Read Shekhawati 1 थिसलूनिकी 1 Bible Online

1 थिसलूनिकी 1 - Shekhawati bible

1 थिसलूनिकी 1

¹म पोलुस, आ चिठी सीलास[1] अर तिमूतियूस[2] क सागै मिलर थिसलूनिकी नगरी का बा सगळा मिनखानै मांडर्यो हूँ, जखा परम-पिता परमेसर अर परबु ईसु मसीनै मानबा की बजेऊँ बिस्वासी मंडळीऊँ जुड़ेड़ा हीं। परमेसर थार प दया बणाए राखै अर थानै स्यांती देवै।

²म्हें म्हारी अरदास म थानै सदाई याद करां हां, अर थारै ताँई परमेसर को धनेवाद देवां हां।

³परम-पिता परमेसर क सामै म्हें जद बी जावां जणा थारा बिस्वास का कामानै, थारा परेम भर्या कामानै अर परबु ईसु मसी क ओज्यु आबा की आस म, थे सक्यु सेह्ता होया बी बिस्वास म पक्का हो, आ बातानै सदाई याद करां हां।

⁴मेरा लाडला बिस्वास्यो, परमेसर का लाडला मिनखो म्हें जाणा हां, क परमेसर थानै खुद ताँई टाळ्यो ह।

⁵क्युं क ओ चोखो समचार थारै कनै बोली रूप मई कोनी पुग्यो पण सक्‍ति, पबितर आत्मा अर इकै सच की पुक्‍ताई क सागै पुग्यो ह। जंय्यां थे जाणोई हो क, म्हें थारा भला ताँई थारै मांयनै कंय्यां जिया।

⁶थे कळेस क बावजुद बी पबितर आत्मा का दियड़ा आनंद क सागै परमेसर का बचननै मानर म्हारी अर परबु की जंय्यां चालबाळा बणग्या।

⁷अठै ताँई मकीदुनिया अर अखाया दिसावर का सगळा बिस्वास्या ताँई थे सीख देबाळो पाठ बणग्या हो।

⁸क्युं क थारी बजेऊँ परबु को बचन थारूँ लेर मकीदुनिया अर अखाया मई कोनी फेल्यो, पण जठै बी म्हें जावां बठै परमेसर म थारा बिस्वास की चरचा सुणा हां। जि बजेऊँ म्हानै क्युं खेबा की जुर्तई कोनी पड़ै।

⁹क्युं क बठै का मिनख खुदई बतावै ह क कंय्यां म्हें थारै कनै आया अर कंय्यां थे मूरत्यानै छोडर जीवता अर सचा परमेसर की सेवा करबा ताँई मुड़्या।

¹⁰अर बिकाळा बेटा ईसु मसीनै ईस्बर नगरी मऊँ ओज्यु आबानै उडिको हो, जिनै बो मरेड़ा मऊँ ओज्यु जीवायो हो, अर बोई आपानै परमेसर का आबाळा परकोपऊँ बचा सकै ह।