Read Shekhawati कलुसीयो 2 Bible Online

कलुसीयो 2 - Shekhawati bible

कलुसीयो 2

¹म चाऊँ क थे इ बातनै जाणो क, म थारै ताँई, लोदिकीया नगरी म रेह्बाळा अर बा सगळा ताँई जाऊँ मेरो आमनो-सामनो कोनी होयो, कत्ती चिंत्या राखूँ हूँ।

²ओ म इ ताँई करूं हूँ क, बाका हिया म हिमत बंधै अर बे आपसरी का प्यार-परेम म बंद जावै, अर बाकन मोकळी पक्की समज होवै जखी परमेसर पिता का भेदनै सूल जाणबाऊँ आवै ह। ओ भेद मसी ह जिनै परमेसर खोल्यो ह।

³मसी म सगळा ज्ञान अर बुदी को खजानो लुखेड़ो ह।

⁴अंय्यां म इ ताँई बोलुँ हूँ क कोई थानै आपकी मिठी-मिठी बाताऊँ धोको नइ दे सकै।

⁵बंय्यां तो म कायाऊँ थारूँ दूर हूँ पण आत्माऊँ थारै कनै हूँ, म राजी हूँ अर सुणर्यो हूँ क थे सई ढंगऊँ हो अर मसी म थारो बिस्वास मजबूत ह।

⁶इ ताँई जंय्यां थे मसी ईसुनै परबु मान्यो ह, बंय्यांई बिमै बण्या रह्यो।

⁷अर जंय्यां थानै सीखायो गयो ह बंय्यांई थारी जड़ानै बिमै फिलार बढता जाओ। बिपै थारा जीवना की निम गेरो। अर बिस्वास म पक्का होर बिको धनेवाद करता रेह्ओ।

⁸सचमई मसी ईसु जखो मिनख बणर आयो बिमै परमेसर को सगळो सुभाव भरपूरी क सागै बास करै ह। इ ताँई थे बेमतबल की जिरै-बाजीऊँ समळर रेह्ओ कदै कोई थानै आको गुलाम नइ बणाले क्युं क अ मसी कानिऊँ नइ पण मिनखा का रिती-रिवाजा अर जगत प राज करबाळी आत्मा कानिऊँ आवै ह।

¹⁰अर बिमैई थे भर्यापूरा हो, जखो सगळी राज करबाळी अर अधिकार राखबाळी सक्‍तियाऊँ बोळो बडो ह।

¹¹थारा खुदका पापी सुभाव का छुटकारा ताँई थारी सची सुन्नत[3] मिनखा क हाताऊँ नइ पण मसीऊँ करेड़ी ह।

¹²अर जद थे बतिस्मो[4] लिआ जणा मसी क सागै गाड्या गया हा अर परमेसर की काम करबाळी सक्‍ति प थारा बिस्वासऊँ ओज्यु मसी क सागै जीवाया गया हा। जि मसीनै परमेसर मरेड़ा मऊँ ओज्यु जीवायो हो।

¹³मसी प बिस्वास करबाऊँ पेल्या थे थारा पाप की बजेऊँ आत्मा म मरेड़ा अर बिना सुन्नतहाळा हा। पण इब परमेसर थानै मसी क सागै जीवायो अर सगळा पापऊँ आपणानै माफ कर दिओ;

¹⁴अर बि आदेसनै जखो आपणै नाम अर खिलापत म हो बिनै भुजाण दिओ अर ईसुनै सुळी प किलाऊँ जड़र आपणै सामैऊँ बि लेखनै हटा दिओ,

¹⁵अर राज करबाळा अर उपरी सक्‍तिया का अधिकारी का हतियार खोसर सुळीऊँ बाको चोड़ै-धाड़ै तमासो बणायो अर बानै आपकै गेल कर जीत को जुलस काड्यो।

¹⁶इ ताँई खाबो-पीबो, तिहवार, पुन्यु अर अरामहाळा दिन क बारां म बताबाळा नियम सदाई कोनी बण्या रेह्‍वै अर अ रिती-रिवाज छाया जंय्यां का हीं पण सचाई तो मसी मई ह इ ताँई ज कोई थार प आ बाता की बजेऊँ बलेम लगावै जणा बिऊँ दुखी मना होवो।

¹⁸जखो मिनख देख-दिखावा की नरमाई बरतै अर ईस्बर नगरी दुतानै पूजबा को काम करै ह बिनै थारा इनाम पाबा म रोड़ो मना बणबा द्‍यो। अंय्यांलको मिनख सदाई बा दिव्य दरसावा की फांप मारतो रेह जखा बो देख्या हा अर बो आपका अर मिनखा का बिचार म झूठोई गुमान म फुल्यो रेह्‍वै ह,

¹⁹अर अंय्यांलको मिनख मसी म कोनी बण्यो रेह। मसी बिस्वासी मंडळी को सीर ह। मसी का बसऊँई सगळी काया रूपी बिस्वासी मंडळी पळै अर जोड़ अर नसाऊँ मिलर जंय्यां परमेसर चावै ह बंय्यांई बढती जावै।

²⁰थे तो मसी क सागै मरेड़ा हो अर थानै जगत प राज करबाळी आत्मा क कनैऊँ छुडायड़ो ह। जणा पाछै थे आ जगत का मिनखा की जंय्यां क्याले जीओ हो? थे जगत का अंय्यांलका नियमानै क्याले मानो हो?

²¹जंय्यां, “इनै हातऊँ नइ पकड़णो, इकै कोनी अड़बो, इनै कोनी खाणो”

²²अ सगळी चिजा खतम होबाळी चिजा हीं, अर अ मिनखा का आदेस अर सीख ह।

²³ईस्बर नगरी दुतानै पूजबो, आपकी कायानै दुख देबो, देख-दिखावा की नरमाई अ मिनखा का बणाएड़ा झूठा नियम, ज्ञान की बाता तो लागै पण काया की बासनानै रोकबा ताँई अ क्युंई फाईदो कोनी करै।