Read Shekhawati कलुसीयो 3 Bible Online

कलुसीयो 3 - Shekhawati bible

कलुसीयो 3

¹मसी मरेड़ा मऊँ ओज्यु जीवायो गयो इ बजेऊँ थे आत्मा म जीवाया गया हो। इ ताँई थे ईस्बर नगरी हाळी चिजानै टोल्यो। जठै मसी परमेसर का दायणै हात कानि बिका सिंघासन प बिराजर्यो ह।

²थे तो आत्मा म मरेड़ा हा पण इब थारो जीवन मसी क सागै परमेसर म लुखेड़ो ह। अर जद बो परगट होसी जणा थानै बी बिकै सागै बिकी मेमा म परगट कर्यो ज्यासी। थारा जीवना की निम मसी ह। इ ताँई थे धरती हाळी चिजा प नइ पण ईस्बर नगरी हाळी चिजा प हियो लागाओ।

⁵इ ताँई थारै मांयनै जोक्यु दुनियादारी की इछ्या गेल काम करै ह बानै मार द्‍यो, जंय्यां मुंडा काळा होबाळा नाजायज कुकरम बासना भर्या काम, बुरी इंछ्या अर लोभ-लालच जखो परमेसर की नजर्या म बुरो ह अठै ताँई की मूरती पूजा की जंय्यां ह।

⁶जखा आ कामानै करीं हीं बापै परमेसर को परकोप पड़ै ह।

⁷अर बो बी एक टेम हो जद थे बी आ बाता क गेल चालता हा अर अंय्यांई बुरी-बुरी बाता म जिर्या हा।

⁸पण इब थे आ सगळी चिजा क सागै, लाल-तातो होबो, दांत पिसबो, बैर बांदबो, दुसरा की बुराई करबो अर मुंडाऊँ गाळ्यां बकबानै छोड द्‍यो।

⁹आपसरी म झूठ मना बोलो क्युं क थे थारा पुराणा सुभावनै जिमै बुरी बाण ही बिनै छोड दिओ।

¹⁰अर नएड़ा सुभावनै ध्यार लिओ ह। अर थे परमेसर का गुण अर बिका सगळा ज्ञान म दिन-दिन बढता जाओ।

¹¹अर इब कोई यूनानी अर यहूदि, सुन्नत हाळो अर बिना सुन्नत हाळो, बिना लोतर का, कुजात, गुलाम अर अजाद म कोई अंतर कोनी ह पण मसी सक्यु अर सगळा म ह।

¹²थे परमेसर का लाडला, पबितर अर टाळेड़ा मिनख हो। इ ताँई तरस, दया, नरमाई अर थ्यावस का गाबा पेरल्यो अर मन म बडा मना होवो।

¹³याद राखो परबु थारा पापनै माफ कर्यो ह, इ ताँई एक दुसरा की सिकायत करबा की बजाय बिनै सेल्यो अर एक दुसरानै माफ करो।

¹⁴अर आ सगळा लखणा म प्यार-परेमनै बी सामिल करल्यो जखो सगळी चिजानै आपसरी म कोनी टूटबाळा पटा म बांदै ह।

¹⁵परमेसर थानै एक सागै एकई काया म स्यांतीऊँ रेह्बा ताँई बुलायो ह, जणा इब थे मसी जखी स्यांती थानै दि ह बिनै थारा हिया म राज करबा द्‍यो। अर परमेसर को धनेवाद करता रह्यो।

¹⁶सगळी बुदी क सागै एक दुसरानै सीखाओ अर चेताओ। अर थारा हियाऊँ परमेसर ताँई सगळा भजन अर आत्मिक गुणगान गाता रह्यो अर धनेवाद देतार्यो। अंय्यां कर मसी का बचनानै थारा हिया म पूरो-पूरो बसबा द्‍यो।

¹⁷मेरो खेबा को मतबल ओ ह क, थे जोक्यु करो अर बोलो बो परबु ईसु मसी क नामऊँ होणो चाए अर बिका नामऊँई परम-पिता परमेसरनै धनेवाद द्‍यो।

¹⁸ओ परबुनै मानबाळी लूगायो, थारै ताँई ओ चोखो ह क, थे थारा मोट्यारा क बस म रह्यो।

¹⁹अर मोट्यारो, थे थारी लूगायाऊँ प्यार-परेम राखो, बाऊँ कल्डो बरताव मना करो।

²⁰टाबरियो, थे थारा माँ-बाप का कह्या म चालो क्युं क परबु इऊँई राजी होवै ह।

²¹टाबर-टिकरा हाळो, थे थारा टाबरानै दुखी मना करो कदै अंय्यां नइ होज्या क बाको मन मर जावै।

²²गुलामो, थे मिनखानै राजी करबाळा की जंय्यां थारा मालिका क सामै काम मना करो। पण सचा मनऊँ परबु को मान करबा ताँई सगळी बाता म बाका हुकमानै मानो।

²³थे जोक्यु करो बिनै मन लगार करो अर अंय्यां जाणो क, “ओ काम म्हें मिनखा ताँई कोनी करर्या पण परबु ताँई करर्या हां।”

²⁴याद राखो, थारो असली मालिक मसी ह जिकी थे सेवा करो हो अर परबु थारै ताँई जखो इनाम धर राख्यो ह बो थानै देसी।

²⁵मेरो खेबा को मतबल ओ ह क, परमेसर हरेक को बराबर न्याय करसी बो कोईकिई हिमायती कोनी ले। अर हरेक पापीनै बिका बुरा कामा गेलई फळ मिलसी।