।

²⁹अर जद थे मसी का हो, जणा अब्राहम का वंसज अर करार गेल वारिस बी हो।